台灣全民台語聖經協會

Siau sū蕭序
基督 ê 教會 tī 無仝款 ê 時點lóng 有它特別 ê 見證，這是因為tī 人類歷史演進 ê 過程中，處境改變，所面對 ê 問題 ia̍h ē tòe leh無仝。台灣基督長老教會信仰告白 ê 制定，是 tī 教會發表三个宣言，koh 接續發生高雄美麗島事件了後。教會一方面為 tio̍h beh重新確認所信，堅固信徒ê 信仰，對社會提出說明，另外一方面mā 是 beh 向政府提出抗議、示威，所以是有真特殊ê 時代意義。
Chit-ê 信仰告白發表已經超過三十冬，台灣 ê 社會 kah 教會所面對 ê 國內外環境已經有真chē 變化，所以應該是咱教會思考因應時代變化，看是 beh 增補á 是修改 ê 時 ā，thang hō͘ 咱教會ê 信仰繼續對台灣 kah 世界做出ha̍h 時代 ê 見證，ia̍h thang hō͘ 世界ê 教會 tī 普世一體 ê 信仰下彼此扶持，共同見證。
咱若看亞洲真 chē 教會所做ê 信仰告白，因為是 tī in ê 國家tùi 殖民統治得 tio̍h tháu 放 ê 背景所做 ê，所以內容真 chē lóng kah建國、獨立相關，有 ê 甚至因為án-ne soah 有反對宣教師 ê 情形，這 是咱 chit-ê 信仰告白 ê 精神。信仰告白是教會全體信徒共同 ê告白，同時 beh 對普世 kah 本土做見證，雖然 tī 制定 ê 過程中難免 ē 有爭議， -koh tī 制定後通過神學反省 kah 討論來深化信徒對告白內容 ê 認識 kah 注意，這是真有意義 ê。
信仰告白亦有禮儀 ê 功能；台灣基督長老教會信仰告白若beh 做禮拜 ê 路用，應該 tio̍h kā它簡化，á 是重新制定合 tī 今 á日 ê 政治、社會、經濟處境 ê 告白。藉 tio̍h chit 本台語版信仰告白 ê 出版，hō͘ 咱共同來思考，咱以前 ê 前輩有回應 in ê 時代，咱今 á 日 beh án 怎來回應咱所面對ê 時代挑戰 leh ？

全民台語聖經協會榮譽理事長

蕭清芬 Siau Chheng-hun


Pe̍h- ōe- jī Hàn- lô Tùi- chiàu Chhut-pán ê Ōe
白話字漢羅對照出版 ê 話
真歡喜黃伯和牧師願意 kā伊 1991 年由台灣教會公報社出版ê《釘根本土的信仰》（用中華民國語），hō͘ 全民台語聖經協會來出版台語版。
本協會 ê 宗旨是「研究 kah出版有主體性 koh 人人讀有 ê 台灣母語聖經譯本」，阮 mā 有感覺母語靈修冊 ê 要緊。2019 年 5月出版《主 ê 祈禱文》了後，得 tio̍h 真 chē 人 ê 肯定；黃牧師chit 本冊是對台灣基督長老教會信仰告白 ê 陳述 kah 解說，真適合 hō͘ 協會來出版，thang 來服務咱台語人。
Tī kā 中華民國語翻譯做台語 ê 時，阮翻譯團隊有感覺遺憾ê 是，一向主張「自由民主」ê 台灣基督長老教會 ê 信仰告白卻 iáu teh 使用封建時代 khah 負面性 ê「百姓」語詞。《和合本聖經》、《巴克禮白話字聖經》使用「百姓」， -koh 到《現代中文譯本聖經》、《紅皮聖經》、《現代台語譯本聖經》kah《全民台語聖經》ê 時，已經 kā「百姓」改做「人民 / 子民」。
著者講咱是 teh 論述「台灣基督長老教會信仰告白」，所以應該 tio̍h 保留它 ê 原文用字「百姓」；著者 mā 有 tī 文中做說明。Ǹg 望台灣基督長老教會 ē-tàng 緊緊來 kā 信仰告白文中 khah 負面性 ê 語詞「百姓」，修改做「人民 / 子民」，thang 來符合現此時 ê 台灣「自由民主」社會。
Chit 本冊 kan-taⁿ 五萬 gōa 字，有適合白話字漢羅對照版，thang方便 khah 無慣勢台語漢字讀音 ê少年人來讀。這是全民台語聖經協會努力出版「人人讀有」ê 目標，ǹg 望大家 ē 歡喜來讀。

感謝宋麗瓊長老、莊惠平先生 kah 廖幸瑛女士 ê 詳細校對，mā tio̍h 感謝台灣教會公報社出版團隊 ê 努力，chiah hō͘ chit 本有意義 ê 台語版來順利出版。

全民台語聖經協會 秘書長 林俊育


Tâi- gí- pán chhut-pán chū sū
台語版出版自序
台灣基督長老教會信仰告白tùi 1985 年制定到 taⁿ，已經有 34冬，chit 份信仰告白 tī 地方教會ê 禮拜中使用 ê 情形雖然有漸漸khah 普遍，信徒對它 mā 有 khah慣 勢， -koh， 起 頭 teh 期 待 它ē-tàng 成做教會 kah 信徒用心研究 ê 文獻，koh 通過有意識 ê 告白 kah 反省，來帶動教會 ê 更新以及信徒信仰形態ê 轉型，可惜，chit-ê 眠夢並無實現。台灣基督長老教會信仰告白 tī 各地教會 ê應用，ná 親像是加出來 ê 另外一份傳統 ê 信經，kan-taⁿ tī 禮拜儀式中「行禮如儀」，真少聽 tio̍h用 chit 份告白文做反省、探查，á 是做教育用，來喚起教會 kah信徒重新思考基督教信仰 ê 時代意義，以及 tī 此時此地 ê 挑戰kah 啟發。本來想講，我 chit 本「釘根本土 ê 信仰──台灣基督長老教會信仰告白淺釋」就 ē án- ne hông 歸入圖書館，變做歷史文獻。
兩年前，我去波士頓開會 ê時，得 tio̍h 林俊育長老 ê 好意，邀請我去 tòa tī in 波士頓 ê 厝；一禮拜久 kah 林長老有真好 ê 分享。我 kah 林長老是 tùi 共同推行台語文運動 ê 機會來熟似，已經有一、二十年久。阮 koh 再做伙 ê時，大部分 ê 話題 mā 是 lóng kah台語文有相關。林長老非常熱心tī 台語聖經 ê 翻譯，伊有招集一陣朋友，成立「全民台語聖經協會」，除了翻譯 kah 推展全民台語聖經以外，ia̍h teh 翻譯對教會信徒信仰有造就 ê 冊。伊 bat 幾nā pái 提起 ǹg 望 kā 我 ê 冊翻做台語，我想講伊是 teh 講客氣話，並無 khǹg-tī 心內。幾個月前，tī台南公報社門口 koh tú-tio̍h 伊 tùi美國 tńg 來，阮就相約，做伙食飯討論合作 ê 事工，而且 koh 一pái 提起翻譯我 ê 冊 ê 計畫。Tī 伊tńg 去美國了後，隨時 to̍h 寫 e-mail來，ài 我掃描文字檔案寄 hō͘ 伊翻譯，我 chiah 開始考慮 tī chit-ê台灣內外環境充滿危機 kah 挑戰ê 時，教會 ē-tàng 扮演啥物角色thang 回應 chit-ê 時代需求？ Chit本《台灣基督長老教會信仰告白淺釋》就 án-ne 浮起來我 ê 心頭；這 to̍h 是選擇 chit 本冊 ê 原因。

Beh 掃描 chìn 前，我 koh kā chit 本冊讀一遍，發見冊內大部分 ê 訴求對今 á 日台灣 ê 教會 kah社會，lóng iáu-koh 適合，值得通過 chit 本冊 koh 一 pái 喚起教會kah 信徒，重新關注 chit 份信仰告白 ê 文獻，用心體會 chit-ê 信仰告白所隱藏 ê 創造性 ê 信仰訴求，來提昇台灣教會宣教 ê 品質kah 見證 ê 能力，所以就 án-ne 著手做修訂了後，kā 它寄出去。Tī chia ài koh 一 pái 多謝林長老 ê 幫忙 kah 為 chit 本冊寫出版 ê 話。同時 ia̍h 感謝全民台語聖經協會榮譽理事長蕭清芬牧師為 chit 本台語譯本寫序推薦。
願榮光歸上帝！

黃伯和寫 tī 台南

2019 年 8 月


Tēⁿ sū鄭序
Tī「台灣基督長老教會信仰告白」草擬 ê 年間，正確講是 tùi 1979 年 初 到 1985 年 ê 期間，黃伯和牧師 iáu 是屬 tī 年輕一代 ê 傳教者，直到完成草稿階段 ê 時，to̍h 是修改文章上 ê 字句 kah chhōe 有關 ê 聖經節 ê 時，伊 chiah 受邀請來參與幾 pái。Taⁿ 伊已經成長，成做中年 ê 組織神學 ê 老師 ā；chit-má，伊 tùi 組織神學 ê 觀點來寫「信仰告白淺釋」，hō͘筆者感覺伊後生可畏。台灣基督長老教會對「信仰告白」，坦白講比選議長 á 是人事問題（親像「南神聘院長事件」）khah 是熱題。Tī chit 時，黃
牧師著作 chit 本「淺釋」，是相當有激勵性 ê 意義；特別是，它 hō͘ 教 界 人 士 ē-tàng koh 一 pái來關心咱教會 ê 改革宗傳統。伯和辛苦 loh ！期待你繼續成長。

主後 1991 年 10 月

Tī 基督教社會研究所

老師 鄭兒玉


Chū-sū
自序

「台灣基督長老教會信仰告白」ê 制定 kah 得 tio̍h 總會接納通過，是 teh 象徵基督教會 tī 台灣 ê 宣教歷史已經 pôaⁿ 過一个重要 ê 分水嶺；to̍h 是已經 tùi 外來宗教 ê 身分轉變做本土 ê 信仰，tùi「接受」宣教 ê 教會變做「自主」宣教 ê 教會。相信 chit 份短短 ê 信仰文獻，它 ē 成做台灣教會史 ê 重要見證。

Tùi 護教 ê 觀點來看，信經、信條 á 是信仰告白 ê 制定，除了為教會此時此地 ê 信仰做辯護以外，同時 mā 有教育 kah 整合教會內部 ê 信仰認知 kah 共識 ê 功能；iā to̍h 是講，信仰告白是信仰合一 ê 重要催化劑。所以，對信仰告白 ê 陳述 kah 解說，實在是刻不容緩 ê 工作。

筆者身為台灣基督長老教會ê 信徒，最近幾年來 koh 真榮幸受列作總會「信仰 kah 教制委員會」ê 委員之一，對我本身所屬ê 台灣基督長老教會 tī 掙扎七年了後，ē-tàng 完成 chit 份認同鄉土 kah 釘根本地 ê 信仰告白，心內實在有 oh 得用言語來表達 ê 歡喜 kah 安慰。基於從事神學研究ê 認知，以及對 chit-ê 信仰告白所懷抱 ê 期待，筆者深深感覺推廣kah 詮釋 chit-ê 信仰告白，hō͘ 它釘根入去信徒良心ê 重要性，所以，tī「使者」雜誌主編 ê 邀請之下，筆者無考慮 ka-kī 學識淺薄，以連載 ê 方式，分十二个子題完成chit 本冊。Ǹg 望藉 tio̍h 對本宗信仰告白 ê 探討「解說」，ē-tàng拋磚引玉，喚起咱教會兄姊對本宗信仰 ê 關注，同時 mā 提供一kóa 淺見，hō͘ 兄姊做伙來對 chit-ê信仰文獻做研究 kah 討論，目的是 ǹg 望 chit-ê 信仰告白 ê 信仰精神ē-tàng 真正落實tī 咱教會中間。

本冊以「釘根本土 ê 信仰」做冊名，一方面是 teh 肯定 chit-ê信仰告白 ê 歷史性角色，另外一方面 mā 是 teh 指出本冊 ê 詮釋工作 ê 基本立場 kah 角度。

本冊 ê 出版 tio̍h 感謝前「使者」kah 革新後 ê「新使者」雜誌 ê 編輯同工，長期提供版面 hō͘筆者發表，mā tio̍h ài 感謝人光出版社張麗淑社長慷慨應允出版。台南東門教會王麗鐘姊妹幫忙輸入電腦，陳玟玟小姐 tī 出版上 ê協助，kah 士杰君一再費神為我ê 冊做封面設計，lóng hō͘ 筆者心存感激。鄭兒玉牧師是 chit-ê 信仰告白制定過程中出力 siōng chē ê教會前輩之一，伊 ē-tàng 答應為本冊寫序，是筆者 ê 榮幸。Siōng尾 mā 是 siōng 重 要 ê 是，chit 份出版 ê 歡喜，是愛妻鷹鷹 kah 稚子以勒、牧勒用包容 ê 心，tiāⁿ- tiāⁿ 忍受我 tī 桌前無暝無日，佔去 kah in 做伙 ê 時間，koh 對我鼓勵 kah 支持所得 tio̍h ê 成果，應該 kah in 共同分享。

黃伯和 tī 南神聞香居

1991 年 10 月




目錄
蕭序∣……………………………04
白話字漢羅對照出版 ê 話∣林序07

台語版出版自序∣………………10
鄭序∣……………………………14
自序∣……………………………16
台灣基督長老教會信仰告白∣…20

第 1 章 Lín 講我是啥人？∣……23

第 2 章 創造 koh 統治人 kah 萬物 ê獨一真神∣………………37
第 3 章 歷史 kah 世界 ê 主∣……50
第 4 章 咱 ê 兄弟耶穌基督∣……63
第 5 章 Tī 萬百姓中做見證∣……79
第 6 章 信仰 kah 生活 ê 準則∣… 92
第 7 章 上帝百姓 ê 團契∣……109
第 8 章 歸榮 hō͘ 光上帝∣………128
第 9 章 有份 tī 上帝 ê 創造∣…141
第10 章 社會制度 kah 宗教心靈∣……………………162
第 11 章 罪 kah 耶 穌 基 督 ê 救 恩∣……………………181
第 12 章 Hō͘ 世 界 成 做 上 帝 國 度∣……………………195

結論∣……………………………219
附錄 1：使徒信經∣……………223
附錄 2：尼西亞信經∣…………224