台灣話ê文字化kap文學化

這本論文集有十篇論文，分做四輯。第四輯是英文論文，攏是這幾年tī國外發表ê論文，其中三篇tī這本冊有對應ê台文版，另外一篇無tī這本冊，毋過已經收tī頂一本專冊《白話字文學：台灣文化kap語言文學ê互動》。這輯最後一篇〈戰後台語文刊物ê流變〉六月中tī哈佛大學北美洲台灣硏究學會第21屆國際學術研討會發表。這篇論文書寫採取華英對照方式呈現。
　所以這幾冬tī國外發表ê四篇論文，跨越歐美亞三洲四國ê名校：歐洲是愛爾蘭都柏林大學、德國波鴻魯爾大學、韓國延世大學以及美國哈佛大學。第三輯「語言使用」ê三篇攏是kap學生ê合作寫作（cooperative writing)。主要是我kap科技部研究計劃ê助理吳庭宇、曾弋軒，運用研究計劃「戰後台語文刊物研究」ê語料所寫ê。另外一篇　貫穿規本冊十篇論文ê—條線，就是台灣話ê文字化kap文學化，所以就用按呢來做冊名。個人長期關心上濟，用力上大就是向望台灣人ê母語，有一工會當出頭天，會當成做咱台灣人主要ê教育語言kap文學語言。若beh有彼一工，若beh等著彼个春天ê來臨，台灣人著愛有夠智慧，除了覺醒家己語文ê重要性，koh愛知影家己語文標準化ê重要性，予袂當踏步向前ê冰雪會當漸漸溶去，予看袂著未來ê長lò-lò烏暗暗ê冬天會當緊緊過去，按呢春天才有可能會來。到時咱就會當使用標準化ê台灣語文書寫家己ê歷史，創作家己ê文學，教育家己ê子弟。