咱來考台語認證 b&c.1 咱愛會曉的語詞

序《咱來考B&C》  

沿若B沿若C
李勤岸
 

　　幾冬前，我去中部一个讀冊會講演。In是為著準備台語認證考試組成ê

 

　　讀冊會。這个讀冊會請我做in ê「顧問」。這个我kā號做「咱來考C」讀冊會ê成員，後--來lóng考過C1高級，多數後來koh lóng考過C2專業級。

 

　　因為按呢ê結緣，這个讀冊會轉形做「咱來考C編輯團隊」，由張寶明召集，我koh邀請林麗黛做主編。遮ê編輯透過in親身參與認證考試ê經驗，編輯一本《咱來考C》出版，分享hōo想beh通過台語認證考試ê有志。這本冊出版了後，風評bē bái。

 

　　以這个團隊做基礎，後來koh編出《台語活詞典：首冊》。Tsit-má，12年國民教育lóng beh開台語課ah，阮就想講beh按怎來幫贊遮ê有心beh貢獻tī中學台語教育ê老師。目前教育部要求台語教師ài通過B2中高級，所以這个編輯團隊就koh 想beh編一套《咱來考B&C》，向望遮ê台語老師lóng會當uì這三本冊得著通關 ê password，lóng 懸分 phá-suh！

 

　　這套《咱來考B&C》分做三冊：第一冊《咱愛會曉的語詞》、第二冊《咱愛寫予著的字詞》、第三冊《模擬試題：閱讀佮書寫》。

 

　　咱lóng是母語失學ê一代，咱無機會tī學校受著母語教育，所致咱只好沿若考沿若讀，沿若讀沿若教，thang hōo咱ê母語無致到失落！透過這款暗學仔式ê自我教育，咱beh kā咱ê母語，咱ê文化傳承落去後代，後後代，萬世代！

 

2022.7.17臺北和室