烏熊先生穿懸踏仔鞋

推薦序

台南種籽創意繪本手作坊負責人 葉欣怡

　　信龍ê詩集kah散文攏足有個人獨特風格kah真強ê本土意識， chit擺共編hō͘ 囡仔ê睏前故事提來出繪本，tī學齡前色水分袂清，正跤倒跤mā分袂清，加上畫風活潑，按呢ê題材真適合細漢小朋友閱讀。

　　當咱講著囡仔ê閱讀材料時，chit本冊是一个真好ê選擇。尤其對學齡6歲前ê兒童來講，chit款ê故事m̄-niā會使啟發in ê想像力，koh會當幫贊in學習基本ê認知，而且koh會使學習按怎包容無仝款ê人。

作者序

留hō͘囡仔ê記持 杜信龍

　　Chit个故事是2023年6月初1，下暗睏ê時編故事hō͘囡仔聽--ê。阮本成揀三个故事，看是m̄是有機會thang出冊--無，若好運有thang補助上好，無，凡勢阮就家己出錢。

　　彼當陣，lóng是即興編故事，利用阮平常時遇--著ê代誌抑是感覺一寡激五仁ê意象就kā囥--入-來。

　　阮捌講--過，出冊有影是想袂到--ê。這m̄-nā是乞食hē大願，mā是阮面皮激厚厚，無--者，阮真正m̄敢去做。這帶有一寡欲留hō͘囡仔ê記持kap使命。

　　推sak台語，保留母語…這阮tī 2013年無細膩踏--入-來ê箍仔，想想--leh，這敢m̄是人生ê過程內底真有意義ê代誌？替家己ê母語發聲，一份綿爛ê情感，敢袂hō͘阮家己感動--著？

　　是--lah，世界變化真緊。濟濟人lóng講愛雙語教育，講來講去就是無愛母語，嫌低路。是講，教育體制內資源敢著lóng著愛hō華語kap英語大碗phâng--去？現此時，手機仔翻譯遐爾仔利便，敢有需要tī學校hē這資源？失去--ê才知寶惜。總--是，m̄是所有ê物件phàng見lóng khioh會轉--來。

　　順應國際ê趨勢、未來ê生存活命，才來斬斷母語路？這是啥款ê攔頭。過去，是殖民者ê獨裁；今，是個人ê無知。Tī人工智慧puh--出-來後，欠缺一寡人性，koh有記持kap情感，án-ne kap機器人有啥精差？

　　Kap囡仔講台語，家己ê語言應該是真自然ê代誌。今，甚至tī府城街仔路頂、一般菜市仔欲聽--著lóng真罕--得--ah，tī厝內mā無leh講。

　　囡仔tī上幼稚園了後，就家己學會曉華語。轉--來，家己sńg ê時mā會講華語，捌問阮為啥要求ài講台語…。這阮看--來m̄是一般多元語言社會會遇--著ê問題，是華語ê霸權。

　　按怎講--leh，就是無尊存家己ê母語--lah。有同學聽阮講台語，soah問阮是m̄是外國人？有hàm--無？老師有意無意，譬相台語kap排斥。按呢囡仔當然會khah無愛講母語--ah，這就是目前阮推sak母語上大ê困境——心態。

　　對民進黨執政來，確實，母語運動愈來愈有行氣。書寫民主化的確ài倚靠教育體制，民間ê推sak當然是袂當斷--ê。這幾冬，母語冊愈來愈濟，當然，kap華語koh袂比phēng--得，總--是，這有影是一个機會。阮嘛是綴時代，鼓舞家己出冊，向望家己會使為母語出力。

　　阮知影袂少家長lóng想欲kap囡仔講台語。是講，咱ài理解這是久長ê路途。這m̄-nā需要家長ê心態，koh有實際行動ê氣力。這m̄是輕可代，mā m̄是無可能ê事工。上基本ê行動，就是kap囡仔講故事，佗一个囡仔無佮意聽故事--leh？

　　編故事有時真頭疼，有時是阮趣味，ná編ná講ê過程，kap囡仔連結是會愈來愈絚。當時仔，阮mā想欲kā一寡教育ê觀念，做人ê態度hē--入-來，hō͘ in koh-khah早認捌這世界。這mā是阮做老爸ê不安kap神經質。

　　著--lah，這需要社會ê力量，m̄是阮個人niā-niā。

　　落尾，阮某無做工課了，暗頭仔囡仔就lóng khah倚--伊，阮相對編ê故事mā khah少--ah，mā真拍損。是講，這記持無全然是好--ê，尤其是阮人忝ê時，koh欲硬激頭殼想故事an-tah囡仔。

　　阮無確定阮ê故事好抑是bái，總--是，阮知影囡仔隔轉工koh會討欲聽。這是阮上大ê鼓勵。

　　今，重koh kā kap囡仔ê記持liū--一-擺koh有thang出冊，算是一種完滿ê儀式，mā是一種幸福。