傀儡山的動物傳奇

序

有臍就有才
序《台語親子囡仔古繪本套書》
總顧問/李勤岸 Lí Khîn-huānn

　　咱人 lóng 有肚臍，只是咱lóng kā 媽媽ê 連接 tī tńg 臍 ê 時鉸斷去。咱若 kā 母語 ê 肚臍鉸斷去，就會變做無臍 ê 人，變做無才 ê 人，無欶母語 ê 奶水，就會變做無才 ê 人。咱講一个人無才，就是講彼个人無正經，若小丑仔。

　　咱若自細漢就 kā 母語這條肚臍牽挽牢 leh，咱就會是一个有臍 ê 人，有才 ê 人。

　　咱這代 ê 囡仔講起來算真好運，出世 tī 母語復振開始 puh 穎發芽 ê 時代。有真濟母語 ê 囡仔古 thang 聽，有真濟母語復振 ê 人編寫 ê 繪本 thang 看。這套《台語親子囡仔古繪本》套書由張寶明老師策畫幾若冬，由鍾育紋kap 張寶明文字演出，陳俐璇、王佑琪 kap 吳佩純圖畫演出，鍾育紋、張寶明參與聲音演出。 In ê 合作演出，算是精彩絕倫 ê 一流演出。這套冊，hōo 咱 ê 後一代自細漢就有聽、看臺灣本土囡仔古尪仔冊 ê 福氣。In 5 个 lóng 是有台語臍 ê 人才，親子做伙來，有臍就有才。