啼印：台語文集

大格雞慢啼：序翁月鳳《啼印》 方耀乾
發現桃花源新地～月鳳新冊題序 黃良成
啼聲清朗含藏精緻音～
小序翁月鳳詩文集《啼印》 林央敏

第一單元 阿母的跤印
01.風吹
02.手指
03.露螺
04.紅包
05.秒針
06.氣話
07.武漢
08.新冠病毒
09.喙罨
10.隔離
11.出芽
12.鏡
13.思念
14.樹影
15.暝
16.造話
17.欲望
18.日出
19.金剛經
20.救護車出勤
21.日誌
22.虹
23.原諒
24.劇本
25.貪
26.笑容
27.閃電
28.蛇
29.囚
30.剷草
31.告別式

第二單元 旅途
32.收音機
33.夕陽
34.傷
35.失算
36.看伊寫的故事
37.阿里山咧唱育囡仔歌
38.毋通認輸
39.彼首點播的歌
40.初八彼一工
41.風颱
42.風咧吹
43.望
44.愛是勇氣的後頭厝
45.啼印
46.一蕊月光花
47.王徵吉—掛號
48.行入阿里山詩路
49.來去紫竹寺
50.回甘

第三單元 桃仔佮阿媽
01.散步
02.我的花園
03.溫柔的風
04.看無半隻
05.綴無著逝
06.球
07.迷
08.娘心
09.天清清
10.赤查某仔
11.元宵暝
12.生日卡片
13.一塊俗pháng
14.悶悶
15.我愛阿母
16.念念
17.思念入夢
18.臆畫
19.先見之明
20.砧

第四單元 月娘的曲盤
01.記持的剪綹仔
02.秋天的過路客
03.陪你向前行
04.有人叫我阿妹仔
05.考試心得

〔附錄〕翁月鳳作品著獎、發表記錄


 

推薦序

大格雞慢啼：序翁月鳳的《啼印》
方耀乾（國立台中教育大學台語文學系特聘教授，前系主任）

　　第一擺拄著月鳳應該是佇1999年，第六屆南瀛文學獎的頒獎典禮。彼時伊得著散文佳作，我得著詩類新人獎（規本台語詩集），毋過，阮無相借問，也無相捌。20冬後，我才漸漸聽著有一个作家叫做翁月鳳，用台語寫作，寫了袂䆀，閣定定著文學獎。這馬回想起來，若親像捌佇佗位佮伊見過面。果然無錯，是佇第六屆南瀛文學獎的頒獎典禮。2022年3月17日，伊透過Messenger講欲央我寫序，伊講欲將這幾冬寫的台語作品聚集做一本冊出版。我聽著真歡喜，真有緣分，就答應。共伊講：「先恭喜妳欲出冊。我最近足無閒，有困難。若寫短短仔，一頁，勉強會使。好無？」伊回講：「按呢足好啊，我的冊猶咧整理無遐快。」就按呢搭起這个緣分。

　　《啼印》雖罔是月鳳的第一本台語文集，毋過寫作手路無成生跤數。文字真端的，用詞充滿著感情和溫度，文章結構的處理真成熟。這本文集是詩和散文的合輯。主題主要是箍佇伊的生活和生活中的感觸和感動。第一輯是3逝詩，第二輯是現代詩，第三輯是伊的孫仔畫的圖和伊的配詩，第四輯是5 篇散文。

　　其中得著第七屆台文戰線文學獎台語現代詩頭等〈望〉寫了真出擢閣引人深思。書寫一位佇安養中心的老母，等無伊的囡仔來共看，彼種失落的心神，寫了真感人：

　　數念就是一枝鋤頭／仙掘攏掘無囝喝阿母的聲／眠床是我的船／目若瞌就出海／掖早前網未來／祈求平安，無風無湧／今仔日的我，已經／泅袂轉去昨昏的咱／厝內的鼎灶埕斗的日頭／熟似的厝邊兜／有發翼的攏放予伊去飛／想欲問風一句話：／兩蕊冬節的目睭，敢換有一粒中秋的月？

　　另一首是臺灣文學獎創作獎入圍的〈啼印〉，真有人情味，書寫小卒仔反抗大海翁的故事。這首詩的故事是來自2019年法國奧萊隆島（Oléron）村莊聖皮耶爾多萊隆（Saint-Pierre-d’Oléron）一件罕見的相告案件。根據《CNN》報導，有住戶講菲索（Corinne Fesseau）飼的一隻雞公莫里斯（Maurice）下早仔的啼叫聲實在是傷吵，因此起意欲告莫里斯，要求菲索予雞公安靜莫閣啼叫。佇雙方無共識之下，住戶指控莫里斯造成噪音污染，將伊告上法院。菲索為此展開抗爭，強調雞公是法國的象徵之一，而且是城鄉差距的代表性存在，所以你若到庄跤蹛就必須愛容忍雞啼，「我想欲保護法國所有的雞公」。菲索的舉動得著大力支持，大約有12萬人幫伊簽署網路連署書，希望莫里斯平安無事。菲索代表莫里斯出庭的時，現場閣有幾偌位帶雞公來支持。聖皮耶爾多萊隆鎮長蘇爾（Christophe Sueur）表示，農村的傳統聲音應該得著保護，「在這裡，我們可以聽到斑鳩的歌聲、海鷗的啼叫、拖拉機的轟轟聲，這也是我們島嶼美麗的原因。聲音非常重要，它是我們景觀魅力的一部分」：

　　雞啼，天欲光的通知／就可比春天覕花蕊／可比種子出芽殼弓開／攏是天地咧喘氣／日頭將跤步寄佇雞的喉管內／每一个透早，叫作穡人好起床／叫醒田園的翠綠，叫醒門窗的透明／雞啼，是鄉村上挑俍的標誌／山還山，溪還溪／自重是界址／一種失敗，號做欲望的褪殼／拗蠻的意志，袂堪得變大／一種勝利，號做傷痕的歡喜／揹十字架的尻脊／榮耀，一稜一稜／新制定的法律／保護了鄉村各種動物的聲音，包含氣味／保護了都市化對鄉村的威脅／被告變英雄，彼隻雞／有赤紅的雞髻，正義的聲腹／啼聲迵國際／樸實的鄉村／團結的村民，予聲音的景觀更加珍貴／有溫度的法律／像母愛。

　　這聲《啼印》是翁月鳳正義的呼聲，伊欲用台語講出台語是咱島嶼美麗的原因，是咱景觀魅力的一部分。