放毒

電機背景出身ê台文作家杜信龍，將近10冬ê文字粒積，向望透由走揣純正ê台語，將在地ê生活經驗、語言kap文化ê底蒂，對母語、對歷史ê不捨kap疼心，以及對社會時事、政治現實ê關心kap憤慨，化做一篇一篇節奏輕快、理路清楚ê短篇小說。伊ê作品，不時展現出科學訓練ê理性推論kap思考過程，一手是冷靜ê筆路，鋪寫對人性世事熱望理解ê劇情；一手是直破ê手路，chha̍k入殖民威權到taⁿiáu-bē退ê權力kap不義。
 
本冊收入短篇、極短篇小說總共12篇。有寫台灣對外面對中共ê大危機，對內有本土歷史kap政治牽kha̍p「轉型正義」ê纏絞，mā有關係人性、愛情、醫病關係ê勾畫kap探討，幼路細膩。籠面作〈放毒〉以武漢肺炎疫情做主題，發展一齣中共勢力浸透台灣，beh用查某窟設計飛行員，侵入空軍放病毒、偷軍事機密ê國防危機；〈審判〉、〈Saⁿ-kha-á〉探討白色恐怖受難者、政治犯後代kap加害者之間，需要啥mih款ê正義；〈PP基因新突變〉、〈走票〉、〈紅包lok仔〉，對政客ê面腔kap選舉文化有入骨ê觀察kap諷刺。情節精彩，束結有力。
 
◎本冊採用傳統白話字，漢羅用字參考《台文通訊BONG報》。
◎本作品榮獲國藝會出版獎助
 
名家推薦
 
蔣為文｜國立成功大學台灣文學系教授
Tēng-pang Suyaka Chiu（周定邦）｜台文作家、台灣唸歌kah恆春民謠傳承者
Lîm Jū-khái（林裕凱）｜台灣文學系助理教授、台語詩人、歌仔冊作家
 

作者簡介
 
杜信龍　Tō͘ Sìn-liông
 
1981年台南灣裡出世，2006年中央大學電機所碩士畢業。現此時，佇外商公司上班，無受過正式台語教育kap文學訓練。2013年6--月，ùi台北轉來府城，智覺厝內阿姊lóng講華語，造成kan-taⁿ會曉講台語ê老母壓迫。自按呢，家己開始學習寫台文、熟似台語人（台文筆會）、讀台語冊，欲kā台語khioh--轉-來。向望家己未來ē-sái為台語文學kap台語ê地位來phah-piàⁿ，走chhōe母語ê尊嚴。