方言歌2070：呂美親台語有聲詩集

名人推薦：【專文深情推薦】
吳易叡　成功大學全校不分系暨醫學系人社科合聘副教授
申惠豐　靜宜大學台灣文學系副教授兼系主任

Bâi-óo-lín無譜──寫予簡吉

彼條菅芒花開甲規片的石𥑮路
Tsín新厝起甲強欲上天
玻璃反射日頭光，轎車傱來踅去
沙，無閣phōng-phōng坱。
簡--è，你的鐵馬早就生鉎
綴打馬膠溶𠕇佇地面。
你用青春一針一針，紩入塗跤的網
Tann也破甲空空，賰夢。

總是簡--è，我若像猶有聽見
你的bâi-óo-lín，聊聊仔咧挨
挨出近代的曲頭，為欲
應接彼个，米糖相剋的時代

彼陣，bâi-óo-lín猶無譜。
註該成做一个農民運動者，簡--è，
你出世佇520事件日的八十外冬前
為著成人，向望農家子弟出頭
你認真稽古新的智識
總算徛起佇鳳山公學校的教室。
毋過做田囡仔煞一个一个跳課
講𪜶也無愛戇輸人
只是穡頭無做就無一工。

彼陣，bâi-óo-lín攏無譜。
你那挨那起造，才知病根出佇制度
你規氣共sia̋n-sé的外衫褪落來
鐵馬騎咧，對鳳山khau過高屏溪
管待伊日頭赤焱，管待伊月光暗淡
有時甘蔗欉搖搖擺擺，有時稻花金爍爍
彼陣，bâi-óo-lín猶攏無譜。
Tann是憂憂的琴聲咧流
講港都，哪會落無雨？

製糖會社的磅仔siunn輕
你的bâi-óo-lín沓沓有譜。
做穡人嘛愈來愈精tsông
綴無你的琴聲，也欲佮你四界運動
Bâi-óo-lín免三冬就掠著譜
20年代後半的台灣農民，變做樂隊
佇全島的農村，合聲、交響。

Bâi-óo-lín略仔有譜，總是簡--è，
暗暝無過去，閣一个暗暝罩落來
𪜶無分無會，取締你的琴刀
琴線tsiâu絞斷，琴箱佮監牢做伙關門
拄畫的譜hông舞甲挐tsháng-tsháng
散掖佇彼个，非情的馬場町。

總是簡--è，我若像閣有聽著
你的bâi-óo-lín，聊聊仔咧挨
親像你的鐵馬khau過高屏溪
暗暝，暗暝炤佇你的肩胛頭
彼片毋知咧唱歌抑是咧吼的
田園，已經拋荒。

後記：簡吉（1903.5.20-1951.3.7），高雄鳳山人。擔任1925年成立的鳳山農民組合組合長，紲閣組織全島性的台灣農民組合，𤆬領日本時代的台灣農民運動；在白色恐怖時代受掠，佇馬場町hông銃決。簡吉逐日為著農民走傱，tshīng-tsāi若轉來猶是bâi-óo-lín攑起來挨。人若共講忝甲欲死矣哪毋歇睏？伊就應，無挨我才會死。謹以此詩向簡吉致敬。

/////////////////////////////////

方言歌2070

已經毋是紮菜脯飯包去溪埔搬沙石的時代
（明仔載的氣力，機器人共你攢便便）
講一句家己的話，早就毋免閣罰一箍
（教台灣話算點鐘的，人間國寶汰會用得出價？）
庄裡上優秀的大學生嘛袂閣hông掠去
（「輕軌」的鐵枝路代替產業道路佇農村四界趖）
土地仝款遐爾狹，總是無人敢閣嫌台灣
（四面五路的帝國，對16世紀就輪流來相爭欲愛）

恩愛規百冬的枕頭沓沓有記持，線頂拍賣逐時欠貨
（科技進步，少年人失智講嘛有藥醫）
夜色的東門町無閣透風落雨，總是不時罩雺
（空氣汙染siunn嚴重，台北規市內攏崁蓋）
無力宣言的海翁，揹一身軀厚厚的重油泅入來港仔喙
（經濟佮國際攏咧戰爭，飛行機大船逐隻沉落外海）
食麵包、抹牛油的烏鶖，tsín逐不時飛轉來嘉南平原
（基改的物件佮塑化劑食久uân-ná會siān）
老樹落塗足久矣，向上天的新枝葉全全是進口兼加工過的
（無仝皮色的移民一睏來足濟，無人是正港的台灣人）

直直眠夢多元的蕃薯島，彩筆盒仔內煞賰一色
囡仔無閣叫爸母「ㄅㄚˇㄅㄚˊ」、「ㄇㄚˇㄇㄚˊ」
早起時的io-tsih-ián，用國際通用語huah精神口號
規大疊的補充教材，干焦賰一條「天烏烏，欲落雨……」
阿公阿媽早早就做仙矣，物資無缺少甲連破鼎攏愛回收
小可各樣的老師，偷偷仔提尪仔冊教囡仔唱彼條
古早古早，為著阻擋「兩岸服貿協議」簽訂的流行歌
「天色漸漸光，遮有一陣人，為著守護咱的夢，成做更加勇敢的人……」

2070年的某一日，全世界的新聞攏咧痟這層
講彼位有兩个查某囝的女性太空人
代先飛入去到百冬前猶無人發見的銀河系
伊用幾若款地球話共遐的外星人相借問
聽講其中一句是「Tsia̍h-pá-buē？」
超越光年的電報，真緊就佇地球所有的城市播送
蕃薯島的老歲仔，目屎大大粒lìn甲規塗跤
島上的少年人逐个to咧問彼啥意思
太空人閣特別錄影分張予咱這个世界的公民
予逐个驚疑的兩項代誌是
彼條銀河的水，哪會遮清？
所有的生物欲徙振動敢干焦靠念力？

百冬前的菜脯飯包，後來包裝甲媠tang-tang
嘛捌予濟濟國家痟一站。無kah幾時
人閣揈(hong)講會拍損健康，莫食較好
甕仔底臭殕的鹹物配猶未捀上桌
就予風颱掃了了。連環保車也艱苦tsē-kuà
做phun做肥的原料tann著閣物色
科學家開始研發「無差別廢物處理機」

幾百年來攏咧煩惱滅亡的小島，到tann
猶無沉落海底，仝款恬恬tshāi佇太平洋西南海邊
接收來自100冬比100冬閣較曠闊的新世界
佳哉！佳哉，暗暝的月光
猶原炤佇懸lòng-sòng、好骨路的玉山山脈
伊的身軀長躼躼，毋捌變換的線索
淡薄仔翠青，猶咧閃閃爍
風若共雲𤆬過來，會聽著輕輕仔咧牽亡的歌聲
袂輸咧唱講，彼條看起來遮爾清的銀河
檢采有時也會搪著透風落雨

備忘錄：濟濟詩句，是聯想自向陽〈阿爹的飯包〉、林宗源〈講一句罰一箍〉、柯旗化〈母親的悲願〉、林央敏〈毋通嫌台灣〉、陳明仁〈拍賣老台灣──東門町記事〉、李勤岸〈海翁宣言〉、胡民祥〈你莫去〉、路寒袖〈台北新故鄉〉、鄭兒玉〈台灣翠青〉、方耀乾〈阮阿母是太空人〉、滅火器楊大正〈島嶼天光〉等諸位先生的作品。

Bâi-óo-lín無譜──寫予簡吉

彼條菅芒花開甲規片的石𥑮路
Tsín新厝起甲強欲上天
玻璃反射日頭光，轎車傱來踅去
沙，無閣phōng-phōng坱。
簡--è，你的鐵馬早就生鉎
綴打馬膠溶𠕇佇地面。
你用青春一針一針，紩入塗跤的網
Tann也破甲空空，賰夢。

總是簡--è，我若像猶有聽見
你的bâi-óo-lín，聊聊仔咧挨
挨出近代的曲頭，為欲
應接彼个，米糖相剋的時代

彼陣，bâi-óo-lín猶無譜。
註該成做一个農民運動者，簡--è，
你出世佇520事件日的八十外冬前
為著成人，向望農家子弟出頭
你認真稽古新的智識
總算徛起佇鳳山公學校...

佇未來惜別，為著再會──我的台語有聲詩集《方言歌2070》

呂美親

2014年，猶佇日本讀博士班的熱人，得著濟濟師長鼓勵，尤其是作家林央敏先生佮前衛出版社林文欽先生的支持，就共家己對2000年以後發表的台語詩作整理做《落雨彼日》來出版。第二本詩集《方言歌2070》，無想著愛等到10冬後的2024年。

佇博士班的研究是台灣的世界語（Esperanto）運動。「台灣話」受著濟濟語文運動影響才致到今仔日的面貌，世界語佇過程中也扮演重要的角色，煞是上無予人注目著的線索。開真濟時間共這个缺角補起來，了才閣共視野搝轉來台語文學。踅一大輾了後，對語言、文學佮詩，檢采也有較無仝的想法ah。總是，也有無改換的，可比講，成做一个研究者，咱常在閣是「實感(si̍t-kám)」著這層的：這百冬來濟濟台灣前輩佇長期的拍拚佮忍受窘逐(khún-tio̍k)的中間，猶閣堅心向前，才予咱有現時的寫作空間佮氣力。

提著學位、轉來台灣了後，兩个囡仔接紲出世，咱也好運入來到大學成做教育工作者。新人佇研究佮教學上著投入真大的氣力，毋才頭殼內彼寡蟯蟯伸的創作蟲豸著共捒去壁邊，捒久，𪜶也強欲消無去ah。準講拄著仔猶會罔寫，毋過想欲共詩心搜轉來，有影是兩个囡仔予咱的力草。工課的關係，逐禮拜南北往復，陪伴囡仔的時間較少淡薄，總是定定感覺是囡仔咧看顧咱的性命。猶閣囡仔出世到今，咱佇厝內攏佮𪜶講台語（也捌予別的囡仔問咱是咧講佗一國的話），就希望也會當共這份詩心的禮物送予𪜶，成做𪜶後日仔若有一寡文藝抑是美學的表現彼時的淡薄滋養。咱嘛有小可的野望，若準這份禮物會當分張予閣較濟人，也是安慰的代誌。

講起來，10冬前的詩集，過頭沉重。遐濟冬過去，真希望家己對台語詩的書寫有無仝款的挑戰佮呈現，上無，較「輕」咧，輕輕仔媠，輕輕仔有歡喜。總是，彼寡「沉」佮「重」，若像掰袂齊(tsiâu)離，結局猶是用〈方言歌2070〉的詩題做冊名。檢采逐家隨有這款疑問：台語哪會是「方言」？按怎是2070？

1970年代，佇台灣作家猶罕得有母語意識的時，猶是大學生的詩人向陽開始發表一系列的台語詩，彼陣予人叫做「方言詩」。向陽佇1985年出版戰後頭一本全台語的詩集《土地的歌》，總是副標著加註「方言詩集」。準講台灣話予人降級，準講用台語寫作著愛忍受孤單閣受人譬相，有人開始共母語詩的火種點著(to̍h)的時，彼葩火穎，定著有一日會成做紅豔的日頭。

台灣社會的現代化進程到今一百外冬，毋過慢分的母語佮伊的文藝，若像這幾冬才看著小可紅豔的日頭佇天頂微微仔笑。1970年代的方言詩寫作，到2070年也大概一百年，離現此時欲倚50冬後的2070年，會變做按怎？定定咧想，會變做按怎？毋知。毋知。毋才想欲會抱惜別的心情，按未來看倒轉來，向望咱佮母語有閣較美好的再會。

《方言歌2070》，攏總分做六卷，也thang講是這10冬來，和家己的惜別佮再會。

卷一：「方言歌2070」。接紲《落雨彼日》對歷史、語言、記持的關心，所思慮的時空迒過百冬，嘛迒過國界。較希望的是用詩提供一寡直向的歷史視野佮橫向的國際角度，來佮當代的台灣社會、關係國內外的問題，講寡心內話。

卷二：「囡仔，想欲予恁愛」。台語的「予恁愛」，有「給予你們愛」、「被你們愛」的兩層意思。真濟爸母想欲予囡仔愛，煞毋知影按怎予𪜶，致使囡仔時常因為「愛」咧受傷，也就無法度佇心內去「愛爸母」，大漢了的「盡孝道」，煞變做沉重的束縛。淡薄仔說教的系列詩，也是家己學做人老母的記錄，向望未來感受著的是囡仔真實的愛。

卷三：「徙」。成長過程中，不時咧徙動。蹛過真濟所在，對所徛的環境有時無真了解，對一寡場景煞是真熟似，希望用詩簡單替客途的暫歇留寡記持。內面也有家己的成長、憤怒、疼惜佮著磨。講起來也無啥物值得三言兩語(sann-giân-nn̄g-gí，批評責備)，佳哉佇總算得著敨放了會智覺講，著向日頭彼爿遷徙。

卷四：「戥花」。收錄幾首台語歌詞的作品，共舊時佮現代的聲抾倚，希望佮現代的當代智識青年有較濟共鳴、共感、共勉的詩歌。其中的〈向望〉、〈心悶〉有編做歌，逐家QRcode “khiú”落，就會當聽。若是〈歸家〉、〈阿四〉、〈戥花〉幾首歌詞會收佇「鬥鬧熱走唱隊」賴和音樂專輯Ⅱ《自由花》，仝款是2024年發行，就無閣附朗讀檔，邀請讀者去揣歌來聽喔！

卷五：「我搪著你，佇1980」。學生時代寫袂少華語詩，特別是以愛情長詩來表現對社會人文的關懷的作品。也希望長詩的表現會當閣較運用佇台語詩，所以這个翻譯工課嘛是予家己的挑戰；語詞、文法以外，華語詩的「韻」，咱也有盡力用台語會得表現的「韻」來好好仔重共作品翻新。

卷六：「木瓜」。編高中台語教科書的時，捌翻譯江文瑜老師替慰安婦寫作的華語詩〈木瓜〉。這首長詩真斟酌語言的圖像性佮實驗性，尤其用濟濟諧音來表現暗意。〈絕命詩〉是白色恐怖受難者佇臨終前所寫的日文短歌，文體古典，詩意深遠。囥這兩首難度不止懸的譯詩，也thang準做是記念家己遮濟冬來的學習。

慣勢整理，就共寫作的時間表囥佇附錄，有趣味的朋友請罔參考。10冬過去，台灣社會確實閣較行進前一大步ah。咱的社會對母語有較正面的看待，總是，閣少年一輩的囡仔，檢采需要咱予𪜶較濟聲音的見本。為著按呢，幾首歌詞掠外，咱共所有的詩作錄音起來，真感謝我敬佩的劇場演員MCJJ盧志杰先生、我的牽手陳威志先生、我的囡仔厚潤（8歲半長男）、厚澤（6歲半次男）做伙獻聲，相信逐家佇𪜶的聲湧內面會得著大大的滿足。我家己嘛有僭權食寡聲，請逐家無棄嫌罔聽。咱是誠心欲用詩的聲音，邀請逐家做伙繼續走揣家己的「言靈」(giân-lîng)。

這本詩集的出版，感謝國藝會的助成，感謝所有評審委員的牽成。《方言歌2070》thang講是對向陽老師《土地的歌》的基礎繼續向前，佇遮欲藉機會共向陽老師，也是這屆國藝會的董事長林淇瀁先生致敬佮致謝。也再次感謝前衛林文欽社長的支持、主編鄭清鴻先生濟濟無私的幫贊。感謝佇《落雨彼日》就替咱寫推薦序的老朋友：成功大學全校不分系、醫學系人社科吳易叡副教授（嘛是咱「鬥鬧熱走唱隊」團長）、靜宜大學台灣文學系申惠豐副教授兼系主任，𪜶遮爾無閒煞是仝款遐爾疼惜，閣再賜序予《方言歌2070》。感謝「鑠行音樂」佇錄音佮混音過程中的盡力佮包涵。感謝諸位前輩、朋友佇文字、歌曲的授權。感謝阮「鬥鬧熱走唱隊」的成員予咱濟濟溫暖。所有共咱幫助、鼓勵的序大佮朋友，感謝厝內人，一直攏遮爾燒烙。

慢分的母語佮伊的文藝，佇2070年，會變做按怎？確實無人知影。我家己檢采干焦會當用這本《方言歌2070》去盡望，親像是徛佇未來惜別，為著佮咱的台語、咱的文藝，好好仔再相會。

2024.01.31
台南，大港寮仔

佇未來惜別，為著再會──我的台語有聲詩集《方言歌2070》

呂美親

2014年，猶佇日本讀博士班的熱人，得著濟濟師長鼓勵，尤其是作家林央敏先生佮前衛出版社林文欽先生的支持，就共家己對2000年以後發表的台語詩作整理做《落雨彼日》來出版。第二本詩集《方言歌2070》，無想著愛等到10冬後的2024年。

佇博士班的研究是台灣的世界語（Esperanto）運動。「台灣話」受著濟濟語文運動影響才致到今仔日的面貌，世界語佇過程中也扮演重要的角色，煞是上無予人注目著的線索。開真濟時間共這个缺角補起來，了才閣共視野搝轉來台語文學。踅一大...

序一｜寫詩作為文藝復興工程的推測設計──讀《方言歌2070》
◎吳易叡
序二｜母語詩歌的靈韵──讀《方言歌2070》
◎申惠豐
自序｜佇未來惜別，為著再會──我的台語有聲詩集《方言歌2070》
◎呂美親

卷一｜方言歌2070
Bâi-óo-lín無譜──寫予簡吉
透風，百合──獻予敬愛的張炎憲教授
一桿同志無秤仔──聽見懶雲
引揚天──記高雄港的一个下晡
樹空(いあん)―《記憶と生きる》觀後.
田野，倒轉來
囡仔問我關係Siā-huē Tsìng-gī的問題──記台灣人歡喜日本通過安保法案
方言歌2070
下半身
和緯路四段速寫
「我爸爸也會講你們這種話」
翠青的長尾山娘──寫予2024年台語詩選的修課學生

卷二｜囡仔，想欲予恁愛
囡仔，想欲予恁愛（01）：地圖
囡仔，想欲予恁愛（02）：時間
囡仔，想欲予恁愛（03）：日花
囡仔，想欲予恁愛（04）：鼓仔燈
囡仔，想欲予恁愛（05）：有時星光
囡仔，想欲予恁愛（06）：日誌紙
囡仔，想欲予恁愛（07）：金針花
囡仔，想欲予恁愛（08）：戀慕
囡仔，想欲予恁愛（09）：行跤花
囡仔，想欲予恁愛（10）：睏前禱詞十三逝
囡仔，想欲予恁愛（11）：原宥
囡仔，想欲予恁愛（12）：弟弟日時寄草
囡仔，想欲予恁愛（13）：投
囡仔，想欲予恁愛（14）：水拹仔
囡仔，想欲予恁愛（15）：度針
囡仔，想欲予恁愛（16）：有時媽媽
囡仔，想欲予恁愛（17）：北極星
囡仔，想欲予恁愛（18）：月光
囡仔，想欲予恁愛（19）：大港寮的紅霞
囡仔，想欲予恁愛（20）：做生日

卷三｜徙
祝婚詩
大理街速寫
廣州街速寫
病床想起
親像一欉猶咧大的樹仔
湧陵的詩
徙
心湧，三首
台南車頭彼蕊烏水烙的花

卷四｜戥花
向望
陷眠內的唱曲
心悶
阿四
歸家（1）
歸家（2）
戥花

卷五｜我搪著你，佇1980
流民的遺書
風中的遺書
予1947的戀人
我搪著你，佇1980
錯認的集體無意識──寫予捌停時的戰爭期
時代的大樹
砂漠，話劇──讀王育德
薰煙──記念林冠華
彼工，你無聲無說來離開

卷六｜木瓜
木瓜
絕命詩

附錄｜創作佮發表時間一覽

序一｜寫詩作為文藝復興工程的推測設計──讀《方言歌2070》
◎吳易叡
序二｜母語詩歌的靈韵──讀《方言歌2070》
◎申惠豐
自序｜佇未來惜別，為著再會──我的台語有聲詩集《方言歌2070》
◎呂美親

卷一｜方言歌2070
Bâi-óo-lín無譜──寫予簡吉
透風，百合──獻予敬愛的張炎憲教授
一桿同志無秤仔──聽見懶雲
引揚天──記高雄港的一个下晡
樹空(いあん)―《記憶と生きる》觀後.
田野，倒轉來
囡仔問我關係Siā-huē Tsìng-gī的問題──記台灣人歡喜日本通過安保法案
方言歌2070
下半身
和緯路四段速寫
「我爸爸也會講...