人生大轉踅：盧廣誠彎斡的台語路-FindBook 找書網 ISBN:9786267727829

圖書名稱：人生大轉踅：盧廣誠彎斡的台語路

50年代出世的台語紳士，彎來斡去的人生風景
寫予所有經過禁聲時代，猶原選擇行向母語的人
語言，就是咱欲送予後一代的等路

《人生大轉踅》是盧廣誠七十冬的人生故事，出世佇移民家庭，因為細漢的時致覺家己華語講袂順，伊開始大量閱讀、苦練發音，予伊未來佇廣播、教學領域有實腹的基礎。退伍了後，人生閣一擺大轉踅，自工程專業，插班考入淡江中文系，投入語言的世界。佇一擺機緣接觸台語教學，開始自學羅馬字，音韻、語法一項一項摸，研究臺灣華語按怎受台語影響，得著學界肯定。日後，推捒臺羅拼音、母語保存，靠對智識的熱情，替台語釘根。

咱會當綴作者的跤跡，行過早年環境的變遷。30年代老爸唐山過台灣，一家伙仔佇基隆發展；50年代因為反共的需要，招大專生做預官的制度；60年代美國佇台灣設立華語訓練中心──史丹福中心（IUP），90年代變做臺大國際華語研習所（ICLP），換頭人了後，職場文化的改變……伊用一个家族、一个人慢慢行過的路，替時代留聲。

作者簡介：

盧廣誠
淡江大學中文系
國立政治大學語言學研究所碩士班
擔任華語、台語教學工作二十餘年

教學與行政資歷：
美國各大學中國語文聯合研習所（史丹福華語中心）∕美國在臺協會華語學校∕政治大學華語中心∕臺灣大學國際華語研習所擔任過兼任講師、專任講師、教務主任、總務主任、所務主任

教學專長：
語言學∕語音學∕閩南語概論∕閩南語文學選讀∕閩南語語言與文化∕本土語言教材教法及閩南語會話

各項領域工作：
台語研究及教學工作∕國小台語教材編輯小組召集人∕編著台語詞典∕各地方及全國語文競賽閩南語演講、朗讀、字音字形比賽之評審、命題委員

各界推薦

名人推薦：【各界讚聲】
王秀容（台語文作家、公視台語台顧問）
王麒愷（阿愷之聲Podcast台長）
陳豐惠（公視台語台顧問）
黃震南（藏書家、文史研究者）
張瑞夫（萬秀洗衣店第三代、主持人）
鄭順聰（台文作家）
（按筆畫順序排列）

章節試閱

阮家族的根源

我是1952年出世的，佇世間已經活超過70年，我這世人有袂少佮一般人無啥仝款的性命歷程，可能有人會感覺心適，我想欲用一系列的短文，來佮有興趣的人交流。
頭起先欲來講阮家族是按怎會移民來臺灣的。照阮老爸的講法，阮兜佇廣東的白頭山是在地的大地主，田園厝地規大片。毋過俗語講，富袂過三代，佇阮阿公進前，錢銀就已經敗欲空矣，手頭干焦賰一寡田佮厝。阮阿公少年的時猶是阿舍，規工毋讀冊，上愛佮人拍拳頭，練功夫。
因為阮原本是地主，有土匪想講阮兜猶有錢通撚，有一工就共阮阿公掠去，叫阮阿祖愛提錢去共贖轉來。阮阿祖無地傱錢，當咧煩惱，阮阿公已經趁顧伊的人干焦賰兩个，用伊練過工夫的跤手，共彼兩个土匪拍甲毋知人，家己走倒轉來矣。
自按呢阮阿公成做白頭山的阿哥，受著兄弟的敬重。阮阿公規工跋筊、𨑨迌，無偌久，因為輸筊欠袂少數，阮兜的田、厝就攏抵押出去，生活愈來愈艱苦過。阮阿媽因為無錢通過日，開喙共阮阿公討生活費。阮阿公見笑轉受氣，出手拍阮阿媽。可憐一个營養不良的查某人就按呢帶傷，閣無錢通予先生看，無偌久就過身矣。
阮阿公感覺佇故鄉已經袂當生存，就決定欲過番去新加坡，看會當佇無人捌伊的所在重頭開始無。阮阿伯彼陣已經娶某生囝，伊嘛佮阮阿公仝款，若阿舍咧，自本就無咧做正經頭路。看老爸做伊走去新加坡，伊嘛有樣看樣，某囝放咧，嘛走去新加坡。
阮老爸原本去佇汕頭咧綴人學師仔做塗水，因為趁無食，就想欲綴老爸、大兄的跤步，嘛去新加坡揣出路。探聽了後才知影阮阿公、阿伯佇新加坡袂適應，已經閣走去臺灣矣。阮老爸聽人講臺灣的錢像鼎崁遐大，就決定欲來臺灣，看會當趁著錢，轉去白頭山，共阮阿公抵押出去的田、厝討倒轉來袂。
就按呢阮兜兩代人，佇日本時代，前後提中華民國的護照，申請來臺灣做外籍移工，搬徙來臺灣。
阮老爸拄來臺灣，捌去佇花蓮予人倩做包仔店的辛勞，因為工資無懸，就綴同鄉走去基隆做碼頭工人，看有通趁較濟錢無。尾仔阮老爸就佇基隆佮阮老母結婚，這就是我出世佇基隆的因由。阮老母是按怎會佮對廣東來的阮老爸結婚咧，後一篇我才來共逐家講阮老母　彼家伙仔是按怎來臺灣的。

阮阿舅

阮外公出海發生海難無閣轉來，阮阿舅就無閣讀冊，出社會做賣魚的生理。伊原本是擔擔四界去賣，後來就佇基隆的大菜市租一个擔仔位賣，生理愈來愈好，就開始做大賣。到尾仔毋但佇基隆賣，閣共漁貨配去中南部賣。
趁著錢了後，閣開始做魚仔加工的生理，買一間透天厝，樓頂做徛家，樓跤做工場，用較無好銷的魚仔拍魚漿做魚丸、thian-put-lá 銷去臺灣各地。有一段時間伊嘛佮人份炭空，毋過彼陣炭空已經無真好做，上尾彼部份並無趁著錢。
因為生理無閒，阮阿妗嘛愛佇菜市仔賣魚，囡仔的教育較無時間通管顧。阮表兄（阮阿舅的大漢後生）十四、五歲就草踏佇　(in)兜咧鬥做魚丸的查某囡仔，阮阿舅氣一下共送去讀關少年犯的學校，予伊蹛遐讀國中佮高中。畢業考牢大學才共放出來。因為無時間通管教囡仔，尾仔囡仔攏送去讀會當蹛校的私立學校。
阮阿舅因為全臺各地攏有生理，不時愛四界去巡頭看尾兼收數，佇嘉義就鬥著一个賣魚的查某人。彼个查某人家己袂生，有分一个查埔囡仔來飼。這層代誌本來阮阿妗攏毋知，毋過阮阿舅因為應酬濟，不時食酒醉，身體拍歹愛蹛院治療。醫生講伊的膽已經失效，愛手術割掉，需要蹛院一段時間。因為阮阿妗愛做生理，就希望阮老母會當去顧阮阿舅。阮老母共阮阿舅講：「我一家一業就顧袂去矣，哪有才調顧你。你叫阿綢來共你顧。」阿綢就是嘉義彼位阮阿舅的細姨。
阿綢來顧阮阿舅了後，阮阿妗佮阮阿舅冤甲足厲害，上尾無法度嘛著接受。阮阿舅出院了後，安排阿綢佇阮阿妗的對面閣排一擔賣魚仔、魚丸。兩个大某細姨佇菜市仔隔一條街咧做仝款生理，定定那做生理那相罵。阿綢𠢕做人，手腕好，生理加足交易。伊秤魚丸的時攏先提無夠，上磅仔了後才閣添甲到予人客，人客攏感覺伊有加添一寡。阮阿妗攏會提較加去秤，上磅仔才閣提幾粒仔出來，人客攏感覺予人偏去，所以攏較愛共阿綢買。
大某細姨兩个人原本冤甲足厲害，想袂到食老了後，阮阿妗身體無好，煞著靠較少年的阿綢來照顧伊。彼時陣(in)兩个蹛頂下層，阿綢一个愛顧阮阿舅佮阿妗，嘛是足忝。到上尾阮阿妗先過身，過無幾年阿綢嘛去做神，干焦賰阮阿舅活到九十幾歲。阮阿舅佇基隆有足濟間店面咧收厝稅，伊過往的時，阮去參加伊的喪禮，竟然攏無啥物人來拈香。阮表兄嘛無出現，聽講　(in)兄弟仔為著財產的分配嘛咧冤家。看起來放傷濟財產予序細，嘛無定著逐家就攏會足快樂。佳哉阮彼幾个表兄弟仔逐家攏真有出脫，有一个對銀行退休，兩个是高職等的公務人員退休，一个咧做會計師兼股票分析師。

顯示全部內容

家族的根源
阮家族的根源
阮老母的根源
阮爸母
阮阿公佮阿伯
我做囡仔的時
阮阿姊
阮阿兄
阮阿舅
阮阿姨
阮叔公
阮阿妗

我讀冊的時
入學做學生
讀初中的心適代
升學無順讀五專
歇熱趁所費
成功嶺的涼佮熱
上尾的歇熱

我做兵的時
工兵學校甘苦談
抽著金馬獎
透暝拍磅空
退伍前的見笑代
對監工到測量

考牢插班做大學生
翻頭閣做大學生
顧暝趁學費
世間敢有鬼
同學真無仝
老師百百款
毋是乖學生

出業閣再入社會
達成當初的願望
失敗的投資
快樂換跑道
奢颺的歲月
對期待到失望

想欲翻身煞踢...

顯示全部內容