好話一牛車——臺灣勸世四句聯 (電子書)

——國立成功大學醫學院附設醫院前院長楊俊佑

自序

　　<一>

　　林家世居佇山內，落地生根無求財。
　　雖然環境有較䆀，文化延續對遮來。
　　仙化筆名叫若龍，蹛佇臺南龍崎鄉。
　　推廣臺語有方向，無啥讀冊好參詳。
　　細漢行路來讀冊，毋是�崎著遼溪。
　　攏褪赤跤無穿鞋，出門著愛認跤蹄。
　　過溝著愛行竹橋，溪埔沙是有夠燒。
　　拄著吊橋足�遙，囡仔驚甲攏疶尿。
　　畢業轉來燒火碳，窯內流汗外面寒。
　　爸囝拍拼為飯碗，感冒草頭薅來煎。
　　山頂無電點燈火，暗時寫字目睭花。
　　大人做啥攏愛綴，竹編雙手攏㨨皮。
　　自細趣味是畫圖，揣無師傅無敝步。
　　只好塗跤做畫布，無筆著用火炭箍。
　　退伍油漆做學徒，放去鋤頭揣出路。
　　色料滒甲規條褲，較贏做穡鼻田塗。

　　<二>
　　
　　油漆工課誠大堆，有時塔架夯樓梯。
　　�懸�低畫山水，主家看甲喙開開。
　　早期篾器做竹編，竹扇頂頭寫惜緣。
　　囡仔拍蠓頭頏頏，阿公攑咧練話仙。
　　丹青和我蓋有緣，無師自通自苦練。
　　全國巡迴去表演，互相交流種福田。
　　首創彩畫佇竹編，放棄青春佮少年。
　　各展聯展數十遍，鄉土歌詩意綿綿。
　　臺灣鄉土四句聯，是我多年的苦練。
　　為著傳承寫文獻，留予後輩青少年。
　　臺語複雜真無辜，只好參考教育部。
　　向望先賢相照顧，互相討論求進步。
　　好言好語寫規部，攏是勸善批評無。
　　看了互相鬥相報，家庭美滿萬事和。
　　母語種子著愛掖，推出好話一牛車。
　　費盡心思落去寫，伴手送禮毋免賒。