章節試閱
◎
Pe̍h-ōe-jī ê lī-ek
Ia̍p Hàn-chiong
(thâu-chêng kiám-séng)
Lūn chòe Pe̍h-ōe-jī ê iàu-kín
Taⁿ khí-thâu chòe chit-ê Pe̍h-ōe-jī ê, i-ê ì-sù sī cháiⁿ-iūⁿ ah? Chiū-sī beh hō͘ lâng khoài-bat, só͘-í chí ēng jī-cha̍p-saⁿ ê jī-bú nā-tiāⁿ, chiū-sī a, b, ch, chh, e, g, h, i, j, k, kh, l, m, n, ng, o, o͘, p, ph, s, t, th, u; che sī beh hō͘ lâng khoài jīn. Koh tī jī-cha̍p-saⁿ ê jī-bú ê tiong-kan ū hun-pia̍t tûn-im, khí-im, chi̍h-im, âu-im, phīⁿ-im ê koh-iūⁿ; chhin-chhiūⁿ b, p, ph, u, sī tûn-im; ch, chh, g, k, kh, s sī khí-im; h, i, j, l, t, th sī chi̍h-im; o, o͘, e, sī âu-im; m, n, ng, sī phīⁿ-im; che sī beh hō͘ lâng tha̍k-liáu ōe hun-bêng. (Khòaⁿ 1 Ko-lîm-to 14:9)
Koh ū ēng pat-im chòe kì-hō, lâi hun-pia̍t piâⁿ-cheh, hō͘ lâng khui-chhùi chiū ū koâiⁿ-kē tāng-khin ê chhù-sū, m̄-sái hūn-loān. Koh ēng chhiat-im chòe hoat-tō͘ lâi tàu chiâⁿ jī, ū-ê nn̄g-jī tàu chiâⁿ chi̍t-jī, ū ê saⁿ-sì-jī gō͘-jī tàu chi̍t-jī, che sī beh hō͘ lâng khoài tha̍k. Chóng-sī jī-bú sui-jiân chió, nā ēng i pâi-lia̍t saⁿ-tàu, chiū ū chhian-piàn bān-hòa ēng lóng bōe liáu. Che sī thâu-sū, ē-bīn pâi-lia̍t gō͘-tōaⁿ tāi-lio̍k lâi gī-lūn.
Tē-it-tōaⁿ
Lūn tha̍k Pe̍h-ōe-jī khah-iâⁿ tha̍k Tiong-kok jī, chiū-sī khoài tha̍k, koh m̄-sái lēng-gōa kóe-seh; in-ūi Tiong-kok jī put-chí chōe, kóe-seh put-chí oh; khe-khó Khong-hi jī-tián ê jī bōe sǹg-tit, chi̍t-jī siông-siông ū kúi-nā hō kóe-seh. Gín-á tùi chhit-poeh hè ji̍p-o̍h, tio̍h tha̍k-chheh kàu chhit poeh nî, cha̍p-lâng tiong chhang-miâ-ê kiám-chhái ū chi̍t-nn̄g lâng tāi-khài ōe bat khah-chhián ê jī, chí ū bat jī-im nā-tiāⁿ, lóng bōe hiáu-tit kóe-seh; tio̍h koh tha̍k cha̍p-gōa nî chiah ōe kóe-seh. Kiám-chhái só͘ kóe ū sî ia̍h ōe chhò-gō͘, oh-tit ta̍k-jī ta̍k-kù hun-bêng, che m̄-sī Tiong-kok jī ê m̄-hó, to̍k-to̍k sī in-ūi ha̍k-būn ê oh-tit cheng-kong, koh kóe-seh bōe it-tēng ê iân-kò͘.
Taⁿ tāi-lio̍k kú-khí chi̍t-nn̄g jī chòe pîn-kù. Chhin-chhiūⁿ kò͘--jī, ū só͘-chāi kóe chòe iân-kò͘, ū só͘-chāi kóe chòe pún-jiân, ū só͘-chāi kóe chòe só͘-í. Koh chhin-chhiūⁿ í--jī, ū só͘-chāi kóe chòe ēng, ū só͘-chāi kóe chòe thang, ū só͘-chāi kóe chòe in-ūi. M̄-nā án-ni, iáu ū chōe-chōe oh-tit kóe ê jī, sui-jiân chiū phok-ha̍k ê lâng ia̍h bōe-ōe ta̍k jī kóe-seh kàu bêng. Khòaⁿ Bo̍k-su ū sî chhiáⁿ Siù-châi lâi kà Sèng-chheh, ia̍h bat kóe-seh m̄-tio̍h, m̄-sī in-ūi i m̄-bat jī, á-sī bōe hiáu--tit kóe-seh, to̍k-to̍k sī in-ūi jī-gī ê kóe-seh bōe ōe it-tēng ê iân-kò͘. Taⁿ hit-hō ū ha̍k-būn ê lâng siōng-chhiáⁿ bōe-ōe kóe-seh kàu tú-hó, hô-hòng chhián-ha̍k ê lâng thài-thó ōe kóe-seh Sèng-chheh kàu bô chhò-gō͘ ah? Nā bōe-ōe kóe-seh Sèng-chheh, beh thái ōe bêng-pe̍k tō-lí ah? Só͘-í ū sim siat-kàu ê lâng ài thoân tō-lí tī ta̍k-kok, tek-khak tio̍h chiong Sèng-chheh hoan-e̍k hit só͘-chāi ê jī kàu bêng, hō͘ lâng thang tha̍k.
Chóng-sī Tiong-kok jī put-chí oh-tit kóe-seh, só͘-í chiah chòe chit-ê Pe̍h-ōe-jī hō͘ lóng-chóng ê lâng thang o̍h; koh chiong Sèng-chheh kap ta̍k-hō ê chheh hoan-e̍k Pe̍h-ōe-jī, hō͘ bat Pe̍h-ōe-jī ê lâng thang ka-kī tha̍k, ka-kī káng-kiù chheh-lāi ê tō-lí. Siat-sú bô chit hō Pe̍h-ōe-jī, chiū put-chí chió lâng ōe hiáu-tit tha̍k Sèng-chheh. Che sī hián-bêng tha̍k Pe̍h-ōe-jī ū khah-iâⁿ tha̍k Tiong-kok jī.
Tē-jī-tōaⁿ
Lūn siá Pe̍h-ōe-jī khah-iâⁿ siá Tiong-kok jī, chiū-sī khoài siá, koh ta̍k-jī ū jī thang-siá, in-ūi Tiong-kok jī put-chí oh-siá, chhián-ha̍k ê lâng bōe-hiáu-tit siá khah-chhim ê jī, ia̍h lóng bōe-hiáu-tit siá phoe; siat-sú ū sî siá phoe, kî-tiong siông ēng thó͘-jī, lóng bô kóe-seh, hō͘ khòaⁿ phoe ê lâng bōe bêng i ê ì-sù, chiū ōe chhò-gō͘, nā-sī phok-ha̍k ê lâng siá-phoe, khah siông sī ēng chhim ê jī-gán, hō͘ lâng khòaⁿ-liáu lóng bōe hiáu-tit, m̄ ta̍t-tio̍h siá Pe̍h-ōe-jī ê phoe, ta̍k-kù hun-bêng lóng bōe chhò-gō͘, ia̍h-sī khoài siá, lâng nā o̍h siá, kiám-chhái chi̍t-ge̍h-ji̍t, kiám-chhái kúi-nā ge̍h-ji̍t, put-lūn ta-po͘-lâng, hū-jîn-lâng, í-ki̍p gín-á, lóng-chóng ōe-hiáu-tit siá phoe, koh só͘-siá ta̍k-kù hun-bêng, hō͘ khòaⁿ phoe ê lâng it-chīn ōe-hiáu-tit i ê sū, bián-tit chhò-gō͘.
Lūn kàu kì-siàu, ia̍h sī án-ni, in-ūi Tiong-kok-jī ū chōe-chōe bô jī thang siá, ū-sî tio̍h chioh-ēng pa̍t ê jī lâi thòe i, phì-jū lâng-miâ, ū-ê bô jī thang-siá, nā chioh-ēng pa̍t ê jī, to̍k-to̍k siá ê lâng ka-kī chai, pa̍t-lâng khòaⁿ liáu chiū bōe hiáu-tit, m̄-chai sī chí sím-mi̍h lâng, siat-sú ēng Pe̍h-ōe-jī lâi siá, chiū m̄-sái chioh-ēng, in-ūi lóng ū jī thang siá, ia̍h hō͘ khòaⁿ ê lâng m̄-sái chhò-gō͘, che sī siá Pe̍h-ōe-jī khah-iâⁿ siá Tiong-kok-jī sī bêng.
Ū lâng kóng, tek-khak khah-su Tiong-kok-jī, in-ūi Tiong-kok-jī ōe thong-hêng tī Tiong-kok cha̍p-poeh-séng, kap Ji̍t-pún, An-lâm, Ko-lê, Liû-khiû chiah ê kok, Pe̍h-ōe-jī put-kò sī Chiang-choân nn̄g-hú ōe ēng-tit nā-tiāⁿ, kàu khah-hn̄g ê só͘-chāi im-gú put siong-tông chiū bōe ēng--tit, cháiⁿ-iūⁿ kóng khah-iâⁿ Tiong-kok-jī-ah? Án-ni-siⁿ, sī chhin-chhiūⁿ ēng sió-niá lâi pí tōa-soaⁿ, ēng kau-lâu lâi pí tōa-hái, sī put-chí chhò-gō͘.
Chiū beh ìn-i kóng, m̄-sī án-ni, só͘ kóng ê khah-iâⁿ, m̄-sī in-ūi thong-hêng, sī in-ūi ha̍p-ēng nā-tiāⁿ, in-ūi chit-ê Pe̍h-ōe-jī m̄-sī lóng-chóng lâng thong-hêng ê lō͘-ēng, to̍k-to̍k sī chòe kóe-seh Sèng-chheh bô-chhò ê lō͘-ēng, kóe-seh Tiong-kok-jī ê Sèng-chheh siông-siông ū kóe m̄-tio̍h, án-ni chiū kiaⁿ-liáu ōe chhò-gō͘ tō-lí, in-ūi Tiong-kok-jī bōe-ōe ta̍k-jī tiāⁿ-tio̍h ê kóe-seh, siat-sú Sèng-chheh nā chi̍t-jī ê chhò-gō͘, chiū kiaⁿ-liáu ná-kú ná-chhò, kūn nā chha hô-lí, hn̄g chiū chha chheng-lí, (khòaⁿ 2 Pí-tek 3:16) siat-sú chiong Sèng-chheh it-khài hoan-e̍k Pe̍h-ōe-jī, chū-jiân chi̍t-jī ia̍h-bōe chhò, hō͘ tha̍k ê lâng sim bêng tō-lí, chiū bô-m̄ thong-ta̍t.
(tiong-ng kiám-séng)
Tē-saⁿ-tōaⁿ
Lūn Pe̍h-ōe-jī tōa lī-ek tī ū ha̍k-būn ê lâng, í-ki̍p chèng-lâng, chiū-sī hō͘ ū ha̍k-būn ê lâng thang chiong Sèng-chheh hoan-e̍k thó͘-im chòe chù, kap hoan-e̍k ta̍k-hō ê khoàn-sè-bûn, lâi kà-sī ta̍k-hō ê lâng, chóng-sī hit-ê ū ha̍k-būn ê lâng beh kà-sī lâng, iàu-kín tio̍h in-jîn jî-si, hit-ê pêng-sò͘ ū tha̍k Tiong-kok chheh ê lâng, chiū chiàu i só͘-bat ê chhián chhim lâi kà-sī i, hit-ê pêng-sò͘ bô tha̍k Tiong-kok chheh ê lâng, kap hū-jîn-lâng gín-á, pí ū tha̍k-chheh ê lâng ke kúi-nā-cha̍p pē, siat-sú it-khài ēng Tiong-kok jī lâi kà-sī i, kàu-bé oh-tit chiâⁿ, tio̍h ēng Pe̍h-ōe-jī kà i; ǹg-bāng lóng-chóng ōe-chiâⁿ, bêng-pe̍k tō-lí sìn Kiù-chú lâi tit-tio̍h kiù.
(tiong-ng kiám-séng)
Góa ū chi̍t-ê ti-kí ê pêng-iú, sī chòe Bo̍k-su, i chêng-nî ū tit-tio̍h chi̍t-pún sin-bûn, kì-chài chi̍t-ê ū hàu ê cha-bó͘-kiáⁿ kám-kek i-ê lāu-pē ê tāi-chì, siông-sè tha̍k chit-pún chheh put-chí ū ì-sù, chiū chhiáⁿ chi̍t-nn̄g ê tâng-im ê hiaⁿ-tī saⁿ-kap tha̍k, ta̍k-lâng ê sim bô m̄ siū i-ê kám-kek, sòe-jī siūⁿ nā ōe khek ìn-pán, ìn sàng lâng khòaⁿ, bô lūn kàu-lāi kàu-gōa, tek-khak ū lī-ek, chóng-sī chheh-lāi jī-gī iáu-chhim, kî-tiong ū chōe-chōe oh-tit kóe, bô ta-ôa chhiáⁿ pàng-hē-teh.
Kàu kū-nî i ū koh tha̍k Pe̍h-ōe-jī ê sin-bûn cha̍p-lio̍k, kî-tiong ū kì-chài Le̍k-sī-ka ê tāi-chì, sim-koaⁿ put-chí him-bō͘, hut-jiân siūⁿ-tio̍h chit-pún sin-bûn kap Le̍k-sī-ka chha-put-to, chiū chiong chit-pún chheh hoan-e̍k Pe̍h-ōe-jī, sàng kau Táⁿ-má-jī Sian-siⁿ ìn chiâⁿ chheh, ǹg-bāng hō͘ lâng tha̍k ia̍h ōe siū kám-kek, che sī it-hoat hián-bêng Pe̍h-ōe-jī tōa lī-ek tī ū ha̍k-būn ê lâng, í-ki̍p chèng-lâng.
Tē-sì-tōaⁿ
Lūn lâng iàu-kín tio̍h tha̍k Pe̍h-ōe-jī, taⁿ téng-bīn í-keng gī-lūn ê tōa ū lī-ek, chhin-chhiūⁿ án-ni, chiū bô-lūn lâm-hū ló-iù lóng-chóng tio̍h un-khûn lâi o̍h kàu se̍k, kàu ōe-hiáu-tit káng-kiù tō-lí, chiū pún-sin thang tit-tio̍h lī-ek, ia̍h-thang lī-ek pa̍t-lâng; m̄-nā ta-po͘-lâng nā-tiāⁿ, chiū hū-jîn-lâng lâi-o̍h ia̍h-thang kà-sī i ê kiáⁿ-jî. In-ūi hū-jîn-lâng beh tha̍k Tiong-kok ê jī kàu ōe kà-sī lâng, sī put-chí oh; siat-sú ū lâng ōe, ia̍h-sī khah chhián ê chheh nā-tiāⁿ, nā tha̍k Pe̍h-ōe-jī kàu cheng-kong, chiū-ōe kà-sī lâng tha̍k ta̍k-hō ê chheh.
Khe-khó Se-kok ê hū-jîn-lâng khah-chōe ū tha̍k-chheh, lóng ōe kà-sī i-ê kiáⁿ-jî, bián-hùi i-ê tiōng-hu ê sim-sîn, hō͘ i-ê tiōng-hu thang liāu-lí gōa-bīn ê tāi-chì; khó-kiàn hū-jîn-lâng tha̍k-chheh chin ū lī-ek. Chóng-sī hū-jîn-lâng tha̍k Tiong-kok-jī put-chí oh-tit sêng-kong, in-ūi jī put-chí chōe; nā-sī tha̍k Pe̍h-ōe-jī, chiū bô-m̄-chiâⁿ, in-ūi i-ê jī put-chí chió, koh khoài-tha̍k ê iân-kò͘.
(tiong-ng kiám-séng)
to̍k-to̍k bô-siūⁿ tha̍k Tiong-kok-jī tio̍h-ēng cha̍p-gōa-nî ê kang-hu, siat-sú tha̍k Pe̍h-ōe-jī nā kam-goān chhin-chhiūⁿ tha̍k Tiong-kok-jī cha̍p-hūn chi̍t-hūn ê tio̍h-bôa, tek-khak ōe khah-iâⁿ tha̍k Tiong-kok-jī ê se̍k.
Bat khòaⁿ-kìⁿ Se-kok ê Bo̍k-su teh tha̍k Pe̍h-ōe-jī pí tha̍k Tiong-kok-jī khah-se̍k, khah chiâⁿ-kù, in-ūi tha̍k Se-kok-jī koàiⁿ-sì, koh Tiong-kok-jī put-chí-chōe, ia̍h oh-tit kóe-seh, Pe̍h-ōe-jī put-chí-chió, ia̍h m̄-sái lēng-gōa kóe-seh. Koh tha̍k Tiong-kok-jī m̄-nā oh hiáu-tit kóe-seh, ia̍h oh bêng tō-lí, m̄ ta̍t-tio̍h tha̍k Pe̍h-ōe-jī ê khoài, ōe hiáu-tit khoài bêng tō-lí; só͘-í lâng-lâng iàu-kín tio̍h liû-sim un-khûn tha̍k Pe̍h-ōe-jī.
Tē-gō͘-tōaⁿ
Lūn tha̍k Pe̍h-ōe-jī ê hoat-tō͘. Taⁿ lâng nā beh o̍h ta̍k-hāng ê tāi-chì, tek-khak tio̍h tāi-seng bêng i-ê hoat-tō͘, o̍h-liáu chiah ōe chiâⁿ, bô tit-tio̍h hoat-tō͘--ê, sui-jiân ài-o̍h, kàu-bé ia̍h oh-tit chiâⁿ.
Chhin-chhiūⁿ án-ni, lâng beh tha̍k Pe̍h-ōe-jī, kap siá Pe̍h-ōe-jī, iàu-kín tio̍h tāi-seng bêng hit-ê hoat-tō͘, khòaⁿ thâu-sū só͘-lūn chit-ê Pe̍h-ōe-jī ê iàu-kín; sui-jiân sī put-chí kán, chóng-sī kî-tiong ū ún-bî ê hoat-tō͘, lán m̄-thang khòaⁿ-khin; iàu-kín tio̍h sòe-jī káng-kiù kàu bêng, jiân-āu ha̍k-si̍p, chiah ǹg-bāng ōe cheng-kong.
Taⁿ ū sì-hāng pâi-lia̍t tī ē-tóe. Tē-it-hāng, tio̍h jīn-bêng jī-bú. Tē-jī-hāng, tio̍h hun-pia̍t pat-im, thâu-im bô kì-hō; tē-jī-im, ēng chi̍t-phoat chòe kì-hō, chhin-chhiūⁿ “ ′ ” ; tē-saⁿ-im, ēng chi̍t-thoa chòe kì-hō, chhin-chhiūⁿ “ ‵ ” ; tē-sì-im, ēng sì-jī hē tī bé-jī chòe kì-hō, chiū-sī h, k, p, t; tē-gō͘-im, ēng jîn--jī chòe kì-hō, chhin-chhiūⁿ “ ^ ” ; tē-la̍k-im sī kap tē-jī-im saⁿ-tâng; tē-chhit-im, ēng chi̍t-u̍ih chòe kì-hō, chhin-chhiūⁿ “ - ”; tē poeh-im, ēng chhin-chhiūⁿ tē-sì-im, koh ke chi̍t-kiā chòe kì-hō, chhin-chhiūⁿ “ | ”. Taⁿ chit-ê tē-jī-hāng, miâ sui-bóng ū pat-im si̍t-chāi nā ū chhit-im nā-tiāⁿ, in-ūi tē-jī kap tē-la̍k nn̄g-im saⁿ-tâng. Tē-saⁿ-hāng sī saⁿ-tàu ê kì-hō, khí-thâu ēng nn̄g-jī tàu-chòe chi̍t-jī, kiám-chhái ēng saⁿ, sì, gō͘ jī tàu-chòe chi̍t-jī ia̍h-ū, chóng-sī lâng tio̍h jīn-sek, khòaⁿ bó͘-jī tàu bó͘-jī sī sím-mi̍h jī, chi̍t-ē khòaⁿ-kìⁿ chiū ōe jīn-tit, lóng bián-ēng chhiat-im lâi ho͘. Tio̍h o̍h kàu án-ni, chiah-thang sǹg sī bat Pe̍h-ōe-jī ê lâng. Tē-sì-hāng, sī tio̍h-bêng ta̍k-hō ê kì-hō, in-ūi ū khí-kù kap lâng-miâ tōe-hō-miâ ê kì-hō, lóng tio̍h-ēng tōa-pún ê jī hē-tī thâu-jī lâi hun-pia̍t i. Koh ū kàu-kù bē kàu-chat, sī ēng chi̍t-tiám koah ū thoa-bé chòe kì-hō, chhin-chhiūⁿ “ , ” koh ū kàu-chat iáu-bē kóng bêng-pe̍k i-ê tāi-chì--ê, sī ēng téng-bīn chi̍t-tiám, ē-bīn chi̍t-tiám koah ū thoa-bé chòe kì-hō, chhin-chhiūⁿ “ ; ” ; koh ū kàu-chat í-keng kóng bêng-pe̍k i-ê tāi-chì--ê, sī-ēng chi̍t îⁿ-tiám chòe kì-hō, chhin-chhiūⁿ
“ . ” ; koh ū saⁿ-liân-kù put-lūn nn̄g-jī á-sī saⁿ-jī, sī ēng chi̍t-u̍ih tī tiong-ng chòe kì-hō, chhin-chhiūⁿ “ -” ; koh ū ōe-bé, sī ēng nn̄g sió-u̍ih hē tī bé-jī ê tiong-ng chòe kì-hō, chhin-chhiūⁿ “ -- ” ; koh ū mn̄g-ê kì-hō, sī ēng chi̍t-oan-khiā, ē-bīn ke chi̍t-tiám chòe kì-hō, chhin-chhiūⁿ “ ? ” ; koh ū kî-khoài kap thó͘-khùi, sī ēng chi̍t ti̍t-khiā, ē-bīn ke chi̍t-tiám chòe kì-hō, chhin-chhiūⁿ “ ! ” ; koh ū ín sèng-chheh [á-sī pa̍t-hō ê chheh] ê ōe, thâu ēng nn̄g-tiám koah thoa-bé kau-khí, bé-bīn ēng nn̄g-tiám koah thoa-bé kau-lo̍h chòe kì-hō, chhin-chhiūⁿ “ ” . Taⁿ lâng nā chit-ê hoat-tō͘ liû-sim khì-o̍h, chai cháiⁿ-iūⁿ tio̍h-khí, cháiⁿ-iūⁿ tio̍h-soah, ū jī tio̍h tha̍k khah-tāng, ū jī tio̍h tha̍k khah-khin, tha̍k-kàu se̍k-se̍k, chiū tha̍k chit-ê Pe̍h-ōe-jī pí tha̍k Tiong-kok-jī khah hó-thiaⁿ, ì-sù ia̍h khah khoài-bêng.
Lūn kàu siá-jī ia̍h sī án-ni, tùi án-ni khòaⁿ, Pe̍h-ōe-jī si̍t-chāi ū tōa lī-ek, lán kiám m̄-tio̍h tùi-tiōng liû-sim lâi-o̍h mah?
◆Ia̍p Hàn-chiong. 1885 (Kong-sū XI). Pe̍h-ōe-jī ê lī-ek. Tâi-oân-hú-siâⁿ Kàu-hōe-pò, 7 goe̍h (6 goe̍h), tē 1 tiuⁿ, pp.2-3; 8 goe̍h (7 goe̍h), tē 2 tiuⁿ, pp.6-7; 9 goe̍h (8 goe̍h), tē 3 tiuⁿ, pp.10-12.
◎
Pe̍h-ōe-jī ê lī-ek
Ia̍p Hàn-chiong
(thâu-chêng kiám-séng)
Lūn chòe Pe̍h-ōe-jī ê iàu-kín
Taⁿ khí-thâu chòe chit-ê Pe̍h-ōe-jī ê, i-ê ì-sù sī cháiⁿ-iūⁿ ah? Chiū-sī beh hō͘ lâng khoài-bat, só͘-í chí ēng jī-cha̍p-saⁿ ê jī-bú nā-tiāⁿ, chiū-sī a, b, ch, chh, e, g, h, i, j, k, kh, l, m, n, ng, o, o͘, p, ph, s, t, th, u; che sī beh hō͘ lâng khoài jīn. Koh tī jī-cha̍p-saⁿ ê jī-bú ê tiong-kan ū hun-pia̍t tûn-im, khí-im, chi̍h-im, âu-im, phīⁿ-im ê koh-iūⁿ; chhin-chhiūⁿ b, p, ph, u, sī tûn-im; ch, ch...
博客來
TAAZE 讀冊生活
金石堂
三民網路書店
誠品網路書店
