1984 台文版

(考慮著網頁顯示，預防亂碼，少數字有調整。)

I-1

4月一个寒凊好天ê日子，時鐘霆13點，Winston Smith共下頦勼倚胸坎，閃覕歹毒¬ê風，伊軁過勝利大樓ê玻璃門，跤手緊猛，猶是去予一卷塗沙粉綴伊走入來。
巷路ê氣味敢若煮過ê高麗菜濫舊布苴仔。一頭ê壁頂有釘一張彩色海報，展佇室內有較大。頂頭kan-na一个大大大ê人面，較闊一公尺。He是一个45歲左右ê查埔人，頂脣鬚厚koh烏，鼻目喙有寡性格ê緣投。Winston向樓梯行，電梯試都免試，上順序ê時mā罕得會振動，tsit站ê日時，電規氣切掉矣，因為當咧備辦「仇恨週」，著減省。Winston蹛ê厝間愛peh七節樓梯起去。伊今年39歲，正跤目較頂懸有靜脈爛瘡。伊慢慢仔行，規路歇幾若改。佇每一層平台，電梯ê正對面，大个面ê海報就uì壁頂金金看落來。Tsia-ê相有專工設計，目光會綴你徙位。相ê下跤一逝字講：大兄哥咧共你看。
佇厝間內，有一个飽水ê人聲咧唸規捾關係生鐵生產ê數字。聲音來自一塊長篙形ê金屬枋，若像暗霧ê鏡，鬥佇正手爿ê壁頂。Winston捘一粒開關，音量小降--lueh，猶是逐字聽有。Tsit个裝置號做「千里幕」（telescreen），聲會當捘細，毋過禁袂掉。Winston行去窗仔邊，玻璃照出伊細漢、荏身款ê體格，伊穿連褲ê藍色作穡衫，tse是黨ê制服，予伊看著koh較薄板。伊頭毛金sih-sih，面血色自然。皮膚粗粗，是bái質ê sap-bûn、無利ê喙鬚刀和拄才收尾ê寒人剾--ê。
窗仔關咧，猶是看會出來外口真寒。下跤ê街路，捲螺仔風細細仔一陣一陣，共塗粉和破字紙絞咧飛。日頭光炎，天青kah鑿目，煞若像一切lóng無啥色水，kan-na hit張貼kah滿四界ê海報例外。Hit个留烏頂脣鬚ê人面，uì每一个優勢ê方位看落來。正對面ê大樓壁頂就有一張。親像圖說講--ê，大兄哥咧共你看，兩蕊烏目睭深深仔tsîn入去Winston ê眼底。路邊koh一張，一个角hiauh起來矣，佇風中擛咧擛咧，「英社」（INGSOC） ê字liâm-mi無去、liâm-mi koh出現。遠遠一隻直升機佇厝尾頂之間飛低低，佇空中停一下，若青胡蠅，隨koh剾一个大彎，射tuì別位。He是警察咧巡邏，siam對人窗仔內。總是tsit款巡邏無打緊，有打緊--ê是思想警察。
佇Winston尻脊後，千里幕ê聲koh咧唸，講生鐵，講第九个三年計畫超標達成。千里幕會仝時接收佮放送，Winston出啥物聲，只要是小較超過輕聲細說，lóng會予tsit台機器聽去。毋但按呢，只要伊踮佇tsit塊金屬枋ê視野內底，mā會予看去。當然佇任何特定時陣你lóng無地知影敢當咧予人監視。思想警察偌捷抑用啥方式接線去探查啥物人，予你臆。甚至mā會當料想in透暝規日咧共所有ê人監視。橫直in若欲愛，隨時會當切入去恁兜ê線路。日常生活中，你就愛假設你lóng會予人偷聽；除非是暗眠摸，mā lóng會予人偷看。眾人也確實按呢過日，習慣成做本能。
Winston保持尻脊骿向千里幕。按呢較安全，雖罔伊誠知背影mā是會漏洩訊息。一公里遠ê所在，真理部懸大ê白色大樓徛tshāi佇規片牢垢ê地景頂頭，he是伊上班ê所在。Tsia--ah，伊想著略仔起反感，tsia就是London，第一跑道（Airstrip One） ê首府，第一跑道是海洋國（Oceania）人口排第三ê省。伊想欲tsik一寡囡仔時ê記持出來，鬥確認London敢是自早就生做tsit款。Uì tsia看出去，規片漚古ê 19世紀舊厝，邊仔用大枝柴楗咧，窗仔用紙枋、厝頂用波浪鉛鉼補kah一塊一塊，亂操操ê花園牆圍東倒西歪，另外一爿爆擊過ê所在，灰塗烌佇空中踅飛，草仔花佇規堆ê磚仔頭頂面生湠。Tsit款光景，敢是從到tann lóng仝款？Koh有hia，he炸彈炸出來ê大塊空地頂頭，起 kah一簇一簇、袂輸雞牢ê lâ-sâm徛家咧？毋過無效，伊想袂起來。伊ê童年啥物都無賰，只有一堆發光ê畫面，無背景，mā僫得理解。
眞理部用新講（Newspeak）叫做眞部（新講是海洋國ê官方語言。關係新講ê結構佮詞源學，請看附錄）。Tsit个機關ê大樓和眼前所有ê物體天差地。He是一棟懸拄天ê金字塔型紅毛塗建築，一坎koh一坎，疊kah 300公尺懸，外觀白siak-siak。Winston徛佇tsia，拄好讀會著用優雅字體寫佇白壁頂的黨標語，三句：

戰爭就是和平
自由就是奴役
無知就是力量

(考慮著網頁顯示，預防亂碼，少數字有調整。)

I-1

4月一个寒凊好天ê日子，時鐘霆13點，Winston Smith共下頦勼倚胸坎，閃覕歹毒¬ê風，伊軁過勝利大樓ê玻璃門，跤手緊猛，猶是去予一卷塗沙粉綴伊走入來。
巷路ê氣味敢若煮過ê高麗菜濫舊布苴仔。一頭ê壁頂有釘一張彩色海報，展佇室內有較大。頂頭kan-na一个大大大ê人面，較闊一公尺。He是一个45歲左右ê查埔人，頂脣鬚厚koh烏，鼻目喙有寡性格ê緣投。Winston向樓梯行，電梯試都免試，上順序ê時mā罕得會振動，tsit站ê日時，電規氣切掉矣，因為當咧備辦「仇恨週」，著減省。Winston蹛ê厝間愛p...

I
II
III
附錄 新講原理
譯者ê話

I
II
III
附錄 新講原理
譯者ê話