阿森ê筆記：自然書寫ê時光(臺文繪本)

序

認bat臺灣，閱讀文學，ùi細漢開始

　　《阿森ê筆記：自然書寫ê時光》是國立臺灣文學館第一擺出版ê兒童文學冊，卻是第一擺試將臺灣文學ê歷史以包含智識性kap趣味性ê方式，傳達hōo小朋友。希望藉tio̍h文字kap圖片ê閱讀，liōng早引發in對臺灣tsit塊土地ê故事產生興趣。

　　Tsit本冊ê產生是本館2013年出版、由成大臺文系簡義明副教授所寫ê《寂靜之聲──當代台灣自然書寫的形成與發展（1979-2013）》，屬tī33冊「台灣文學史長編」當中ê一phō，內容主要紹介以「自然」做書寫主題ê臺灣作家、作品kap相關脈絡。以「臺灣」做基地所產生ê自然書寫作品，內容包含在地ê山川草木、蟲魚鳥獸，kâng時討論土地倫理kap環境關懷，如果ē-tàng將tsit ê故事好好á講--出-來，應該是siōng容易hō囡仔「有感」ê讀本，因為安呢，tsinn做阮思考án-tsuánn運用、改寫「台灣文學史長編」，來達到hōo文學教育「向下釘根」時tsūn ê首選。

　　i規劃構思到實際執行，本計畫結合濟濟臺灣文學kap兒童文學ê專家學者，以及本土繪本創作者。真感謝由師大臺文系林巾力系主任kap臺東大學兒文所游珮芸所長所帶領ê團隊，師生共同協力，透過激頭腦想創意，少年輩ê創新kap活力，hō《阿森ê筆記》tsit ê嶄然換新koh thang親近ê樣貌。繪圖家劉伯樂先生，從事插畫創作超過三十冬，對自然生態ê觀察描繪投入真深，本冊ê圖由伊負責，加真生動活潑。另外，考慮tih長久以來「母語」童書讀本真少，現此時「國家語言發展法」通過、各界呼籲應當重視母語保存、使用ê kha-tau，本冊特別kng時推出華語、臺語兩種版本，寄望通過童書ê閱讀，hōo囡仔接觸koh熟sāi母語ê呈現kap表達，促進母語能力ê增進kap培養。最後，ài感謝張子樟教授、許建崑教授、吳玫瑛教授、簡義明教授tī無閒中間對本計畫提供濟濟寶貴ê意見，臺語文學專家方耀乾教授協助臺語版審閱修訂，以及玉山社星月書房tī非常pik ê時間內承擔出版ê工作，hōo臺灣文學ê大眾化、普及化以及「少年化」，寫落新ê一頁。

　　臺灣文學館ê一細步，huān-sè是臺灣兒童文學界ê一大步；hōo咱認bat臺灣、閱讀文學，ē-tàng ùi細漢開始。