日頭雨截句

【截句詩系第二輯總序】「截句」／李瑞騰
【話頭】淋一身臺南的日頭雨：序王羅蜜多的《日頭雨截句》／方耀乾
【話頭】日頭猶閣㽎（sìm）一下／王羅蜜多

▐ 輯一　天書▐
天書
一葉詩
緣份
大南門
端午乾杯
玄機
目睭神神
眼神
小劍獅
胭脂巷
矸仔筅

▐ 輯二　火車火車▐
火車火車
卍字
鳥屎榕
食魚
現流仔
上帝的籤詩
心悶
市內鳥
人心
百年驛站
雞鵤刺
石碑
剁句

▐ 輯三　夭壽桃▐
夭壽桃
手曲黨
風颱
政治電火柱
丁字褲的暗示
舊年跳水的大官虎閣來矣
大佛普拉斯
直昇機呀
樹葬
花葬
海葬
Rohingya

▐ 輯四　無講無呾▐
無講無呾
焦慒的落雨暝
日頭雨
Tiyaling
細膩
草殻粿
清明的譬喻
最酷的旅伴
暗中
鹽花
修行

▐ 輯五　五月火▐
二九暝
勼勼虯虯
二月櫻花開
捧花
三月鶯
春色
五月火
五月茉莉
到手芳
失落
小雨傘
參天講話
金蟬

作者朗誦十首詩QR code

序

　　【話頭】淋一身臺南的日頭雨：序王羅蜜多的《日頭雨截句》／方耀乾（臺中教育大學臺灣語文學系特聘教授兼系主任）

　　認捌王羅蜜多已經二十外冬矣。初熟似的時知影伊的大名叫做王永成，是一位出色的畫家。成十冬後才閣見面，換王羅蜜多的名現身，是一位出色的詩人。這兩種的身分，伊攏非常出腳，實在無簡單，實在使人佩服。

　　《日頭雨截句》這本詩集作者標示是截句，是王羅蜜多的第二本截句選集。啥是截句？截句是2015年有人佇中國提倡，臺灣佇2017年才開始流行起來的一種詩的形式。一般來講，截句是一至四逝的詩句，會使裁剪自舊作，也會使是完全新創的詩作。優點是形式自由，逝數簡短，靈感閃爍，使人有所感抑是會心一笑，有日本俳句的滋味，毋過截句閣較自由活靈。《日頭雨截句》完全符合按呢的範疇，閣較寶貴的是，這本截句詩集是用臺語寫的，咱會使講王羅蜜多是臺語截句的先行者。
　　免特別說明，咱順手摘五首截句鼻芳一下就會隨理解：

　　一、〈一葉詩〉

　　菩提一坎一坎peh上去
　　法力無邊揬破天。突然
　　地動慄慄顫，跋落來
　　一搣……著生驚的詩

　　二、〈胭脂巷〉

　　路燈跤，蛾仔颺颺飛
　　月娘軁入胭脂巷
　　尻川跩咧跩咧，奶巡
　　挾一蕊煮飯花

　　三、〈卍字〉

　　魔神對面啼
　　門口有卍字
　　手拈心肝穎
　　凊汗㴙㴙滴

　　四、〈鳥屎榕〉

　　佛院的雀鳥食經放經，發一欉鳥屎榕
　　三百年來飽滇的果子，清氣tam-tam
　　優雅迷人。只不過，原在號做鳥屎榕

　　五、〈人心〉

　　人心楔入歷史的
　　腹肚，燉高麗巴蔘
　　古早味的湯頭芳絳絳
　　一點仔攏袂臭臊

　　這本詩集內面的截句，真有南臺灣的滋味，特別是有臺南的印記。咱一面淋著臺南的日頭雨，「水沖落身軀，親像山水畫／阮共山水切一塊，牽詩線」，一面「騎鐵馬，放風吹」，唸歌詩，作伙騎入黃昏的景色裡。2018/9/9，臺南市永康

　　【話頭】日頭猶閣（sìm）一下／王羅蜜多

　　舊年底，加入臺灣詩學25週年出版計劃，出版一本《王羅蜜多截句》。今年白靈老師講欲閣繼續，問我敢有興趣，我一聲就應好。
　　對我來講，短詩捽著足歡喜，截句嘛切著誠爽快。佇生活中，看著的感受著的翕入頭殻內，靈感閃熾中間，就產生寫詩的慾望。

　　有時陣，牽親引戚，觀前看後，就搝出一大坪的詩詞。切一塊好份的，紲感覺比原初的好誠濟。講著切，動作的大細，下力的輕重厚薄，攏會產生無仝的結果。譬如，用𠞭（liô）的，就有一眉仔詩，可能一句爾爾。檢采用割的，用切的，就會較大片，可能二行三行。若準用剁用斬的，親像殘殘豬肝切五角按呢，野性氣力，得到的是惱恨兼心爽的詩句。
　　《日頭雨截句》內底這首〈剁句〉，是對〈切句〉剁出來的，原作是按呢：

　　〈切句〉

　　一座吊橋共魂魄分雙爿
　　湖南　湖北
　　一本冊將吊茄割兩橛
　　東橛　西橛
　　一首詩歇佇冊的中央
　　啄龜　雄雄
　　頭殻予人剁落來
　　配茶
　　（風，大力歕一下）
　　利劍劍的字句
　　共家己的戀情切切切
　　舊愛新歡分做幾若塊
　　甜粅粅　苦硩硩
　　（白鳥敆烏雲，惦惦
　　佇水底飛）

　　截句是按呢：

　　〈剁句〉

　　一首詩歇佇冊中央，啄龜
　　雄雄……頭殻予人剁落來
　　配茶
　　（風，大力歕一下……）

　　我佇4-5行之間剁一下，8-9行之間閣剁一下。紲落，𠞭第8行來補充。佇遮，剁佮𠞭的趣味攏走出來。

　　仝款舊年底，白靈老師編選的〈臺灣詩學截句選300首〉，佇facebook詩論壇半年內，五千外首作品選出來，工事誠大，嘛誠有意思。

　　我有時會紮這本截句300首去虎頭埤散步，共囥踮石椅頂，風，大力歕一下，就翻出一首。共讀看覓，四常有意外的驚喜，閣親像風神也加入截句的行列。

　　頂回的《王羅蜜多截句》八十首，短詩佮舊詩切出來的，大約一半一半，今年這本《日頭雨截句》六十首，大部份是四行內的短詩。講短詩，其實是有意識的切句。因為佇日常中想著的翕入來的影像，靈感，佇腦海內已經剁一塊落來，激出自然的詩句。短小的詩句，毋是雕刻出來的，有時文字嘛冗冗（līng）仔爾爾。所以毋管是𠞭的，切的，割的，斬的，剁的，攏自在無罣礙。

　　《王羅蜜多截句》寫的誠濟花草、景色，心情抒懷。《日頭雨截句》則是有一寡詼諧、剾洗，對社會、政治的批判。

　　內心的鬱結、不滿，莫講遐濟。殘殘剁一塊落來寫做詩，予讀者的目睭皮雄雄跳一下，嘛是誠爽的代誌。

　　日頭雨，日頭光焱焱，雨水澹糊糊，佇這塊土地行踏的人啊，毋知是欲歡喜抑哀悲。不而過，淋佇咱身軀頂的雨水，若共當做水沖（瀑布），佇頭面，佇肩胛，佇胸坎，佇腰身，佇跤頭趺……規座山的水沖，比五峰旗閣較媠。這種山水，隨意剁一塊落來，是一幅小品圖，也是一首小詩。

　　這首詩，予咱騎鐵馬隆隆踅，提來放風吹，佮雲尪走相逐，心神自然清爽退火。2018/8/10王羅蜜多寫佇大目降

【截句詩系第二輯總序】「截句」／李瑞騰

　　上世紀的八十年代之初，我曾經寫過一本《水晶簾捲―絕句精華賞析》，挑選的絕句有七十餘首，注釋加賞析，前面並有一篇導言〈四行的內心世界〉，談絕句的基本構成：形象性、音樂性、意象性；論其四行的內心世界：感性的美之觀照、知性的批評行為。

　　三十餘年後，讀著臺灣詩學季刊社力推的「截句」，不免想起昔日閱讀和注析絕句的往事；重讀那篇導言，覺得二者在詩藝內涵上實有相通之處。但今之「截句」，非古之「截句」（截律之半），而是用其名的一種現代新文類。

　　探討「截句」作為一種文類的名與實，是很有意思的。首先，就其生成而言，「截句」從一首較長的詩中截取數句，通常是四行以內；後來詩人創作「截句」，寫成四行以內，其表現美學正如古之絕句。這等於說，今之「截句」有二種：一是「截」的，二是創作的。但不管如何，二者的篇幅皆短小，即四行以內，句絕而意不絕。

　　說來也是一件大事，去年臺灣詩學季刊社總共出版了13本個人截句詩集，並有一本新加坡卡夫的《截句選讀》、一本白靈編的《臺灣詩學截句選300首》；今年也將出版23本，有幾本華文地區的截句選，如《新華截句選》、《馬華截句選》、《菲華截句選》、《越華截句選》、《緬華截句選》等，另外有卡夫的《截句選讀二》、香港青年學者余境熹的《截竹為筒作笛吹：截句詩「誤讀」》、白靈又編了《魚跳：2018臉書截句300首》等，截句影響的版圖比前一年又拓展了不少。

　　同時，我們將在今年年底與東吳大學中文系合辦「現代截句詩學研討會」，深化此一文類。如同古之絕句，截句語近而情遙，極適合今天的網路新媒體，我們相信會有更多人投身到這個園地來耕耘。