三民網路書店
TAAZE 讀冊生活
iRead灰熊愛讀書名人推薦：
從古典小說探尋台語字源／簡忠松
王文隆博士寄來一本《台語對漢字之探討》。這是伊兮外甥呂應棠先生兮大作。我一口氣給讀完；真正是「牛角花勿生水蛇仔。」阿舅有學問，外甥亦仝款有學問。我真感動應棠對母語兮疼愛，更是佩服伊用心研究兮精神。伊兮研究比一寡「專家」、「學者」更予我學到真多台語，尤其宜蘭話兮典故與字源。伊真客氣講伊無受學術訓練，專是靠個人對母語兮興趣來寫這本冊。
我在這鼓勵應棠「頇顢牛有二步踼」，「樹頭若是企乎正免驚樹尾人在搖風颱」。親像伊兮阿舅王文隆博士雖然毋是哲學家或是心理學家，伊將二千五百年前老子兮道德經與哲學心理學研究到出書發表。
應棠提起伊研究台語字源是根據古典小說《紅樓夢》、《金瓶梅》、《水滸傳》、《西遊記》等書。我小漢時讀《西遊記》印象非常深刻。今嗎真湊好，因為王文隆研究道德經兮關係予我想記三藏取經與道德經兮關係。雖然這與台語無關，但是我想舅甥倆人探討二千外年前兮道德經與五百年前兮古典小說《西遊記》。講起來實在就是一個人求「道」兮過程。作者吳承恩（c. 1500-1580）當時寫這本《西遊記》是用假名來發表。伊是有名兮詩文作家但是《西遊記》用諷刺笑科反體制，反官僚兮筆法來寫伊恐驚得罪到朝廷所以伊用筆名。一直到伊死了後半世紀，1625才互人發現吳承恩是正本《西遊記》兮作者。我講正本《西遊記》因為公元1200左右有一本由一個道教兮師公（我記末起伊兮名）互成吉斯汗召見去蒙古，伊將過程寫出《西遊記》。但是這本師公所寫兮《西遊記》是地理人文兮記錄，毋是三藏取經《西遊記》。
話講轉來，吳承恩兮《西遊記》實在就是求道兮心路歷程。求道兮人有三種天生兮人格（Personality），小說用三個人來代表。第一是豬八戒（持八戒），這是代表人兮貪、瞋、痴、慢、疑等個性。第二個是沙淨（参禪），這是代表人兮的溫、良、恭、儉、讓兮品格。第三個是孫悟空（尋悟空），這是求道人兮心（mind）與意（thought）兮代表。
吳承恩兮小說將三藏、孫悟空、沙淨、豬八戒攏講原來攏是在天堂西方淨土。但是尹攏犯著天條所以攏罰來凡間受苦。佛祖有交待尹愛好好作人修行然後修到正果才轉來西天淨土。修行無簡單，三藏到印度求經一路受妖、魔、鬼、怪兮作弄，受女妖誘惑，但是有七十二變兮猴齊天來解救。毋過，猴齊天「心猿意馬」、「自負驕傲」，常常出大代誌。三藏就用金扣箍來將猴齊天乖靜下來。小說中西遊的豬八戒漸漸有修養起來由「色相」（form）漸進「空」（Formless）。沙淨由妄我（egoic-self）漸漸「悟」到無我利他（egoless self）兮境界。豬八戒（持八戒）是修有為法；沙淨（参禪）是修無為法。有為法、無為法攏是修心求佛兮方法。人人會修，人人有佛性，人人會成佛。
三藏得到經就是由「妄我」到圓滿「空」，「尋」然悟空終於成佛。道家哲學兮的「無」就是沙淨，「有」就是「豬八戒」。「圓滿」就是孫悟空。聖人就是超凡入聖兮三藏了。西遊記兮結局是三藏、孫悟空、沙淨攏圓滿成佛；但是豬八戒因為痴哥、貪食兮本性難改。佛祖將伊罰到凡間清溷家家戶戶紅祭桌頂兮剩菜、剩飯及灶下兮潘水；一直要到人間眾人成佛豬八戒才會超生。
直正悟空兮出家人就愛像應棠所講兮布袋和尚「不說經」、「不化緣」、「不信名山」。台灣兮政治和尚離淨土猶真遠了。
雖然應棠用心尋出古字來討論台語，毋過我有一寡意見。
1.伊講一寡應該是「一割」；若安呢「一寡農夫在田裡割稻仔」卻變成「一割農夫在田裡割稻仔」。「矮狗」伊講是「啞狗」。我講應該是「啞口」就是華文「啞巴」，「啞口」與「啞巴」攏與嘴有關，將人叫「狗」是真離譜。
2.我會記阮大姆媽穿「大唐衫」又綁脚；大唐杉是唐山過台灣傳統婦女所穿兮布綹黑衫。
3.咱一般講「厝」，應棠講原字是「處」。我出國二十五年，第一擺轉原鄉二結，看到到處是「處」卻毋知故「處」是在叨。我想猶是用故人兮古厝較妥當；尤其年記愈大愈接近要去住兮「厝」。
4.阮故厝後壁就是堡岸或叫堤防。在堡頂看龜山與在「波」頂看龜山有真無仝兮心情。
5.我小漢時常常在堡頂看到一個巡堡兮「風神」警察。「風神」應該是「奉承」，毋是「封神」。但是在用寫台文文章時，用「風神」看到較順眼。
6.講到順眼，我就想到真多字源字若寫起來作文章會看真無順眼。親像「姑不二衷」原字是「鼓不離鐘」，這是歌仔戲在緊急時鐘鼓齊鳴又唱走馬調兮場景，若是用「鼓不離鐘」寫在文章與寫「姑不二衷」有真大兮無仝與感觸。
7.宜蘭兮樂班有分「西皮」與「福祿」二派，後來變成溪南、溪北幫派政治鬥爭兮代名。「西皮」原字是「蛇皮」，就是大管絃用蛇皮包竹孔兮樂班。「福祿」原字是「葫蘆」，就是絃仔用葫蘆做絃管兮樂班。若用原字「西皮」、「福祿」，就無文雅了。
8.咱講「男」是「作爸」，所以有「作爸人」、「作爸囝仔」；約定俗成兮「查甫人」、「查甫囝仔，大家同意就好。安呢生（按理說），女的是「作母」，所以是俗成兮查某人（作母人）、查某囝仔（作母囝仔）大家攏看有。
9.「噴雞胿」原字是「分究竟」，華人叫「吹牛皮」。若寫「分究竟」，人看未曉「噴雞胿」兮表情。
10.「凊彩」兮原字是「剩菜」，這是農村通俗所講」剩菜吃粗飽」兮習慣話。「凊凊彩彩」若用「剩剩菜菜」，豈會「孝孤」呢。
11.有一寡字是華文所用兮。親像「會順呢」就是「於是呢」；「按呢生」就是「按理說」。「馬上」就是「暱目」，華文叫「一眨眼」，用「連鞭」是真無仝款。
12.台灣人亦用一寡宗教上兮用字來變成通俗話。宜蘭人，至少阮簡家兮人，常講「講一寡五四三又三八話，聽攏無。」真可能是由佛法無非是講「悟死生（五四三）」與「精進三學八正道」來順嘴口變成通俗話。華人講「胡說八道」是由「佛說八道」來；台灣人就講「謊說（Hau Siou）、白賊」。
13.台灣人講「漂泊」實在就是「翲翩」；講「豔頭」實在就是「緣投」；「古錐」就是可親。「蹉跎」就是遊玩；「心適」就是「新式」，攏仝款。華文兮「撒嬌」就是台語兮「撒賴（思奶）」；「嬈巴」就是搖擺。「勤苦」就是「勤腳（Kiang Kga）」，「踌躇」就是小心。宜蘭人講壁虎是「身翁仔」。實在真字是蜥蜴，音字攏對。「現在」寫做「今嗎」比「即目」較順眼。
14.「胡蠅」有人叫「雨蠅、金蠅、戶蠅」。尹咱吃飯就大大方方飛來桌頂。有一種人攏在人在吃飯時來拜訪。宜蘭人兮風俗攏會叫伊坐下來，做伙吃。這種無人叫家己來兮人客叫做「大面神」，所以胡蠅亦叫做「大面蠅」。大面神愛給某囝展風神講伊人緣好，人人真愛請伊。尤其是大隻落雨了後才飛出來兮虎頭蠅。伊兮面形像虎，聲音真響，是胡蠅中兮大哥；伊若來到桌頂，其他兮小胡蠅就要讓伊。
15.講到雨，宜蘭人有一句話「長工望落雨、乞食望普渡」。實在講、毋但長工望落雨，阮猴囝仔亦望落雨。小漢時，大伯兮長工阿吉哥落雨天就做「杆樚」、「風箏」、「竹仔水槍」、「牌仔」等等互阮蹉跎。
16.普渡是農曆七月十五開鬼門、拜祭好兄弟與有應公。王公廟大爐主祭大豬公比賽，又有好料理請好兄弟，兩棚歌戲班凑鬧熱，東棚演《薛仁貴征西》，東棚唱《孟姜女哭倒萬里長城》。王公跳過火，童乩扶乩等等。普渡時，阮自動放假無去學校。乞食常來故厝竹圍外等阮簡家送尹雞鴨好料理，尹攏會講一寡好話祝福阮；阮亦會真歡喜做好代誌。
17.在宜蘭講兮母語，來到外地會變質。親像宜蘭人講「搜無寮仔門」。這是宜蘭歌仔戲兮戯棚攏有出將入相兮「戯寮門」。有一擺戯班欠脚手，叫一個吃酒醉兮當臨時兮舉旗軍仔。在台頂伊搜無寮仔門，一直在台頂旋圓龍。這句話離開宜蘭變成搜無「貓仔毛」。
18.宜蘭腔與台北腔有未少無仝兮所在。有一年兮夏令會，我與另一個台北同鄉負責演講場所。在演講完了，另一場是在隔一個車路的禮堂。我與台北同鄉指揮聽眾要過車路去大禮堂。這時有一個婦女同鄉帶一個小漢囝仔問阮「恁有看到阮先生否？」台北同鄉應講「汝頭家講伊先去（kgu）啊，叫汝囝仔帶帶趕緊過（kgei）」。宜蘭人講去啊有死去兮意思；宜蘭音kuei是過；嫁兮音是kgei。這句話在宜蘭人聽來就是「汝先生講伊先去潮洲賣鴨蛋（死了）；伊叫汝囝仔帶着趕緊嫁。」頭家是查某人稱呼翁婿兮尊稱；我用「帶」無用應棠所建議兮「契」；「契」用在「契兄」、「契子」、「契約」等等。用帶看到較慣習順眼。
我讀了《台語對漢字之探討》予我深深感動應棠對母語兮疼愛；我亦感慨二十多年來母語運動依然停在找字源與編字典兮原地踏步。我猶末看到台語「專家」、「學者」用台文來學文學作品，尹猶是用華文來講台文台語兮重要。
應棠在精通《紅樓夢》、《醒世姻緣》、《水滸傳》、《西遊記》等古典文學作品發現十多字台語字源。這是真受我兮佩服。我希望伊會得開始用正港蘭陽腔兮母語文來寫文章、小說、詩等等來達到「嘴講台語、手寫母文」兮基本原則。
台語文核爆：探源家與作家間的沖激／胡民祥
江山代有台語對應漢字的探源家出現，源源不絕，顯示台語文誠有生命力。最近收著一本《台語對應漢字之探討》，作者是呂應棠先生，送書者是《道德經》英譯學者王文隆博士，伊請筆者寫一篇讀後感。早前，讀過王文隆的大作《Dynamic Tao and Its Manifestations》，王博士是物理學家，精通近代量子物理學，伊用物理學的場論來分析老子的《道德經》，所致，伊的大作佫有一個副書名：A Field Theory Analysis of Lao-tzu Tao Te Ching。筆者的好朋友簡忠松寄來這本書，彼當時拄好是筆者車禍大腿骨手術後。佇療養中心一個月期間，讀著，心內誠歡喜，讀出物件來，心竅豁然開朗，起一款靜心復原的助力。因為，這段緣分，對伊所請，心思回報；所致，拜讀呂應棠先生大作，以台語文寫作欲三十年的經驗，寫一寡感想。
台語漢字的語源探討，早前，有吳守禮教授、許成章教授……；佇1980年代有語言學者開路，親像鄭良偉教授，洪惟人教授……等等；紲咧，有民間學者嘛踏入這條探源路草。所謂探源，當然著愛有礦源，一般礦源是文獻，文獻無所不包，任何文字記載落來的記錄，攏可以是文獻。呂先生唯中國古典文學裡揣字源，伊對台語母語的熱情，寫成《台語對應漢字之探討》，值得呵咾。呂應棠先生書中所提著的陳昭誠先生，筆者熟悉近二十年，手裡嘛有呂先生所討論的陳昭誠大作《母語的愛──漢台字論》，佫有陳先生的台語詩集四本：《蝴蝶夢醒》、《台灣花》、《阿母ケ雲》、《花佫開》，以上五本，攏是陳先生先後簽送筆者的。陳先生人懸欉飄翩，中氣足，聽伊吟詩篇，一款歌劇院的男高音款，聲涵懸潤響亮迷人。
親像核子反應裡，「中子」以光速，誠無客氣，揣「質子」冤家，直直唚，直撞落去，親像「精子」撞「卵子」，帶來核子細胞分裂；有影，煞生幾仔個囝，嘛煞有一絲絲仔物質消失；根據愛因斯坦的質能公式：E = mc2，釋放出巨大的能量。希望，探源家參作家之間無客氣真情腦力沖激，Brain Storming，移山倒海，為台語文開拓一條澎湃大路。佇遮，按呢參呂應棠先生互相勉勵。
老子名言「道可道非常道」，道可以講，每人講一款，怹每款的綜合接近道。道有無窮的面相，每人講的道攏是「非常道」。「常」是「永恆」，「非常」著是「唔是永恆」。按呢講來，一般人所講的道，唔是永恆的道。看過，讀過漢語本老子《道德經》，佫讀西方學者的英譯本，總是攏捎無寮仔門，攏是無解；煞將冊囥倒轉去冊架頂，二十年，三十年過去，隨在怹抾沙聚塵。
年過又年，佫年過年，來夠2006年9月20，黃昏來一場車禍，夆用直升機送夠病院創傷中心，透暝手術碎糊糊的大腿骨，五工後出院，送入療養院，足足一個月，期間好朋友簡忠松送來一本奇書，就是頂頭講著的王文隆的書：《Dynamic Tao and Its Manifestations》。療養裡，只有三項空課：倒眠床，坐輪椅轉踅，簡單的復健活動，有影是美國時間誠濟，濟甲人閒閒閒，啥物冊嘛看。哲學本質是「動」，「動」則「變」，宇宙世間是動態的（Dynamic），時時咧變化中；咱所看著是動態變化中的事事物物，瞬間的一個面相爾爾，啊，事物各有怹無窮的面相。王文隆的「Dynamic Tao；動態道」，畫龍點珠，掠著筆者目珠，這是解《道德經》的鎖匙；對《道德經》，筆者一時豁然開竅。王文隆用「動態道」破解二千年來人人對「道可道非常道」的迷惑參誤解。緣由王文隆融會貫通近代物理學，掠著場論（Field Theory）「動態觀」這個靈感，破解《道德經》，筆者受益誠濟。
本誠對「非常道；唔是永恆的道」存疑，今，移山倒海，所謂「非常道」著是「動態道」。所致，「道可道非常道」著是「道可道，動態道」。共款破解：「名可名非常名」著是「名可名，動態名」。這款「動態觀」嘛可以應用夠台語漢字探源，將伊引申作：「字可字非常字」著是「字可字，動態字」，天底下「字」是會變的。
根據頂面這款動態觀，每個探源家所揣著的台語漢字，筆者攏看作是怹獨特的字，無所謂「著」抑是「唔著」，因為怹攏只是真相的一面，若欲加怹區分，應該是離真相的距離有遠近之差。啊，真相永遠揣未著，親像神永遠看未著，咱只是看著一寡神跡爾爾。所致，每位探源家攏各成一家之言，提供精彩的產品，任人觀賞採用，最後誰的字源勝出，唔提探源家可以左右的，是靠文學作品的「量」及「質」來決定的；量濟會占優勢，質美佫卡是重要的關卡。佇台語文飄洋過海的發展裡，「探源家」參「文學作家」攏誠需要。啊，欲選作佗一家入來箭風破湧，憑看各人見解參興趣啦。當然嘛可以兩家攏行落去，唯探源家一路行夠作家，將家己認定的字應用夠文學作品裡，試鹹汫，無的確，嘛會對探源用字起一款新境界參看法。
呂先生引陳昭誠先生的話：「台語系統書寫的完成絕非筆者說了算！筆者只是探出真相，真正的書寫與應用是要大家去參與與完成啊！」呂先生因為這段大哉言！熱情來參與，提出無共的看法，誠是可敬。呂先生加入來探源，出書參陳先生對話，進行「腦力沖激」，為著的是，真理愈辯愈明。筆者對怹兩位攏足敬佩。因為怹熱情為母語台語起磚鋪路，攏各成一家之言；怹兩位的心血，匯入台語文的溪流，壯大台語文的生命力。
早年，佇1980年代，作家可用的字源卡有限，濟濟是作家家己摸出來的；一寫久，有時豁然開朗，一寡字會家己浮出來；即馬，探源家出的冊，學者出的字典辭典不止仔濟。甚至有歸帆的研究者合心齊力，設立「台文華文線上辭典網站」，這個網站的資料是鄭良偉教授提供，程式設計者是楊允言資訊工程教授。佇這個網站，可參考選用漢字及豐盛的語詞。
探源家所勘定的字庫，無可能百分百受人採用。洪惟仁語言學家對台語誠有研究，嘛對台語漢字有伊獨得的認定，誠有成績。唔拘，嘛唔是逐字人攏採用，親像「人」伊認定是「儂」，唔拘，用「人」濟，用「儂」少。當然，家己做，甘願受；若有人採用一寡，有知音者，嘛是足歡喜誠安慰。呂應棠先生對母語的熱情，用心唯古典文學裡，探勘台語對應漢字，豐盛化台語文學作家的揀字庫存。
呂應棠《台語對應漢字之探討》有寡用字誠特殊。親像這字「之」讀作eh，一般人會用「的」；伊用「的」場合有：「筆者的」、「筆者所謂的」、「的話」。但是，共款這字「之」，佇伊所引的「登大雅之堂」，著愛讀作zhi，參一般人用法，佇遮是相共的。著是講：呂先生的「之」這字，有兩款讀法。筆者唔知伊按呢分別用「之」及「的」的必要性，筆者是一律用「的」，簡忠松用「兮」。這款一音二字「的」「之」的語句，敢是華語版譯作台語版所留落來的華語痕跡？
漢字是單音節，一字一音。唔拘，呂先生書裡，有一字二音節的「僅（gana）」，有影嘛是誠特殊。查陳修的《台灣話大詞典》（遠流，台北，1991），「干（kan）」（抑是「干（gan）」，用呂氏標音），這個字條有例句「干也（kan-a）」，等於「干也（kan-na）」，對應漢字可用「干那」，只是的意思。台文界「只是」有其他的用法，親像干單，干礁，單單。呂先生佫有二字一音的「不會（bei）」，「不要（mai）」，嘛是誠特殊。按呢用字，語詞恐驚煞歹讀；早期有人按呢寫，道是造字，即馬罕得看著；看來，呂先生是欲造字的意思。唔拘，造字是行未通，因為電腦走未出去。呂先生用「都」標語音lon，現此時，一般人是用「攏（lon）」。伊用「亦」標語音ma，現此時，一般人是用「嘛（ma）」，另外場合，伊用「亦」標語音ah，親像「會亦是不會（eh-ah-xi-beh）」。
呂先生用一字「不」，標四款音如下：「不共（bou-kgan）」，「不使（beh-sai）」，「不止（bu-li）」，「不但（um-na）」；唔拘，現此時，台文界這四音分別用無共款的字，親像：「無共（bou-kgan）」，「未使（beh-sai），抑是，袂使」，「不止（bu-li）」，「唔但（um-na），抑是，毋但」。當然，台語用字有呂先生講的一字多音現象。呂先生用「知曉（tsai yia）」，一般有人用「知影」、「知也」；用「知曉」誠特出，當然著愛知曉來夠「會曉」時，「曉」是讀無共音。
呂應棠用「齊」標語音tsei，陳昭誠過去用「濟」，後來用「贅」，現此時，一般人是用「濟」，教育部推薦「濟」。當然，呂應棠攏無同意，伊舉例欲說服人用「齊」，甚至，舉古典「齊人之福」，將古代「齊」國之「人」，伊有一妻一妾，解釋成「多人之福」，古典按呢今用，有影是誠高段。
呂應棠參陳昭誠兩氏用字，攏各成一家之言。呂氏用「飛」字，採用一字多音原則，親像寫「飛（hui）行機」「起飛（poe）」，陳氏採一字一音原則，寫「飛行機」「起poe」，用「羽」字下加「巴」的合成字，電腦拍無字。筆者同意呂氏這字飛的用法，道是一般人採用的一字多音。另外，呂氏用「喘氣（khui）」，陳氏堅持用一字一音，所以寫「人氣（khi）」，用「喘忥（khui）」。呂氏講電腦拍無「忥」字，事實上，用微軟的Word，用倉頡輸入法，拍「人弓心（ＯＮＰ）」三碼道掠出來。若是有法度達成一字一音嘛是足贊，親像寫：伊喘忥氣喘未過來，痚痀病煞發作。
賴和有一篇小說〈鬥鬧熱tàu-lāu-jia̍t〉，篇名是台語。筆者用「鬥」，呂先生用「湊」，攏有家己的見解。「湊陣」抑是「鬥陣」，「湊腳手」抑是「鬥腳手」，隨人用，文學作品自然會統一出一款來。佫有，tap-chhùi-kó͘欲寫「答嘴鼓」抑是「鬥嘴鼓」，嘛是在人用。若講，「啉」水抑是「飲」水，筆者開始是用「啉」，彼時，電腦拍無字，煞姑不二衷改用「飲」，呂先生是主張用「飲」。最近，電腦已經有「啉」這字，所致，筆者漸漸佫轉來用「啉」。共款的情形，嘛發生佇台語文俗字「刣」，早期電腦拍無，筆者改用「宰」；最近，電腦收入「刣」，宰相肚裡可撐船，安心撐轉來「刣」，反正，家己刣趁腹內。
日月之下各按一隻走馬爿「辶」，道是咱台語文久長以來的俗字，當初咧寫台語文，當然揣這兩字寫。誠無奈，人怹電腦只收迌，無收走馬仔日，只好改用「蹉跎」，嘛未霉。唔拘，唯陳昭誠大作，知影伊棲著「跮踱」，音義攏合軀，陳氏註明語出《史記 司馬相如傳》「跮踱輵轄容以委麗兮」，筆者足佩服伊探源工夫一流；陳修的《台灣話大詞典》用「彳亍（chhit-tho）」，註明「跮踱」是正字，嘛對頂頭語出這句，作出注解：「輵（kat）車馬喧雜貌，轄（hat）車聲也，委麗（ui-le）行步進止之貌」。有影，古早人，彳亍是一款「足」行，行「至」又停「度」；沿路行，沿路耍，所致，「跮踱」字義詞義攏誠妥當。以上看來，當然改用「跮踱」。
舉一個筆者用的字來講，道是一字「厝」，事實上，厝這字濟濟人咧用。呂應棠認定用「處」，比呂先生早起應該有二十年，楊青矗認定用「茨」，怹兩位攏指出「厝」是停柩的所在，活人不宜的意思。卻是人人用厝，全台灣各地偌偌偌濟以「厝」作地名，親像筆者的故鄉胡厝寮，另外，謝厝寮、蘇厝、三塊厝、五間厝、新厝、蕃子厝、許厝港、劉厝埔、朱厝崙……等等，攏是一大堆佫一大堆活人出出入入的所在！可見「約定俗成」的用字力量有偌呢仔大。有時單操一個欲抵擋，煞是風吹草偃矣。揣台語漢字的字源，嘛可用《道德經》的「動態道」來了解，受著：「名可名，動態名」的制約。筆者佇頭前講過：「字可字，動態字」；所致，「茨可茨，動態茨」，「處可處，動態處」，「厝可厝，動態厝」；誠是江山代有字出，各領風騷數百年。因為語言是活的，替語言服務的文字嘛必然是活的，隨時代咧變化。
事實上，世界各民族的語文攏是動態的，其中上活靈的可講是英語文。中古英語行夠現代英語過程中，大量借用外來語，帶來語音語詞的變動，致使拼音規則嘛起變動；現代人欲讀大文豪喬叟（Chaucer, 1340-1400, 英語英詩之父）的名作The Canterbury Tales《肯套伯雷故事集》，是看無的。這本故事集的標記是中古拼音字，參現代英語的拼音字差誠濟，現代一般人是讀《肯套伯雷故事集》現代英語文版本。所致，筆者大膽講：「喬可喬非常喬」著是「喬可喬，動態喬」。現代英語約有75萬語詞，近一半來自古德語，另外近一半來自羅曼語（法語、西班牙語、義大利語）及拉丁語，猶有希腊，荷蘭語，近代德語及阿拉伯語，其他世界各國的語詞。來自法語的有政治術語，來自希腊有科技術語。雜菜麵的英語文帶來音義混雜，原先拼音字的法則，變甲誠複雜，嘛可以講是混亂，已經唔是純拼音字。唔拘，英語文活用外來語文，造就出當今世界一流的英語文。英語文發展嘛可用「動態道」來了解，道是「英可語，動態英」；台語文發展嘛可師法英語文，作夠「台可台，動態台」。
呂應棠用「收煞」、「煞尾」，筆者誠同意，事實上，嘛是按呢用。
感謝呂先生，揣著一字「烹」。台灣人一向有「白茶」參「茶米茶」之分；「白茶」道是「滾過的水」，一般講請食茶，是啉白滾水；「茶米茶」是燒燒的白滾水所泡出來的茶，相親時，姑娘奉茶定著是「茶米茶」。來「烹茶」，意思是烹滾水，紲落欲用來「泡茶」，另外一款講法是「煎茶」。若是無欲用來泡茶，大概是講「烹水」，寒天好洗身軀。筆者一向是寫「燃滾水」。事實上，〈燃滾水及科技〉是筆者一篇科學散文的篇名，主要是欲向眾人展示，台語文寫科學文章，嘛是誠簡單，輕鬆甲那咧食菜脯卵咧，這篇收佇散文集《茉里鄉紀事》。一般人講台語文誠歹用來寫科學哲學文章，其實，文學的台語文才是上歹寫的，因為文學題材極潤，天文地理科技哲學宗教心理學無所不包。呂先生舉古典小說的例，建議用「烹」來寫「烹滾水」，伊寫：「譬如《三俠五義》第109回『又是現烹的一壼新茶』的講法，會當證明筆者的看法。今嘛可以參考這字「烹」，天天「烹水」泡茶，寒天一面哈茶米茶，一面寫稿，當然，熱天可啉「冷茶」，一款新式的泡茶法，道是用滾過的冷水泡，這款冷茶聽講是誠健身的啉法。大哉烹，誠感謝呂先生。
約定俗成的「風颱」唔免佫篩成「風篩」來。自古夠二十世紀，濟濟台灣人攏是唯井裡上「汫水」，烹來泡茶，用來煮飯，若是講著真正的水，這款「正水」敢著愛是無鹹無薟無礦物質的、無「鹹汫」的蒸餾水吧？
筆者寫「著急」、「著傷」、「著特獎」；「著賊偷」抑是「遭賊偷」？看來猶是「情人目珠出西施」吧？呂先生用「下晡」，筆者嘛用「下晡」，華語的「下午」當然唔是「下鬥」，呂先生用「下湊」。筆者只知影孔子門徒宰予晝寢，互孔子公仔罵甲臭頭家；宰予睏晝，睏甲無食晝；宰予是睏夠下湊？抑是下晝？日頭赤炎炎，緊食緊啉，隨人顧生命吧！
周添旺填詞，楊三郎譜曲的〈孤戀花〉歌謠：「風微微，風微微，孤單悶悶在池邊……暗相思，無講起，欲講驚兄心懷疑。」啊，啊，咱當然嘛是「笑微微，笑微微」，唔是「笑咪咪，笑咪咪」。這條「笑微微」，筆者舉雙手贊成呂先生，因為，「好佳哉」，一向道是寫「笑微微」。
呂先生歸本書裡，探出誠濟台語漢字，筆者讀來誠趣味，寫一寡感想。事實上，伊建議的字，攏言之有理。當然，讀者是唔是會佗伊行，用伊的字，著愛進一步觀查。無論結果怎款，呂先生對母語台語的熱情，唯古典文學裡，研究探字源，出書互人參考，筆者誠敬佩。
台語文路頂行欲三十年，定定聽著一項迷思：「台語專家傷濟，用字無標準化，一人一套，煞傷著台語文的發展；初學者煞唔敢入來，教學者唔知欲採用佗一套。」這款迷思著愛拍破，有心欲捒台語文的人，一旦踏入來，真緊道會發覺這款迷思是：「看一個影，煞生一個囝，產生無理無由的驚惶。」其實，有興趣台語文的人，可以選用任何一套，先踏入來，將彼套餾互熟透透，然後，面對其他的用字也好，歸套無共款的標記也好，伊會發現，誠簡單誠緊道看有讀有。親像，呂先生參筆者用法有寡（有割）差別，但是，筆者誠緊道了解呂先生的用字，所以，讀伊的書完全無困難。結論是：「台語文有誠懸的共同用字，對無共的部分，可以誠緊可分辨掌握，所以，未造成閱讀的困難。」另外，任何無共款的用字，嘛攏未帶來百害。因為，若有害道會夆篩掉，那像，咱欲去買一項商品，自然會去揣妥當的買。台語文必然是一面寫一面改善用字。事實上，即馬上流行的語文是英文，伊是唯中古英語文發展出來的。當年，中古英語文佇喬叟時代，唯倫敦方言出發時陣，拼寫法嘛是一人一套，無統一，誠是無理想，會使講是誠混亂，參咱即馬的台語文誠類似。終其尾，英語文靠文學作品完成標準化。語文是百年大業，那像秧仔著愛一欉一欉栽，才有美麗的稻穗，台語文嘛著愛靠文學作品一抱一抱寫，將來才有美麗的台語文。
呂先生寫北宜公路，濱海景緻美麗，龜山島泅海，蘭陽平原入景來，一款駛過「九彎十八越」的思念親情的胸懷，佳哉無互教育部「十八拐」騙去拐無去。唔拘，佇遮，伊煞軟心，講恁若用久變慣習，嘛會使之啦。
探字源建議用字，可比是生產商品，怹的好霉實用度，寫文學作品拄好是上讚的檢定法。
呂先生文筆好，可以潦落來，抒寫故鄉宜蘭，展現好山好水；彩繪蘭陽平洋山川，影翕龜山海泅太平洋；生湠宜蘭無窮歷史文化，細說吳沙人參噶瑪蘭人囝孫壯美悲歡古；拼一抱蘭陽公主神話台語文學。
胡民祥寫佇茉里鄉 2014.6.29
