台江大海翁

【推薦序】
翻轉臺語新詩風——讀黃徙臺語詩冊《台江大海翁》 ◎ 向陽
一、
詩人黃徙近年以來寫袂少臺語詩作，伊的臺語詩用字用詞攏誠媠氣，而且會當照顧著詩的美學要求，佇臺語音韻的掌握、雅言的運用佮意象的處理面頂，攏有真奇巧的表現。這本詩冊《臺
江大海翁》會用講就是伊的臺語詩總體的成果展現。
《台江大海翁》規本分做4 卷，收入130 首臺語現代詩，創作量比較起來誠驚人，顯然黃徙這幾冬來全精神拚勢去做的代誌，就是寫作臺語詩。佇這本新冊內底，伊寫人間世事的愛佮恨、生離佮死別，嘛寫咱人生存在世的生命觀，遮的詩篇攏收佇卷一「輪迴倒轉來」這輯內底，論真來看，每一首詩篇攏有詩人的身影，是詩人生活、生命佮伊的受、想、行、識的透露。30 首詩的主題，就題目來看，量其約掠一下，有「愛恨情仇」、「生死檔案」、「生離死別」、「酒色財氣」、「日常生活」( 油鹽柴米酒茶醋)、「火的一生」等六个層面。這六个層面嘛就是咱人活踮這个世界攏著面對的代誌，伊分開用主題的角度來寫，的確會當較深入、較詳細將生活的細節、生命的意義突顯出來。
伊寫日常生活特別予人有感慨。
親像這篇〈鹽：莫閣出世蹛海邊〉：
覆佇平地
無日頭嘛金爍爍
跁上山頂
無落雪也白鑠鑠
來到古井看著家己
明明有鋩有角
光線照著嘛七彩色
是按怎無人叫你璇石

你無生跤
是按怎地球走透透
無生目睭
閣知影好額人嫌傷鹹
散赤人嫌你傷重
一布袋換無三占錢
一粒田螺九碗湯
按呢過三頓，我是你
莫閣出世蹛海邊
人咧耍水袂去想著你

這首詩用佮鹽講話的方式，寫出生做「鹽」的悲哀，「一布袋換無三占錢/ 一粒田螺九碗湯」，深刻寫出「鹽」成做「俗物」的卑賤、海邊漁民食飯攪「鹽」的困苦。
另外，像〈醋：有糖就好唌〉這篇：

醋攏會覕佇酒後壁
等查埔人醉啦
才雄雄掠狂走出來
酒若閣發酵
醋就會愈來愈囂徘
你無假死講伊上媠袂使
上好，像花蕊共春天司奶
像焦枝向雨水討欲暴穎
醋，伊
有糖有甜就好唌
媠查某囡仔
恁講有影無影

這是用孽譎仔話寫的詩，詩人將酒佮醋用查埔佮查某的情愛關係來寫，「像花蕊共春天司奶/ 像焦枝向雨水討欲暴穎」，形容鮮沢，誠無簡單。
二、
來到卷二仝款30 首，卷名號做「黃昏隔壁等你」。30 首詩篇攏是地誌詩，主要是描寫咱臺灣西海岸的光景參風土的媠。地誌詩佇臺語詩的寫作，算來已經有誠長的歷史，自1920 年代蔡培火寫〈咱臺灣〉到今，濟濟詩人就用詩來寫土地、寫地景。黃徙這輯詩篇，寫了真優美，有聲韻的媠，嘛有景緻的媠，開頭第一篇〈上媠的風景〉就盡展出來矣：

黃昏會媠是日頭欲離開
閣伸手共人搝牢牢
行袂開跤，一直翻頭
共滴落塗沙的目屎
一滴一滴
唚予焦
海岸會媠是漁船仔欲轉來
海湧十八相送到岸墘
船聲慢慢仔倚來
船影跳上岸開始纏
纏甲查某人伊規身軀
賰兩粒澹澹的目睭
阿公的喙鬚披佇八仙椅做手挲
阿媽的喙瀾
含佇孫仔跋倒的影做糊藥
阿爸的手，摸著箸籠
就知影輕重
一間厝有序大人
照起工拍開門窗
予春夏秋冬入來陪囡仔大漢
按呢，敢是上媠的風景

這首詩自黃昏、海岸的媠寫起，收煞佇阿公、阿媽、阿爸遮的序大人「陪囡仔大漢」的親情，情深意厚，土地佮親情滿載，溫情十足。伊寫〈西螺彼扇窗仔門〉，講西螺大橋是「濁水溪的
目睭」，形容真四配；伊寫大甲溪，用「一早起日光共妳幔一領衫/ 左肩右肩攏平輕/ 四箍輾轉山景穿上身/ 坐落，萬紫千紅佇外面/ 花叫鳥聲，聲聲上桌頂/ 大喙大喙共食落/ 菜根花心叫疼，
大甲溪/ 幸福的名」，宛然若歌，讀來心適閣好聽；伊嘛寫新社的花海、卓蘭大峽谷、七股海墘、北門井仔跤、鰲鼓半島、桃園沿海的藻礁、汐止磐石嶺……，一路寫到臺江，寫道詩人的故鄉
四草──遮的詩攏充滿感情，有對土地誠深沉的感恩參意愛。

紲落來卷三「臺江大海翁」35 首詩，延續卷二的寫作，題材囥佇臺灣西海岸討海人討海掠魚、養殖的形影佮心聲。伊寫牽虱目魚、牽罟、掛網笱、拋手網、吊罾的討海圖，嘛寫討海人探更寮仔、跳烏、掠鰻仔栽、通溝、攄魚栽的生活，攏是臺語詩誠少寫著的題材。遮的詩作，毋但是地誌詩的延伸，嘛是臺灣海洋詩的佳作，開闊臺灣海洋文學的內涵，有特別重大的意義。
三、
煞尾卷四「江山咧等你」35 首，就詩論詩，是這本詩冊上精彩的所在。這輯的詩篇，充滿各種奇巧的變化，嘛有誠濟脫出臺語詩創作箍圍仔的全新表現。親像古詩反過來寫的技巧運用，展現臺語詩創作的新思維參新形式。其中，干焦「古詩反過來寫」系列詩作就有10 首，第1 首〈敢會杜甫咧臭彈〉按呢寫：

花，濺淚，921
沿路，澹糊糊
叫聲閣黏佇爛塗
等江山裂開，册拆散
句句才有當聽
心，著驚，小林村
規逝，鳥隻綴著飄流木
一離別隨到枉死城
毋知影這改出來，底當時
才閣會當倒轉去厝內
猶未到烏暗的盡磅
看無任何火燒過的影
聽無白頭毛落-- 落的聲
是按怎？見著花蕊
濺淚若濺水

敢會杜甫咧臭彈？

這首詩用中國古詩人杜甫名作〈春望〉做伊的文本，針對杜詩「感時花濺淚，恨別鳥驚心」這兩句來反寫；黃徙用1999 年921 大地動佮2009 年莫拉克風颱小林村滅村的災情，寫出比「花
濺淚」、「鳥驚心」閣較悽慘的世紀災難，每一句攏是沉重的喝咻之聲。「反過來寫」一方面是「反」杜詩「敢會杜甫咧臭彈」，表示921 地動佮小林村滅村災情的慘重，連「花濺淚」、「鳥驚心」攏無法度形容；另外一方面是，用後現代的筆法，翻轉杜詩( 成做文本) 的新內涵，這是文本的一款「再現」：閣生湠。其他像〈月娘破相〉反過來寫李白的〈靜夜思〉；〈江雪無仝色〉翻寫柳宗
元的〈江雪〉等等，會用講攏是真有想法、真有創意的文本生湠。

「古詩反過來寫」以外，後現代的寫法猶有孽譎/ 諧擬的運用。〈看魚仔洗喙〉採用莊子、惠施「濠梁之辯」的寓言，將兩人為著溪溝的魚到底快樂無快樂咧諍喙的故事，用孽譎的方式改寫( 翻轉經典)，講因為這兩人相諍，諍到喙瀾全波，「一直呸喙瀾欲予魚仔食/ 諍講佗一尾食著啥人的瀾較歡喜」，就是誠孽譎的改寫，目𥍉仔就共莊子寓言的正典，規个共伊破功了了；〈棋！
奇〉這首用「棋」參「奇」仝音( 諧音) 的趣味，寫雙人行棋，戰到「干焦賰一子烏卒仔/ 徛佇河邊，金金仔相/ 貓貓仔看/ 四界，無半個人影/ 無半聲/ 叫兄弟的名」的結局，嘛誠孽譎兼好耍。這嘛會當講就是「解構」( 拆解正典) 的手路。
後現代的精神，根柢是欲「去中心」，解破正典，收佇這輯的這首〈字，認無〉將這款思維寫到誠徹底：

天坦開一張批紙
雲幾字寫好
風就趕緊摺起來
塞入去天地接縫的批內
閣挽一蕊紅花
貼蹛春天的倒手角
現時郵票
一下到
熱-- 人，風颱傷大無拍開
秋後霜降閣傷重
毋甘掀起
想講冬節坦開來讀
大寒煞起寒
雲翻烏，字
攏認無

對「天坦開一張批紙/ 雲幾字寫好」開頭，到「大寒煞起寒/ 雲翻烏，字/ 攏認無」，暗示所有的文本攏有無確定性、無準確性，進前「寫好」的，終其尾無的確會「攏認無」，字的意義毋
是永遠攏仝款的，會綴時間的變化產生無仝的意思。這首詩自春天、熱人、秋後到冬節，用四季的改變來凸顯時間會改變文本內涵的課題，是真幼路的好詩。
四、
讀詩人黃徙的這本臺語詩冊《台江大海翁》，是真歡喜的代誌。自來臺語詩界就有濟濟詩人咧創作，嘛寫出袂少好作品，會當開闊臺語詩的視野佮表現的手路。早期的臺語詩，語言較平直，
接近白話；技巧較簡單，變化無濟。大多數是用現實主義的寫法，寫出詩人對臺灣社會、政治參自然生態的憤慨佮憂煩，感情落真深，是用真情寫出來的詩；閣來進一步有詩人發展「臺語歌詩」，
掌握著臺語的聲韻，調製出動聽、好聽的旋律，有誠浪漫的腔口，寫出臺語的媠氣。

黃徙的這本臺語詩冊，徛佇前人的基礎面頂，毋管是現實的題材，或者是浪漫的情愛、臺語的聲韻，攏有十足的掌握；毋但按呢，伊閣進一步運用後現代主義的手路，翻轉出臺語詩界較罕見的詩風，透過閣生湠/ 再現、孽譎/ 諧擬、解破/ 去中心等等技巧，開創出一片新的江山，就親像伊佇這本詩冊上尾篇〈江山咧等你〉所寫「看花免折枝/ 種子佇花心咧吐舌/ 風景佇江山/ 咧等你」仝款，花開矣，風景坦開佇眼前，一大片江山已經咧等待伊繼續去掖種！

向陽—— 2019/7/5 寫佇臺北教育大學臺文研究所

【推薦序】
翻轉臺語新詩風——讀黃徙臺語詩冊《台江大海翁》 ◎ 向陽
一、
詩人黃徙近年以來寫袂少臺語詩作，伊的臺語詩用字用詞攏誠媠氣，而且會當照顧著詩的美學要求，佇臺語音韻的掌握、雅言的運用佮意象的處理面頂，攏有真奇巧的表現。這本詩冊《臺
江大海翁》會用講就是伊的臺語詩總體的成果展現。
《台江大海翁》規本分做4 卷，收入130 首臺語現代詩，創作量比較起來誠驚人，顯然黃徙這幾冬來全精神拚勢去做的代誌，就是寫作臺語詩。佇這本新冊內底，伊寫人間世事的愛佮恨、生離佮死別，嘛寫咱人生存在世的生命觀，遮的詩篇攏收佇卷...

局長序 | 葉澤山
尋訪臺南的文學蹤跡
編輯序 | 陳萬益
臺南人的文化輝光
推薦序 | 林淇瀁
翻轉臺語新詩風─讀黃徙臺語詩集《台江大海翁》
推薦序 | 胡民祥
台江大海翁詩草蓊蓊--- 江山滿滿文本林
卷一 | 輪迴倒轉來
001. 拆食落腹
002. 睏做化石
003. 燒冷貼心肝
004. 報仇的步數
005. 佮劍相見
006. 佮砲火做伙
007. 佮武士刀相拄
008. 輪迴倒轉來
009. 山中央叫阿娘
010. 予黃昏冷凍
011. 攏無老免越頭
012. 愈纏愈深
013. 鑽心腸
014. 刻骨
015. 猛虎
016. 海翁
017. 油：翻頭放刁
018. 鹽：莫閣出世蹛海邊
019. 柴：叫老的
020. 米：食飯的心悶
021. 酒：問李白
022. 茶：入冬
023. 醋：有糖就好唌
024. 火的一生：予金
025. 火的一生：予木
026. 火的一生：予水
027. 火的一生：予后土
028. 火的一生：予本身
029. 落雨落滴
030. 珠淚抑鹽鹽抑淚珠
卷二 | 黃昏隔壁等你
031. 上媠的風景
032. 西螺彼扇窗仔門
033. 幸福的名
034. 五福臨門咱所向
035. 新社花海剪裁
036. 白毛臺深愛
037. 史詩畫面：卓蘭大峽谷
038. 風飛沙：七股海墘
039. 牽詩的路：北門井仔跤
040. 天色生疏：鰲鼓半島
041. 喘氣？藻礁：桃園沿海
042. 酒醉山櫻喙：汐止磐石嶺
043. 眠夢的海岸
044. 蚵仔的悲哀
045. 路的下底重出世
046. 五柳枝回憶
047. 記持咬足深
048. 刣蛇食的步數
049. 變醋四步
050. 台江絲路：氣若游絲
051. 台江絲路：天翻烏
052. 台江絲路：挖墓仔埔
053. 台江絲路：橫柴入灶
054. 台江絲路：屎管沃肥
055. 台江絲路：船過無痕
056. 詩若跋落江底
057. 畫若無踏著江山
058. 上陸認骨肉
059. 一路花蕊胭脂淚
060. 阮佇黃昏隔壁等你
卷三 | 台江大海翁
061. 牽虱目魚：思慕的圖
062. 牽罟：大團圓
063. 掛網笱：毋是咧𨑨迌
064. 拋手網：拋佇春夏秋冬
065. 吊罾：一網打盡
066. 探更寮仔：探啥
067. 跳烏：毋知影滋味
068. 掠鰻仔栽：海底摸針
069. 通溝：潮起潮落
070. 攄魚栽：向海追日子
071. 一世人的麻黃仔林
072. 抐桮！抐飛
073. 徛鵝之聲
074. 北極熊凝心
075. 釘根入地心
076. 到咱老：普悠瑪號見聞
077. 上驚無影：夜市見聞
078. 寒過春隨到：遛狗見聞
079. 枕頭佮被單：庫德族見聞
080. 看彼箍？這箍：選舉見聞
081. 山頂等海湧
082. 苦楚叫甘露
083. 塗沙粉抹海湧
084. 海墘無倚靠
085. 有夠見笑
086. 目箍噴風雨
087. 上鹹上疼
088. 臺灣的目睭
089. 齊柏林的目睭
090. 眠夢相迵
091. 啞口仔佮青盲柯
092. 台江大廣絃
093. 台江大海翁
卷四 | 江山咧等你
096. 雪咧問：相思對佗來
097. 雪咧問：敢是才袂寒
098. 雪咧問：江山敢會認得
099. 按怎看會著開春
100. 拗做一首詩
101. 敢會杜甫咧臭彈
102. 月娘破相
103. 江雪無仝色
104. 竹，比天
105. 菊仔花心內話
106. 等詩！欲死
107. 讀你千年心肝
108. 問天
109. 賣陋室銘
110. 離騷離開了後
111. 蓮田的面
112. 鐵樹開花的相會
113. 花叫欲飛的關係
114. 字！認無
115. 金鳥仔釣魚
116. 棋！奇
117. 石頭沈思 in 兜
118. 敢是毋免喙齒
119. 天地時差
120. 阿媽梳頭毛梳月光
121. 淺拖仔怨慼
122. 聽無嘛無望
123. 墓誌截句
124. 挲黃昏
125. 桃梅李杏
126. 毋知影！達摩
127. 日頭換枕頭
128. 暗殺日頭
129. 江山咧等你
跋| 陳寧貴
牽詩的路

局長序 | 葉澤山
尋訪臺南的文學蹤跡
編輯序 | 陳萬益
臺南人的文化輝光
推薦序 | 林淇瀁
翻轉臺語新詩風─讀黃徙臺語詩集《台江大海翁》
推薦序 | 胡民祥
台江大海翁詩草蓊蓊--- 江山滿滿文本林
卷一 | 輪迴倒轉來
001. 拆食落腹
002. 睏做化石
003. 燒冷貼心肝
004. 報仇的步數
005. 佮劍相見
006. 佮砲火做伙
007. 佮武士刀相拄
008. 輪迴倒轉來
009. 山中央叫阿娘
010. 予黃昏冷凍
011. 攏無老免越頭
012. 愈纏愈深
013. 鑽心腸
014. 刻骨
015. 猛虎
016. 海翁
017. 油：翻頭放刁
018. 鹽：莫閣出世蹛海邊
019. 柴：叫老的
020. 米：食...