唐秉輝

《台文通訊》本成是美國洛杉磯一陣台文寫作會ê成員發表作品ê平台，後--來，發展成做海內外台文運動者共同ê平面媒體。《台文BONG報》是《台文通訊》台灣總連絡處台北寫作會佇1996年另外創辦，定位做「台語文學專門雜誌」。2012年，兩个刊物合併做《台文通訊BONG報》，希望會當發展做一份台語文綜合雜誌，予台語存在佇咱生活ê每一个角落，記錄、描寫生活ê每一个細節。咱ê台語文學會當再現生活ê每一个領域，關心每一个階層ê台灣人，共文學當做是各行各業台灣人ê心聲表達，毋是kán-ná少數文人雅士ê專利。

這本年度選是對《台文通訊BONG報》規年刊--出ê作品中精選--出-來-ê，有詩11首、散文5篇佮小說4篇，這份刊物ê台文作家群佇2012年ê創作，展示予逐家看，邀請逐家來欣賞用台文描寫ê故事。

作者簡介：

周定邦：台南市將軍區青鯤鯓人、台灣說唱藝術工作室團長。第一趣味寫歌仔家己彈唱，作品有長篇歌仔《義戰噍吧哖》、《桂花怨》三phō，短篇歌仔幾若十篇。第二趣味寫劇本hām小說，作品有《孤線月琴》、《英雄淚》。

柯柏榮：

1965年出世，台南市安平人。慈幼高工電工科畢業。

1998年4--月因為強盜案入台南監獄，2009年5月初七假釋出獄。

2003年開始台語文學創作，以現代詩、散文為主。

出獄了後捌擔任：「台文筆會」祕書長、「台灣歌仔冊學會」祕書長、《台語文教育報》執行編輯。

現任：「台南市菅芒花台語文學會」總幹事、「台灣南部文創文教協會」祕書長、台南市國中小台語教師、《首都詩報》總編輯

Tio̍h獎記錄：教育部、海翁、阿却賞、南瀛、府城、大墩、夢花等十外个文學獎。

作品集：《娘仔豆ê春天》、《赤崁樓的情批》、《內籬仔的火金姑》等三本台語詩集。

王一如：1987年出世tī彰化市一ê三代同堂ê大家庭內底，自細漢tio̍h lóng講台語，尤其唱真濟台語歌，hōo我感覺這個語言實在真趣味。台語這條路是我選擇ê，我會當利用拼音書寫kap編輯這寡優點互相結合，繼續拍拚，nǹg望有一工mā會使盡我ê能力kā台語ê媠報hōo koh khah濟人知影。

吳正任：台灣高雄人，成大台文所研究生；捌擔任嘉興、前峰、燕巢、金山、中路等國小hām岡山、橋頭、阿蓮、前峰、後勁等國中ê台語文教師；有出台語詩文集《車過牛路彎》；台語現代詩入選《2006台語文學選》、《台語詩100首》；高雄縣政府聘做國中八年級閩南語教材編審委員，台語文作品選入國中閩南語教材；捌著「鹽份地帶文學創作獎」，「最有潛力(電影)編劇新人獎」(高縣府)，台語文〈走揣惡地山河〉入選〈2009台語文學選〉kap〈鬥陣寫咱的土地---母語地誌散文集〉；台語現代詩、散文得著教育部第一屆母語文學獎，列入〈鳳邑文學百科全書〉作家名錄；2012教育部推展本土語言傑出貢獻獎榮譽。

洪錦田：1949出世，台灣，彰化，鹿港人，十七歲出社會，現此時蹛新店ê暗坑。美麗島事件kap鄭南榕事件了後，徹底覺醒家己欲做啥款ê人。1992跤兜，kap台語學者洪惟仁教授學台語，開始寫台文。1995出台文冊《鹿港仙講古》接受社會指教。閒時，無停睏寫作，投稿予社團發表。捌做過台灣台語社義工、編輯，嘛捌擔任台文社團理事、執委、講師kap台語講演、徵文ê評審，民主電台ê台語文節目主持人。

社會正職退休了後，全面自我反省。飫學無到ê所在加做學習；閒時，佐一寡田野調查、收集、寫作ê空課。

唐秉輝：唐秉輝，興寫作參語言，1968年起蹛踮美國。1952年伊發表第一篇漢文作品，1956年10月初4因為伊心愛阿媽ê幫贊，tī已經過身ê李萬居先生發行ê前《台灣公論報》發表第一首台語詩，伊也tī1989年踮美國加州ê《太平洋時報》發表第一首英語詩。

伊是國際醫療倫理kap法律年報〈Annals of International Medical Ethics and Law〉(一本以德文、英文參其他語言出版ê國際cultural magazine)編輯委員會ê受邀編輯以外，也是journal of Medical Ethics,Laws and History ê Advisor Board member, koh 是《The Church Herald》寫作事奉ê作者。伊捌tī美國哥倫比亞大學研究生物倫理學kap公共健康，嘛捌擔任神經科學kap分子生物學ê科學顧問工作。

亞茱：戶口名：陳玉珠。1950年4—月tī台南縣新營鎮出世（目前是台南市新營區）1970年台南師專（這馬ê台南大學）美勞組畢業，教冊三十冬，2000年退休。1994年開始用台語寫作，包含：囡仔詩、現代詩、七字仔、散文、小說、台語歌等。

Siraya語原作：羅宇真返：漢人，檢采有透著番仔血kap某mih某mih血，台北出世，對Siraya語言有興趣，程度拗蠻仔，毋過真敢寫。

台譯：Voyu Taokara Lâu：台北出世，食頭路了後轉來做老學生，現此時蹛新竹較濟，對語言、歷史、哲學較有興趣。

吳瑞琪：籍貫：苗栗縣三義鄉（今蹛彰化）。國立台北師院畢業。捌著100年教育部台灣本土語言文學獎客家語教師組現代詩第一名。著作：《恁久好無》（客家語現代詩）

陳胤：本名陳利成，彰化縣永靖鄉人。淡江大學中文系出業。國中教師。柳河文化工作室負責人。佮意藝術創作，寫過幾若本詩集kap散文，得過一寡仔獎，目前繼續關心咱土地，繼續the寫詩，華語台語攏有......

楊振裕：（1953~），彰化縣人。台中師院畢業，彰化師大特研所結業，目前擔任國小ê校長。有閒ê時陣參加一寡台語文社團，加減吸收寡智識，心適ê時嘛會寫寡台文，共家己ê見聞感受kap無成熟ê見解，透過上熟似、親切ê文字表達--出-來，感覺he是一件爽快閣有意義ê代誌。

王昭華：屏東人，淡江中文系，捌擔任雄獅美術出版社文編，2002年起參與康軒版台語教科書編寫，2006年發行個人創作專輯「一」，2007年海翁文學獎散文組正獎，2011年台灣文學獎台語散文金典獎。以台文寫FB kap個人blog「花埕照日」。

潘科元：屏東萬丹水泉人，大學講師，台語文教育者、創作者。望欲復興古語、創造新語、吸收外語（包括華語），建置新時代ê台語文，予咱ê祖公爸母話得著新活命，會得kap別人ê語文平坐徛。

林裕凱：1966年尾，咱terh台北坪林尾（Piân-bér）出世，雙跤落塗，山頂快活過日，到七歲tèr爸母先遷永和倚阿伯，過半冬了後閣徙去新莊十八分地。國校欲讀了彼時徙心愛育幼院邊--á蹛，國中有考著上好班，tsiah去讀，1981考牢師大附中，1984讀了，咱庄腳囡仔走新竹去讀交通大學土木系。兩年過，性地buē ha̍h轉電子物理系，讀kah 2000年tsiah提著電子物理博士。了，有去做兵，過koh入科學園區做電子新貴。咱現tshír時佇麻豆真理大學通識中心博雅教育組。寫台語文按1991開始，文學受林央敏啟蒙，台語文受陳明仁老師指導。寫詩咱想講是學講話，講家己ê心內話。進前所寫，量約分三類，一--者自我探索、抒發、二--者批判公共事務、第三摘取靈感。

陳威志：陳威志，台南人。做兵期間，捌得著阿却賞台語文詩組創作獎。退伍了後，蹛過報社一站，尾--à入去環保團體食頭路，想欲走揣無仝款ê「政治（社會）實踐」，過程中hām日本ê市民團體開始有接觸，佇2008年秋天來到日本，現此時佇一橋大學社會學研究科博士班修行。

黃文宏 ：成功大學物理系教授

1953年，出世ti 雲林縣斗六市。

1985年，清華大學物理博士班畢業。

2007年，tsiah知影有台語文學世界。

2009年，第一篇台語散文--祕境烏石崎 (台文通信)。

2011年，第一篇台語小說--半暝過溪(台文通信)。

王薈雯：1986年台中出世，高雄大漢，麻豆人；台中教育大學台灣語文學系出業。細漢感覺台語是大人teh講--ê；一目nih，我就變大人，會當講台語--ah

藍春瑞：1952年出世t„雙溪鄉，東吳政治系出業，現時teh做公務員，倚beh 30冬--a。Kò人較hìng peh山，hioh-khùn日mä誠tsia̍p去sçh台北地區ê淺山；練身體以外，ë-tàng予家己用koh-khah謙卑ê心，來款待所有ê世事，才是上大ê收成。

邱偉欣：本名邱偉欣。讀冊讀到30歲，才雄雄發現對家己ê土地了解傷少；因此放棄原來ê khang-khòe，轉來故鄉，重新學習，骨力學台語、客語，專心做文學創作，智識chhui-sak。