我聽著花開的聲：台語散文集(附全書有聲朗讀QRcode) (電子書) -FindBook 找書網

圖書名稱：我聽著花開的聲：台語散文集

「踏話頭」有聲試聽

鬥陣行入母語文學的花園
聽台語的媠，鼻性命的芳，唱土地的歌

台語，是伊故鄉的聲；台語，也是伊人生的聲；台語，更加是豐沛多彩的台灣文化，飽滇溫純、堅強軔命的聲。台語的花一蕊一蕊開出來，咱聽著土地佮家己的心聲，看著文化生湠的希望……

這本散文集，uì廖張皭2002到2023年、超過20冬的台語散文創作當中，精選35篇集錄成冊。有伊囡仔時的樂暢記持，有青春的成長滋味，也有對故鄉人情、性命萬物的觀察佮體會，逐篇攏是1个台灣女性面對自我的中年書寫，走揣家己生活、文化佮歷史記持的線索佮跤跡，充滿伊對故鄉的siàu念，對土地的深情，對島嶼的向望。

隨篇附作者親聲朗讀QRcode，文聲合一，台文閱聽，招你鬥陣行入台語的美麗花園。

◎本作品榮獲國藝會出版獎助

作者簡介：

廖張皭 Achiak
雲林人，成功大學畢業，蹛新北市，是1个素食主義者。2024年2月國中教師退休，tsiânn-tsò台文工作者。2024年，〈天頂的虹〉得著第九屆教育部閩客語短篇小說教師組第三名。

2008年，〈Grace〉得著教育部本土語言文學獎散文類教師組第三名。2003年，〈溪水恬恬仔流〉得著A-Khioh賞散文組頭賞、〈林投心事〉得著詩二賞。新北市103、104、105年度本土語文文學創作散文教師組優等及佳作。

章節試閱

行入冊店

Tso̍h--ji̍t1 beh 暗仔，因為淡薄仔代誌去台北，拄好有1寡làng-phāng 的時間，1个人坐佇公園歇睏。Hiông-hiông想著最近冊店1間1間相接紲收起來，感覺誠可惜，就Google上近的冊店，查著附近有1間開40 年的傳統冊店，5分鐘會當行跤到，就散步沓沓仔行過--去。
哇！有影是傳統的老冊店，我kán-ná nǹg過時空pōng-khang，轉去虎尾公車站邊仔彼間冊店。彼陣，我是1个為文學痴迷，食冊就會飽的高中生，差不多逐工放學攏會uat入去彼間冊店，關心看有啥物新冊出世，雖然lak袋仔不時空空，厝裡散kah giōng-beh予鬼掠去，阮嘛是勻勻仔儉錢，等夠額就交予冊店頭家，歡歡喜喜kā冊架仔頂的冊紮轉去。M̄-koh，閣khah濟的時陣是1箍人徛佇冊店的角--仔，看冊看規晡，尾--仔無買冊，就家己歹勢歹勢恬恬仔走，頭家嘛m̄-bat予阮歹面看。
離開冊店，坐uànn-pang的台西客運轉去厝。我佮意坐佇倚窗仔，會當看黃昏的田園，看各種農作物佮彎彎uat-uat的小路，沿路thàng去1 个閣1个庄頭。有時我會想像作家學長「林雙不」讀虎尾高中的時，坐台西客運看著、聽著的是啥物風景？佮伊坐仝pang車，彼个手phóng鼓吹花、穿lá-pah褲離家出走的查某囡仔，uì主張免讀大學嘛過了誠好，到認真讀冊考大學，家己轉變嘛鼓勵伊按呢，kám正港有彼个人？Ah是作家家己進行的1場思辯？伊偷走書去虎尾溪poh岸邊、糖廠、公園、一等涼冰果室……，四界lōng-liú-lian，茫茫渺渺看無家己的未來，升學主義壓迫少年囡仔敏感、ke̍h-kuāinn的心，阮熟似的環境佮苦悶的心境完全予伊寫透機。當伊佇阿里山天星陪伴伊寫情批予愛人仔，阮嘛綴咧幻想：有1工，kám 有人會寫按呢的批予阮？
我自細漢就足愛看課外冊，足早就確立家己對文學的興趣，愛感謝2 个人。1 个是我國校仔4年的老師，伊佇教室的壁角設1个班級冊櫥，教我負責登記、管理，鼓勵全班同學借冊、看冊，老師開錢買足濟世界文學名著來予阮讀。彼陣阮庄跤所在，國校仔無圖書館，無課外冊thang借，伊替阮拍開1个新視界，1个趣味的世界。另外1个愛感謝的是我的阿姊，我國校仔5、6 年的時，伊咧讀國中，為著拚聯考，讀冊讀kah無暝無日，閣愛專工替我去圖書館借冊、還冊，2冬tah-tah，到kah我讀國中tsiah換我家己去借。席慕蓉佮蕭蕭的詩，陪伴我行過無怨tsheh的青春，鼻著花開的芳味。明明人佇厝裡，神魂嘛綴作家三毛去異國去沙漠咧流浪，走揣夢中的橄欖樹。
冊店曾經是我暝日流連的所在，tann竟然m̄知有偌久無行跤到矣。早就慣勢透過網路買冊，幾个tshi̍h-jí揤揤咧，過2工仔冊就送到位，實在有夠利便，加上khang-khuè誠無閒，就無去想按呢冊店kám有才調生存。
佇網路發達的現代，冊店經營正港無簡單，我入去的時，kan-nā頭家1个人坐佇櫃台掀報紙，kán-ná無聊kah。我行去歷史佮文學的冊櫥遐，濟濟熟似的老朋友攏佇遐，《千江有水千江月》佇架仔頂咧大力kā我ia̍t手，親像久年無khuàinn的好朋友，驚我kā放袂記得的款。白先勇的《臺北人》hām因為影集《斯卡羅》tshìng kah掠袂牢的《傀儡花》phīng做伙。
我當咧想講thài攏無看著台語冊，拄好2个人客入來，1个提1本冊坐落來讀，1个巡巡咧都無5分鐘，空手行出去。我選1本早前想beh買猶未買的冊，坐落來讀，氣氛輕鬆閣自然。
冊店頭家明明有進袂tsió新冊，足受歡迎的《海風酒店》佮向陽老師上新的詩集《行旅》攏囥佇上顯目的所在。
Beh走tsìn前，我kā手提咧彼本冊囥佇櫃台，kā頭家講beh買彼本，頭家kán-ná m̄敢相信，喙nauh 1下講：「寫kah hiah-nī厚，ah無人beh買。」我笑笑仔kā看1下，足想beh應講：「我kám m̄是人？」《鳶山誌：半透明哀愁的旅鎮》照定價750箍，無俗半箍銀。我行出去的時，頭家閣1擺大聲huah多謝光臨。
2023年寫

顯示全部內容

作者序

踏話頭

台語是阮佮故鄉的連結，台語予阮揣著轉去厝的路，寫台文是我對故鄉的siàu 念，嘛是咧走揣家己，中年書寫閣khah是ua̍t 頭看家己的人生，反省1 tsuā 行來的ta̍p-ta̍p滴滴。

阮佇雲林二崙濁水溪邊的小庄頭出世，老爸掀《彙音寶鑑》kā阮號名。讀小學的時，就真佮意文學。國立成功大學中文系畢業，bat佇私立中學教冊，了後，佇國民學校做老師。2002 年1个機緣，讀著阿仁老師的作品，發現原來用台語會當寫出hiah-nī 趣味的文學，我嘛綴咧攑筆寫出我的第一篇台文〈tshiau揣阿爸的形影〉。我發現用母語會當kā 藏佇心內的感情，原汁原味寫出來，就開始自修學羅馬字、寫台文。

2022年總算等著台語tsiânn-tsò3 正式的課程，會當佇學校上台語課，m̄ 是像過去kan-nā 指導社團佮訓練語文比賽niā-niā。Tann，台語是阮的日常，看著台語uì 20冬前驚伊死死去，到tsit-má講台語當時行，母語若復振起來，是阮上kài歡喜的代誌，嘛是台灣社會語言的轉型正義。阮心內足感謝久年來，濟濟為台文奉獻的sia̋n-pái。

現此時咱需要閣khah濟台語文作品，這嘛是我出版這本冊的動機，我kā 2002年到tann所寫的台語散文，tîng修改、整理出版。想beh為台語文主流化盡淡薄仔心力，想講文章已經出世矣，應該愛予人有機會讀著咱媠khuì的母語文學作品。

冊內面有我的囡仔時、有我成長的痕跡，有故鄉的人、事、物，雖bóng是我個人的記憶，嘛是咱走揣台灣的生活、文化、歷史記持的線索。有2、3 篇雖然是用小說的筆法寫，m̄-koh寫的攏是誠實的代誌，m̄ 是虛構的故事。生活佇台灣的咱，若有看重咱家己的過去，會予咱閣khah要意、珍惜咱的現在，進1步思考咱台灣的未來。

用母語思考，書寫家己、走揣家己，書寫現代生活事事項項，kā 去hőng鉸斷的喙舌揣倒轉來，是偌nī-á幸福佮幸運的代誌。期待閣khah濟人做伙行入台語的花園，大細漢做伙kā 台語講倒轉來。講台語、寫台文，台語現代化、文字化，歡迎逐家鬥陣來！

顯示全部內容

踏話頭

第一pha　社會觀察
01．行入冊店
02．做伙來讀《鳶山誌：半透明哀愁的旅鎮》
03．賣菜坤仔
04．歡喜婆仔的哭聲
05．我聽著花開的聲
06．我m̄-bat 你，m̄-koh 我足多謝你

第二pha　成長痕跡
07．Tshiau 揣阿爸的形影
08．斑芝花樹的聯想
09．冬瓜的曼波
10．西瓜的曼波
11．金瓜的曼波
12．虎頭埤的青春戀

第三pha　生活記事
13．古道三溫暖
14．都市做穡人
15．走揣春天的跤跡
16．游泳池的làu-khuì代
17．赴山佮海的約會
18．熱人的季節
19．落難天使
20．二九暝
21．逐家攏平安
22．天上山行春
...

顯示全部內容