施足珠

【卷一 等待天光】
春光 18
樹頂的音樂會 20
夏蓮 22
早秋 24
走揣秋天 26
遠行 28
冬節出日 30
九蛙望天 32
等待春天 34
窗外 36
答案 38
起飛 40
想你 42
我佇遮 44
稀微的校園 46
爾爾 48
敨氣 50
起鼓 52
憶情 56
了後 60
全民運動 62
咱的夢 66

【卷二 方寸之間】
意樓懷古 72
石重 76
雨樹 80
阿里．茶鄉．茶香 84
米鄉他里霧 86
兜 88
方寸之間 92
傷 94
上媠的風景 96
鐵道心森活 98
鐵道‧櫻花‧さくら的夢 102
油桐花 106
重遊舊山線 108

【卷三 渡鳥】
渡鳥 114
年年 116
Truku的彼領媠衫 118
看歌仔戲 120
你的笑容 122
閣再見一面 124
鎖匙圈仔 126
紀念日 130
味 132
裱框 134
船期 136
酸酸 138
尾幫車 140
紅花 142
花謝花開 144
聽講思念有聲 146
種一欉樹仔 148
續緣 150
水泱 152

【卷四 愛情鹹酸甜】
豔遇 156
顫 158
弱水 162
初戀的滋味 164
失落 166
披衫 168
蛻變 170
你的眼神 172
咖啡 174
沉醉月光海 176
私奔 180
落字 184
春仔花 186
靠山 190
山頂風景 192

【卷五 愛情鹹酸甜】
六六 196
享受 200
屘仔囝 202
烏狗兄 204
煞戲 206

 

自序

關於冊名「渡鳥的影跡」

　　「渡鳥」，是這本詩集其中的一首詩，這首詩對我來講，有非常特別的意義。這首詩入選臺南市政府文化局出版的《臺江臺語文學》，嘛入選為著響應臺南建城400年，臺南市政府〈台南400〉的活動，開朗雜誌事業有限公司舉辦《台語新詩代》甄選出來的前50首優秀詩作的其中一首。這對台語詩界的菜鳥仔的我來講，是非常大的肯定佮鼓勵。另外，嘛會使講是我自高中離開故鄉讀冊、出社會一直以來的心情。「渡鳥」這首詩上表面的內容是咧講自國外來到臺灣的新住民的心情。用一个閣較寬廣的視窗來看「渡鳥」這兩字，「渡」有移動嘛有提升的概念，「鳥」是移動的彼个主體。每一个主體意識中，佇時間、空間、事件之間的流轉，會產生濟濟無相仝的經驗感受佮意義感，這意義感，會有人類相通的普遍性，嘛會有個人的特別性。

　　所致，若是換一个角度來看，「渡鳥」這首詩，詩的內容毋但是講坐佇台北車頭若渡鳥定期歇倚的新住民，嘛會使講是佇世上帶著鄉愁為生活拍拚的每一个人，另外，這首詩嘛是咧講我家己。

　　而且，本詩集是圍著「移動」佮「等待」做本詩集的主體意識。跤步輕輕重重的渡鳥，親像蘇東坡寫的彼句『人生到處知何似，應似飛鴻踏雪泥。泥上偶然留指爪，鴻飛那復計東西。』所有的過程總會留下種種深深淺淺的痕跡，動靜之間，有的永遠銘刻佇遐，有的像浮雲聚散，心總是會有啥物等待佮期待。所以，這本詩集，就用「渡鳥」佮伊所有行踏過的「痕跡」的意象來號名做《渡鳥的影跡》，詩集中的題材就用生活中的各種事件佮感想，佇我這本處女作內底做一个記錄佮紀念，親像記錄我這隻渡鳥佇每一个人生風景的體會，成做是共留--落來的影跡。

　　台語是非常多姿多彩的語言

　　佇我的心中，語言是一个共和國，內底有真濟組合佮變化，仝國的人相拄會非常自然講家己人聽有的話，無仝國的人相拄會自動調整頻率講對方聽有的話。語言嘛是一个生態系統，有千變萬化的風貌佮演進。所致，佇咧寫詩的時，腦海內響--著的發音系統，是愛用故鄉鹿港泉州音抑是人講優勢腔的漳州音？我佮仝故鄉的人會講鹿港泉州音，佮外埠頭的人會講的漳州音，這兩種音佇頭殼內不時咧相戰嘛不時咧協商。最後，我認為其實毋免遐爾傷腦筋。佇台灣，台語的互相透濫是生活中若啉水遐爾自然的代誌，毋管是漳泉濫，抑是文白透濫，或者是外來語出現佇台語之中，重點是聽有較重要。而且，配合寫詩時有我本身想欲表達的意境，以及凡勢欲掠韻尾予詩唸--起來感覺較雅氣，所以我有時陣會用泉州音嘛有時會用漳州音佇腦海中寫詩，有的詩猶會摻濫幾句仔外來語，對我來講，寫詩，是一件非常有意思的代誌。

　　目前台語定定予人感覺無人緣的所在是字，雖然大部分的華文佮台文是相仝的，不而過，嘛是有真濟字予人看無，或者是字佮發音予人鬥袂峇，常在有「原來這个音是這字！」的驚嘆。這嘛是我佇這本詩集的每一首台語詩附上錄音檔的起心動念所在。雖然，我毋是一个專業的朗讀者，毋過，以作者本人的立場出發，共寫詩時的心情唸予讀者聽，是我上大的誠意。

　　另外，台語是發音佮聲調兩種系統互相配合的語言，tsit-tsui（鹿港音「遮的」的意思）台語詩的發音，就親像前文所講的，淡薄仔語言共和國，毋過，聲調攏是鹿港腔為主。請讀者聽看覓，鹿港腔的聲調有偌爾仔優雅。而且，佇遮爾濟詩的音檔當中，嘛有筆者故意囥的小心思，內底有幾个仔所在的發音，有鹿港腔的ir韻母佮er韻母，請讀者咧聽的時罔揣看覓，這嘛算是另外一種讀這本詩集的趣味。