歌仔冊ê心適代-FindBook 找書網 ISBN:9786263930490

圖書名稱：歌仔冊ê心適代

本書《歌仔冊ê心適代》簡介：
「心適代」是「心適(sik)、有趣的代誌」。本書是作者把三十年來研究歌仔冊的心得，選擇其中比較有趣的內容，從各種不同的角度介紹有關歌仔冊的常識與知識。期望構成一个「科學性、有體系的學問」，也就是「歌仔冊學」。
歌仔冊是1920~1960年代道地的「語文合一」的台語文學。其書寫的特色是大量用漢字來把唸歌的聲音標音（如今日的羅馬字）記錄，開口唸唱就是韻律美妙的「阿母的話」的口頭文學。本書用「漢羅台語文」書寫，採用故事性的、輕鬆的語調與讀者共享。對於歌仔冊語詞的音、義盡量解釋清楚並注音，使讀者能夠唸出純正的台語，以保存已經消失或正在消失的純正的台語。閱讀本書，不僅學習美妙的台語，增加生活樂趣，更可作為寫作台語文學的參考。
本書適用於：台語文學友志、歌仔冊研究者、台語教師進行唸歌教學者、台語文學史的建構者、想了解歌仔冊的學者。

作者簡介：

施炳華(1946~ )
出生於彰化縣鹿港鎮。專研詩經、台語、南管、閩南戲曲、歌仔冊。長期從事台語的研究與推廣。國立成功大學中文系教授退休，成功大學台文系兼任教授。曾擔任台灣歌仔冊學會第一、二屆理事長。
得獎：榮獲2000年行政院文建會「文耕獎─特殊優良地方文化人員」母語推廣獎，是台語類惟一得獎者。2014年教育部本土語言閩南語傑出貢獻獎。
歌仔冊著作：1.《台灣歌仔冊欣賞》(《寶島新台灣歌》、《茶園挽茶相褒歌》、《臺灣義賊新歌廖添丁》附CD三片，2.《歌仔冊欣賞與研究》。3.施炳華．蕭藤村．張屏生編述《《臺灣義賊新歌廖添丁》研究》。4.《閩南語梁祝故事的劇本與歌仔冊欣賞》。論文數十篇。
網站：國立台灣文學館「台灣民間文學歌仔冊資料庫」主持人，2011年開播。http://115.43.193.213/bang-cham/thau-iah.php

推薦序

Kiâⁿ ǹg「歌仔冊學」ê大門
丁鳳珍 Teng Hongtin
國立台中教育大學台灣語文學系副教授

歌仔冊是咱台灣ê文化寶庫，研究歌仔冊是真要緊閣有意義ê khang-khòe。Che是2001年施炳華老師鼓勵Hongtin ê博士論文做歌仔冊研究hit時講ê話。Hit時Hongtin雖bóng手頭有買幾本á歌仔冊，m̄-閣，對歌仔冊無siáⁿ了解，炳華老師提供真chōe歌仔冊ê文本kap研究資料，幫chān Hongtin緊緊建立「歌仔冊學」ê專業智識，2005年春天chiah ē-tàng完成博士論文《「歌仔冊」中的台灣歷史詮釋──以張丙、戴潮春起義事件敘事歌為研究對象》。Hongtin來國立台中教育大學台灣語文學系做助理教授liáu後，炳華老師tiāⁿ-tiāⁿ鼓催Hongtin繼續研究歌仔冊，liōng早完成副教授升等，chiah有2016年Hongtin升等副教授ê代表著作《《台灣民主歌》ê歷史詮釋kap國族認同研究》出版。Chit幾冬來，炳華老師不時鼓勵Hongtin繼續研究歌仔冊thang早日升等教授。炳華老師是Hongtin性命中ê貴人kap永遠ê學習對象，Hongtin是chiah-nī有福氣ê人。
1993年9月Hongtin se̍k-sāi施炳華老師，hit時Hongtin讀成功大學中文系碩士班1年á，去大學部聽炳華老師開tī中文系大學4年á ê台語課，炳華老師看Hongtin寫ê台語文學創作liáu後，鼓勵Hongtin繼續創作，閣撥工教Hongtin寫台語文。青春一目nih，1993年kàu taⁿ已經30冬。炳華老師piàⁿ做前，頂真骨力leh研究、傳承kap推sak咱台灣ê台語文kap歌仔冊資產，咱做學生ê人tòe老師ê尻脊後kiâⁿ，老師chiah-nī piàⁿ-sì，學生tio̍h-ài 閣-khah骨力chiah是。M̄-koh，chiâⁿ見笑，Hongtin tiāⁿ-tiāⁿ發見ka-kī ài學習ê所在是hiah-nī-á chōe，老師ê學問咱做學生--ê kài-sêng永遠tiō o̍h bōe透，咱tú有kóa進展，老師koh kiâⁿ進前去--ah！Hongtin教冊ê時，tiāⁿ-tiāⁿ kā學生講，Hongtin有夠好運，有hiah-nī chōe骨力phah-piàⁿ ê老師，che是促成Hongtin認真推sak台語文、頂真研究台語文學ê重要in-toaⁿ。
炳華老師是chiâⁿ頂真piàⁿ-sì ê學者，tī mî-nōa khe-khó ê論述中，koh充滿世間ê氣味，m̄-nā開闊咱ê學術眼界，iā為人生ke-thiⁿ心適kap趣味。相信掀開chit本《歌仔冊ê心適代》，你mā會有kāng款ê感動。Chit本冊m̄-nā是歌仔冊ê心適代，mā是「歌仔冊學」ê入門寶典，諸君若是beh知pat éng過咱ê先祖活過ê青春，歌仔冊是真讚ê門窗，phah開歌仔冊ê大門，傳承咱祖媽祖公ê智慧遺產，kat連咱台語人ê sim-chiâⁿ，咱lóng是有福氣ê台灣kiáⁿ孫。

顯示全部內容

作者序

台語歌仔冊是高貴ê語言
施炳華自序

俗語就是自細漢初初會曉分辨聲音ê時，uì四箍圍ê人學來ê語言。簡單講，俗語就是m̄免經過正式ê教育，uì爸母、厝邊頭尾遐學來ê hit種語言。

Uì俗語閣產生另外一種語言，羅馬人共伊稱呼做文言文（gramaticam；grammar）。這種語言，希臘人以及其他ê民族也有，毋過毋是所有ê民族攏有，因為學這種語言一定愛費真濟時間苦學才會曉，所以干焦少數ê人有能力運用這種語言。佇這兩種語言當中，俗語更加高貴，因為伊是人類上早使用ê語言，而且是全世界攏咧使用ê語言，雖然俗語分做無仝ê語系，發音佮詞彙各方面也無仝。俗語更加高貴ê原因，是因為伊是自然ê，啊文言是人造ê。咱想欲討論ê就是這種高貴ê語言。

咱kā十三世紀歐洲但丁（Dante）ê時代換做台灣200年來（1826-2023）ê台灣本土語言存滅ê情形來比並(phīng)，但丁ê論述值得咱重視。但丁講ê「俗語」是相對文言（gramaticam）──也就是拉丁文──來講ê，是指當地ê白話、母語、在地話、本土語言；佇台灣，「俗語」是相對文言、華語（國語）來講ê。母語是指講原住民語、台語、客語ê台灣人所講ê阿公阿媽、爸母傳落來的話；台灣人佇清朝統治時期是自由講家己ê母語；閣來受日本、國民黨統治時期，母語煞是受人phí--siùnn、liâm家己都看袂起ê語言。進入21世紀ê台灣，雖罔有「國家語言發展法」（2019年1月9日公布，國家語言是指「臺灣各固有族群使用之自然語言及臺灣手語」），m̄-kú，但丁「佇這兩種語言當中，俗語更加高貴」ê觀念，一般民眾敢有去想著？敢會去致意著母語（俗語）ê保存佮推廣？
母語（俗語）ê保存佮推廣，除了口說以外，閣khah重要ê是ài有文字ê記錄、母語文學ê流傳。台語書面文學ê資料tsiânn濟，其中有一種是用漢字書寫ê歌仔冊。歌仔冊是民間說唱「唸歌」（歌仔）ê文字ê記錄，也就是唸歌ê唱本。一百外年來民間流行ê唸歌、歌仔冊是民眾ê娛樂佮精神糧食，也是民間口語書寫ê一種文體，數量tsiânn濟，有3000本左右。
歌仔冊是冊讀khah無濟ê歌仔先（少數是讀冊人）唸歌予一般民眾聽、寫予𪜶(in)看ê ；M̄-kú，讀冊人看袂起這種物件、這種文體。
佇1920年到1945年台灣「新舊文學論戰」ê風潮中，有人主張學中國ê白話文，有人欲寫出台灣話ê文學。「文學是語言ê藝術」(高爾基[Maxim Gorky]《論文學》)。台灣人欲寫出台灣話ê文學，到底欲按怎寫呢？
1945年終戰了後，台灣予國民黨統治。Hit tang時王育德（1924-1985）佇省立台南一中（舊台南州立二中）教冊，受著台南市學生聯盟ê委託，替「遊藝會」寫台語ê劇本《新生之朝》，tsit个劇本是照歌仔冊ê書寫方式寫ê。學生看無歌仔冊定定出現ê借音字、俗字，王育德就逐句kā𪜶解說，學生嘛tsiânn認真用日本假名來記音。《新生之朝》佇台南延平戲院公演，suah引起轟動。
王育德後來佇日本摕著台灣人第一个語言博士。伊探討「歌仔冊在台灣文化史上的地位」，強調歌仔冊是「台灣人的文化遺產」：
要從台灣人被壓迫的歷史當中找出用台灣話撰寫的記錄，並不容易。幸好我們有一種絕無僅有的寶貴記錄，那就是歌仔冊。
清代的確已存有所謂的「台灣文學」。因為民間早已有了廣為流傳、觀賞的「歌仔」。「歌仔」是以漢字寫成的台語七言或五言韻文。……由於「歌仔」的語言是鄙俗的台語，發表的形式又是以表演為主，因此始終受到讀書人的輕蔑，無法獲得長足的發展。
歌仔冊是正港ê台灣文學，m̄管佇語音、詞彙、文學、戲劇、社會、宗教禮俗、歷史研究各方面，攏是寶貴ê資料；suah因為終戰後國民黨「推行國語，禁止講方言」ê政策、佮社會環境ê變遷，致使台語無受重視，歌仔冊已經遺失tsiânn濟，予人得欲袂記得looh。
國民黨佇台灣推行華語（國語）tsiânn成功，結局是足濟台灣人看輕家己ê母語，閣誤解母語是用講ê，無法度、無需要用文字書寫；若欲寫，kan-na ē-tàng用華語文寫。因為對母語ê生(tshinn)疏佮誤解，台語友志咧寫台語文濟少有摻濫一寡華語詞佮華語語法。歌仔冊是一、兩百年來民間滑溜溜、活跳跳ê口語書寫，若欲寫純粹、有祖先阿公阿媽khùi口ê台語文學，熟唸歌仔冊是tsiânn好ê方法。
我20年來沈迷佇歌仔冊中，對歌仔冊ê編作者、歌仔冊ê故事、歌仔冊鬥句押韻ê手路、研究歌仔冊ê鹹酸苦汫、「歌仔冊學」ê建立……濟少有淡薄仔心得，嘛感覺其中有tsiânn濟趣味ê代誌，就分類撰寫，每一篇用一、兩千字ê短文poo佇網站[鹿港ê的台語研究]參讀者分享；最後ka̋ 集做一本，號做「歌仔冊ê心適代」，「心適代」是心適(sik)ê代誌，ǹg望提供予台灣人、台語友志、台語文學友志、歌仔冊研究者、台灣ê學者做消遣，輕鬆閱讀，嘛對歌仔冊有khah深入ê了解。
Tsit本書ê寫作方式有兩个特色：第一是嚴格ê考證，對字詞意義ê 探討佮簡單ê說明，欲建立台語文用字ê合宜通用性；對歌仔冊版本ê比較考證，揣出歌仔冊ê原作者佮後來抄襲ê演變；對歌仔冊編作者佮地名ê稽考。第二是歌仔冊故事ê內容佮按怎講故事，tsit部份屬於文學創作，所以是每看一擺就改一寡仔，永遠袂滿意；嘛ǹg望參讀者分享、予讀者感覺心適。
閱讀本書，ài了解歌仔冊書寫ê特色：是欲唸唱予人聽，以聲音表達為主；定定用借音字，親像用羅馬字記音仝款。「編歌重韻不重義，盡皆借音用土字。唱歌體會一點意，詳細讀書就知機。」所以m̄-thang kan-na用目睭看，ài開喙唸（會曉唱iá khah好），ē-tàng順利唸唱，就有法度「體會一點意」，吸收歌仔冊ê精華矣。
Tsit本書初稿完成了後，請藤村兄鑑定。伊所建置ê「歌仔冊數位化」予我ê研究tsiânn大ê幫tsān，伊嘛對tsit本書ê字詞解說方面提供tsiânn濟寶貴ê意見；國立雲林科技大學漢學應用研究所柯榮三教授提供予我袂少罕見ê歌仔冊文本；鳳珍做全書ê編排佮校對……，濟濟ê台語、歌仔冊友志提供幫tsān佮鼓勵，我真是感謝萬分。
Tsit本書大大細細攏講著，講袂tsa̍p-tsn̂g，請讀者包涵並且賜教。

2023年10月施炳華寫佇台南惜陰齋

顯示全部內容

序一歌仔冊學當咧發穎　蕭藤村
序二 Kiâⁿ ǹg「歌仔冊學」ê大門　Teng Hongtin
序三　台語歌仔冊是高貴ê語言　施炳華自序
常用台語詞、華語詞對照表
合音詞簡表
凡例

第一章歌仔冊導讀
一、唸歌佮歌仔冊ê定義
二、歌仔冊ê價值
三、歌仔冊ê歷史
四、歌仔冊館藏佮私人收藏
五、歌仔冊ê版式
六、唸歌佮歌仔冊ê內容
七、歌仔冊ê特色

第二章認識(pat/bat)歌仔先
一、拜先話仙罔練仙
二、歌仔先梁松林一生ê剪影
三、蔡阿生賣藥仔
四、梁松林佮王秋榮
五、梁松林佮黃水返
六、梁松林佮陳春榮
七、洪筆佮洪月...

顯示全部內容