臺灣台語認證我上強1：伊索寓言

名人推薦：

推薦序1：做伙來學臺灣台語，予你輕鬆閣揣轉來較早的記持／新北市鶯歌區永吉國小校長　鍾信昌

　　俊陽是我的好朋友，閣較是我的臺灣台語指導老師，因為俊陽老師的指導，予我順利通過臺灣台語的中高級認證。《臺灣台語認證我上強1：伊索寓言》這本冊，是俊陽的新作，共古早的伊索寓言重新詮釋，予讀者佇欣賞故事的同時，嘛會當感受著臺灣本土語言的魅力和文化深度。

　　本冊收錄真濟經典的伊索寓言故事，而且用臺灣台語的形式呈現，予讀者會當用母語來理解遮的寓言故事的智慧。逐个故事攏有活潑的插圖，吸引讀者的注意力，予故事閣較趣味。對〈烏鴉啉水〉到〈龜兔走標〉，逐个故事攏有深刻的道理，予人反思生活中的種種情境。

　　臺灣台語成做臺灣的國家語言之一，承載豐沛的文化佮歷史。冊中使用的臺灣台語毋但紲拍閣自然，閣保留誠濟地方特色的用詞和表達方式，予人感受著厚厚的鄉土氣息。對臺灣的讀者來講，按呢的語言呈現毋但會當引起共鳴，閣較會當喚醒對家鄉的思念佮認同感。

　　伊索寓言上出名的是用簡單好捌的故事情節和深刻的道德教訓來寫故事。本冊當中的逐則寓言攏無例外，無論是〈狼來矣〉的警示，猶是〈龜兔走標〉的啟示，攏予人明白佇生活中應該按怎面對挑戰和困難。遮的故事毋但適合囡仔閱讀，嘛對大人有重要的啟發意義。透過遮的寓言，讀者會當學會曉按怎佇生活當中做出巧的選擇，而且理解誠信、拍拚佮友誼的重要性。

　　佇全球化的風氣內底，足濟地方語言面臨消失的危機。《臺灣台語認證我上強1：伊索寓言》毋但是一本故事冊，閣較是一部文化傳承的作品。伊予少年輩佇閱讀當中接觸臺灣台語，了解臺灣的文化背景，而且起致他們對母語的熱愛。按呢的冊對保護佮傳承臺灣的語言文化有重要的意義。

　　這本冊毋但適合規家口仔做伙閱讀，嘛是學校臺灣台語教育的輔助教材。老師會當利用遮的寓言故事來引𤆬學生進行道德教育，幫贊他們理解日常生活的價值觀佮倫理觀。透過討論故事內底角色和情節，學生會當閣較深入思考家己的行為佮選擇，培養批判思考和道德判斷的能力。

　　總的來講，《臺灣台語認證我上強1：伊索寓言》是一本值得推薦的好冊。伊毋但予讀者享受著精彩的故事，閣會當佇學習著生活內底的智慧和道理。這本冊是對臺灣台語文化的珍貴詮釋，也是對伊索寓言的現代化的再創作。無論是對佮意閱讀的囡仔，猶是對想欲了解臺灣文化的大人，這本冊攏是一本袂當欠缺的好作品。向望閣較濟人會當透過這本冊，感受著臺灣台語的媠，佇故事內底揣著生活的啟示。

------------------------------------------------------------------------------------------

推薦序2：看故事練臺灣台語／「活水來冊房」版主、新北市三峽區龍埔國小教師　黃震南

　　以早，臺灣台語演講、朗讀的評審定定私底下咧譬相，講遐的選手上台比賽，個個開喙袂輸竹管倒豆削削叫，內容嘛講天講地一粒一；毋過歇睏時間經過選手歇睏室，煞聽著選手佇內底哩哩囉囉開講攏咧落華語，才知影選手的臺灣台語齊是暗唸出來的，予評審感覺這个頭名評了足毋甘願！
　　
　　所以佇2020 年，全國語文競賽第一擺佇學生組舉辦本土語「情境演講」比賽，替換往過的「背稿演講」，真正共「素養教育」佇比賽做較到。

　　情境演講比賽的規則是：選手會先抽鬮抽著一張圖，彼幅圖是四格的bàng-gà，選手有半點鐘的時間會使準備，才上台講故事，講了閣愛接受評審的提問。會抽著啥物圖、評審會問啥物問題，事先攏毋知，拄著按呢的比賽，若閣照抄過去背稿的方式訓練，真正是「剃頭店歇睏──無你法」，這完全愛靠內才的。

　　已經實施十外冬的臺灣台語認證，更加愛靠實力；毋但愛會曉講，閣愛聽有、看有、讀會出來、寫有路來，遮的攏愛捌透透。真濟人干焦想著欲去考認證，頭殼就𢯾咧燒：這是愛按怎準備啦！

　　有拜有保庇，有食藥有行氣；語言的底蒂雖然無法度速成，毋過經驗的累積，其實是會當對症下藥，予你對本來講話袂加圇，成做一个袂輸吳樂天的講古仙！

　　俊陽老師的這本《臺灣台語認證我上強１：伊索寓言》，是一帖良藥，用「看圖講話」加味，專門治療「認證」的「症（證）」（臺灣人講話，袂當無帶諧音的笑詼）。有畫家畫出古錐的圖，而且選用大人囡仔攏佮意的《伊索寓言》的古，攢足濟題型予你練：有看圖講話、情境演說、文章朗讀、閱讀測驗、語句書寫。

　　雖然對2025 年開始，語文競賽的情境演講題目，換做用文字講一个大約的情境，廢除四格bàng-gà 的題型；毋過，用四格bàng-gà 去擬定故事的粗坯，遵照「起承轉結」的段落來節時間，猶原是真好用的idea。佇遮，我用訓練過國賽選手的經驗，趁這个機會共逐家分享一下，看著情境欲編故事的一寡撇步：
一、先愛有時間、地點、人物。看圖講話的bàng-gà，通常有留一个鼻目縫予你知影是啥時間，可能是時鐘、曆日、日頭抑是天色。若有畫囡仔佇學校，就準做拜一至拜五，若是佇外口𨑨迌，就準做拜六禮拜。人物你會當講「我」，嘛會當共伊號名，毋過千萬毋通叫「小明」，彼是華語的語法，著愛叫「阿明」。
二、若是認證，講話錄音時間干焦一分鐘，毋免編傷濟對話；若是情境演講，國校組上無嘛愛講兩分鐘，所以我建議每一格（每一段）攏安排予人物有一句對話，按呢才袂講無到時間，而且有對話，故事毋才聽著有趣味。
三、若是故事講完，鈃仔聲猶袂霆，就趕緊閣加一段心得感想，可比講「經過這件代誌，阿明感覺……」，共故事牽到鈃仔聲霆為止，按呢才袂佇時間予人扣著分。以上三點愛注意的所在，予逐家做參考。
　　有俊陽老師做你的教練，出題予你實戰，較贏家己戇戇仔看臺灣台語連續劇，聽彼號半桶師的臺灣台語，就準做有咧做準備。人講：「拍一擺，較贏學九館」，若照這本「祕笈」一頁一頁沓沓仔練，臺灣台語一定會進步甲有看見。