客俳風 第二集

歡喜作家夢成真/張捷明   3
《客俳風》第二集 風風光光出場囉～/傅滿全   5
《客俳風第二集》愛出版囉！/邱一帆   7
自序/彭碧珠   9
目錄   16
王興寶 (四縣腔)   20
申梅蘭  (四縣腔)   26
仰心 (海陸腔)   32
李秀鳳 (海陸腔)   35
李清來 (四縣腔)   41
宋勝綱 (四縣腔)   45
吳英虹 (四縣腔)   51
吳麗玲 (四縣腔)   54
林勝男 (海陸腔)   57
林錫霞(四縣腔)   64
邱一帆(四縣腔)   69
邱春英(四縣腔)   72
邱碧蓮 (饒平腔)   77
洪仁銘 (海陸腔)   80
徐玉香 (四縣腔)   86
徐儀錦 (南四縣腔)   88
陳品融 (四縣腔)   94
陳美銀 (海陸腔)   100
陳美鳳 (四縣腔)   103
陳秋梅 (海陸腔)   107
陳秋樺 (海陸腔)   114
莊紅如 (四海腔)   117
張旭英 (四縣腔)   120
黃六 (海陸腔)   124
黃坤盛 (海陸腔)   130
黃有富 (海陸腔)   135
黃智柔 (海陸腔)   138
黃淑媛 (四海腔)   141
黃碧清 (北四縣)    146
彭月春 (海陸腔)   150
彭宇禎 (四縣腔)   157
彭碧珠 (海陸腔)   164
傅桂英(海陸腔)   171
傅滿全 (海陸腔)   175
廖惠貞 （四縣腔）   179
劉世發(海陸腔)   183
劉邦淦 (海陸腔)   190
劉純汝 (四縣腔)   194
劉楨(四縣腔)   197
蔡捷林 (河婆腔)   199
蕭鴻鈞 (四縣腔)   202
羅牡丹 (海陸腔)   207
羅金珠 (海陸腔)   212
羅碧珠 (海陸腔)   217
饒維星 (四縣腔)   225
主要節慶
「過年」節慶精選22帖   228
「元宵節、天穿日」精選20帖   231
「清明節」主題精選20帖   234
「端午節」精選20帖   237
「母親節」精選20帖   240
「父親節」精選22帖   243
「七夕情人節」精選14帖   246
「中元節」收錄14帖   248
「中秋節」入選24帖   250
「教師節」精選20帖   254
「九九重陽敬老節」精選20帖   257
冬節接龍［尾駁尾－單字接龍］收錄20帖   260
創意俳欣賞
對比俳分享   263
個人組俳欣賞   266
客家俳句接龍   269
作文俳欣賞   272
［創意俳歌］欣賞區   283
社團簡介及展望   299
棚下兩三事
《客俳風》─書名个由來   304
「楓葉」摎「俳詩」之間个聯想   304
「俳園週年慶」个鬧熱情景，使人大感動   305
［小朋友寫俳專區］來囉！來囉！   308
俳園再添577格式个俳句書寫單元   312
介紹沙鼻嫲─大碧珠个一帖拙作   314
掀起「客俳風」浪潮个一群「瘋俳客」   315
期待美夢成真   315
後記   316

 

自序

客俳風第二集總算順利出世囉

　　自古以來，華人社會个生活中，都輒常會聽著這兜詞──「有失必有得」、「捨得，捨得！有捨正有得」、「團結力量大」、「歸心做事，心專石穿」、「惡手毋當倆」、「敢去，一擔樵；毋敢去，屋下愁」、「有一就有二，無三不成禮」……總講一句，對我人來講，就係：盡力發揮客家人个硬頸精神斯著咧啦！

　　自《客俳風》頭飆仔經由阿六先生精心排版、全力催生問世後，大碧珠在感恩佢之外，心肝肚就偷偷仔恁樣想：將這兜作者群認購个錢額準做「母錢」，乜就係日後出第二集个基本經費。假使，為了大量推廣，第二集頭一刷斯愛印兩千本，該就著著愛煞猛去募款，還過向「客家公共傳播基金會」申請補助出書經費囉！

　　2022年7月27日，總算等著「客傳會」初審核准補助五萬台幣个通知咧嘍！這係一隻值得慶賀、歡喜合感恩个好消息，乜係對大碧珠還過所有作者个一隻肯定摎鼓勵哩！續下來，印刷經費不足額，愛對哪位仔尋呢？哎呀呀～～仰結煞？仰結煞？大碧珠開始傷腦筋囉！

　　毋怕！膽在在，便行便看，奇蹟毋會無理由降臨，但係，只愛吾理想摎精神係正確个，定著會打動人心，吸引愛客人士个矚目摎資助。果然，在7月31日个歡迎「僑務委員會 童委員長」宴席上，大碧珠拿出《客俳風》頭飆仔分在座个「德班客家會 」王理事看……續下來个連連驚喜，正實當分人感心！總之，為了莫引起比較心，吾贊助名冊就照善心大德个姓氏排列喺！

　　感謝德班客家會成員 王理事源新先生、林總孟丞先生、張秀華女士，以及澳洲客屬聯誼總會 伍總會長其修先生、非洲客屬聯誼總會 羅總會長應肇先生个愛客捐助！承蒙佢兜！恁仔細！多謝！

　　人講啊──有錢好辦事──等出書用費、各項正當開銷後个餘額，就留做《客俳風》第三集个出書基金之一。期望這般優質个愛客凝聚力，做得一直恁樣良性循環下去！

　　好溜！好溜！接下來，大碧珠還愛來承蒙感謝个長輩、先生、好朋友，係：

　　1.承蒙發行單位－［新竹縣海陸客家語文協會］个大力協助。感謝黃文斌總幹事，不辭辛勞，協助文書往來个作業。

　　2.承蒙出版單位－［世界客家出版社］協助推廣事宜，同時，也盡承蒙張加君總編个從中協調，處理繁瑣个溝通事務。

　　3.承蒙張捷明老師、邱一帆老師、傅滿全先生个挺力為序！實在還好哦，有佢兜个「鬧棚頭/渡頭導讀」，實在盡榮幸合感心！

　　4.承蒙文友林佩姬个一路相挺－感謝佢輒輒分𠊎貼心建議摎鼓勵！

　　5.承蒙［台灣俳句客家定型詩園地］發起人之一洪仁銘先生四處奔走上電台、電視節目，竭力為《客俳風》打廣告，煞猛推廣客俳个可貴精神。

　　6.承蒙版主同仁林錫霞、邱鴻春、洪仁銘、陳品融、黃坤盛、劉世發、蕭鴻鈞、羅金珠、羅碧珠等先生个協力處理社務，以及像黃六、彭月春、邱春英、廖惠貞、徐儀錦、張旭英、羅立喬……多位先生个熱心支持摎無私付出！

　　7.承蒙俳園肚所有作者群摎所有園地家人个齊心投入－有作者群賣力个美作演出摎園友个掌聲鼓勵，係大碧珠頭擂擂仔煞猛打拚个動力來源啊！真心期待遽遽還有《客俳風》第三集个到來……

　　8.承蒙阿六先生為俳園設置頻道，並後製百零隻影音提供讀者、愛客人士點閱欣賞俳句之美！同時乜盡承蒙恁多參與朗讀、吟唱个美聲先生！有大齊家个協力合作，優美个俳句作品正有聲有影个呈現在Youtube頂高，分享到世界各地去哩！

　　9.承蒙大碧珠自家屋下人－因致愛配合吾理想早日達成，吾子女乜已貼心鼓勵合支持這盡有意義个寫俳、練俳……佢兜講：「媽咪歡喜做斯好！祝福社務 一切圓滿順序！」

　　10.承蒙在俳園肚暗中監督个前輩、長官、先生儕-往好處想：無盪聲，就表示係「恬恬支持」，係「樂見其成」！故所，大碧珠更愛認真堅持下去……相信俳園也好，創意園區也好，作者群定著會好好發輝各儕个文思長才，繼續練寫，並創作出一簇簇靚靚个俳詩花蕊來！

　　最後，大碧珠還係愛說明一下：雖然係第二擺擔任主編，毋過，這擺係黃六先生放𠊎學習單飛……排版工作交由「毋曉客文个印刷廠頭家去安排」有影已辛苦溝通吶～～所以，萬一書中有缺字不足之處，都愛懇求大家多加包容喺！還過，假使，看官您手捧這本書讀後，試著有影已嫌毋得，該斯拜託也幫襯煞猛推廣分若親戚朋友知哦！祈祝有朝一日，這般簡潔幼秀个俳詩，能夠為客家文學掀起另一波浪潮，使致俳句成為「國民詩」个理想早日實現！

　　加油！大家共下來煞猛加油！祝願俚「四海大平安」个客家美聲、客家美食、客家文化，全全做得飄洋過海，名揚全世界！

　　大碧珠在嚴峻疫情中，致力推廣客俳个「心路歷程」：
　　*初見《客俳風頭飆仔》（前年底發行；今年2月正見面）
　　第一集～：前年尾發行/苦等年零个思戀/日夜夢迴纏
　　空寂等待：疫情莫錯怪/鎖國郵寄無恁快/耐心再等待
　　歡暢見面：捧核頭飆仔/對歲過後正見面/感動萬萬千

　　*《客俳風第二集》（再擔任主編，暗愐一路多坎坷）
　　第二集～：辛苦來催生/阻隔編輯困難煎/硬擔毋敢呻
　　電腦老舊：一來機能老/操作徙步慢趖趖/網速跟毋著
　　毋敢換新：二來心驚虛/南非電腦 A B C /尋無ㄐㄑㄒ
　　電力中斷：三來常停機/基礎電力無治理/一日恬三輪
　　老身欠安：四來打疫苗/過敏烏青血壓飆/身體佇毋著
　　懷疑著症：五來咳咳嗽/好得檢驗非確診/無事正安枕
　　驗血正常：西醫無效益/換看中醫除壓力/打坐有幫利

　　*訴說從前个麵線溜啊煞，續等紹介新書內容……
　　感謝賜序：承蒙捷明師/勉勵新手勤用心/作家夢成真
　　序說客俳：承蒙滿全師/點出新書特色處/領讀多幫助
　　客俳入門：承蒙一帆師/貼心解說仰寫俳/嘉惠新讀者
　　主編自序：承蒙賜序師/各有留兜細罅縫/分後學添句

　　*欣得45個作者賜稿，共力成就這本續集……
　　排列順序：照姓名筆畫/阿寶老師來領頭/饒先生顧尾
　　簡介心得：分享個人事/寫俳經歷摎趣味/讀儕更親切
　　俳句特色：年年如一日/朝朝紀錄好心情/人生有意義
　　心血結晶：喜樂共同嚐/拋開煩愁迎歡暢/幸福俳高唱

　　*12隻節慶主題精選，感受客家傳統文化之美……
　　上元祝福：元旦接春節/過年月半後清明/家戶齊祝福
　　中元祈福：端午後酷暑/誠心普渡拜神豬/祈求平安符
　　下元安福：八月平安戲/中秋敬老重陽祭/十月還福喜
　　家庭日～：阿姆阿爸節/國際按日跈慶祝/八八乜記得

　　*熟練寫俳後，創意陸續活活生，搞俳王帶領……
　　創意單元：生動搞俳趣/對比寫作開新例/各家竅門啟
　　個人組俳：一題合連組/補足單俳不盡意/妙趣貼歸排
　　搶答接龍：寫手文思湧/打字手腳乜愛準/尾駁尾比勇
　　練作文俳：習文重底蘊/平鋪直敘係基本/情意境兼顧
　　搞俳王～：黃六先生慶/犯規示範受歡迎/結舌俳乜湛

　　*欣慰客家俳句社團，看等緊鬧熱起來……
　　俳園上崁：崁頂四圍望/客俳漸漸受重視/寫手真的當
　　寫氣正盛：寫手毋使多/勻有十儕會唱歌/逐日賞俳樂
　　棚下吹笛：樂見三兩事/寫寫又係大拖拉/啦歌又哩曲
　　模範作者：春英帶惠貞/品融先生鼓勵多/版主儕奏樂
　　貼俳名家：春妹細碧珠/儀錦旭英秋梅寫/鴻春世發和
　　熱情粉絲：當湛年修師/立喬先生勤回詩/佩姬乜入圍
　　撳讚大隊：園友支持度/收著俳園感謝狀/頻率會講話
　　驚怕漏失：統計難真確/萬一漏記失公平/下集補褒您

　　*《客俳風第二集》總算催生出來咧！當感動……
　　文圖並茂：靚圖二百張/美俳淰淰千零帖/書賁320頁
　　影音對照：真人朗讀聲/歌王歌后吟靚韻/頻道賞風采
　　一兼二顧：讀俳兼認字/有聲有韻跈學習/客話大進步

　　*推廣客俳，委播客家文學細花蕊个最終目的……
　　前進校園：逐俳簡短詩/十七十九正三句/適合校園趣
　　期待圓夢：支援先生儕/教客教材妙輔助/人手一本用
　　推廣客俳：俳句入門遽/期望大眾肯認同/全民腦運動
　　蔚為風氣：客俳風浪潮/四圍八向弛往轉/口出好文章

　　*呼籲傳承个急迫性，望有後生志工共下來打拚……
　　永續經營：非營利志業/需要年輕力足者/熱心翻新頁
　　理想未來：祈望客家人/自動自發來經營/文化共傳承
　　
　　聯絡人～：pichu6919@gmail.com 大碧珠歡迎你！