臺灣島。海岸詩

佮唸謠相閃身 ／路寒袖（知名詩人作家）

康原蹛彰化，我徛踮臺中，兩个人會使講是隔壁親家，所以定定會佇一寡文化機關、學校舉辦的文學活動相拄，像文學營、文學獎評審佮頒獎典禮、開幕記者會、新冊發表會、演講等，抑是文友的聚會，差不多攏會鬥陣。
捌康原的朋友攏知影伊是臺語童謠、俗語的高手，不只對傳統的了解誠深入，幾十年來伊嘛創作出濟濟的歌謠作品，所以一粒頭殼若親像攜帶式的點唱機咧，伊會斟酌現場的氣氛佮狀況，唱一、兩塊逐家熟似閣生份（意思是聽起來誠親切，但是家己攏袂曉唱）的歌謠。一般來講，文學活動總是比較靜態，比較閉思，比較嚴肅，毋過只要有康原在場，氣氛絕對是鬧熱滾滾，袂輸是臺語唸歌的小型發表會。
康原的創作量大閣多元，到目前為止已經出版了八十偌本各種的冊矣，基本的文類像詩、散文，伊的詩華語、臺語攏有，臺語閣分一般詩作佮囡仔詩。康原對地方文史、民間信仰嘛誠有研究，所以伊也寫足濟本報導文學，報導文學不比一般的文學創作，會使覕佇冊房寫稿就好，彼是愛跤踏實地去現場田野調查的，我共算算咧，康原的報導文學著作有十偌本遐濟，可見伊的行動力有偌驚人。康原的作品內底有大部分作家攏無的文類，彼就是鄉志，伊捌參與彰化縣芳苑鄉、臺中縣烏日鄉的鄉志撰寫，展現出伊的地方文史功力。
康原閣有一項特別的著作，就是佮藝術家的共同創作，合作的對象誠多元，有音樂家施福珍、攝影家許蒼澤、雕塑家余燈銓、畫家施並錫……，舊年（二○二○）和攝影家郭澄芳做伙出版了《臺灣水塔地景風貌》，佇臺灣你若看對窗仔外出去，厝頂就全水塔，這个誠本土、常民的題材進前佇國藝會的藝文出版補助審查的時，得著全數評審委員的肯定。
這擺，康原合作的對象是攝影家許萬八，延續著頂一本《臺灣水塔地景風貌》臺語詩配合攝影的形式，主題換做臺灣的海岸，詩集名為《臺灣島。海岸詩》。
臺灣是歐亞大陸板塊和菲律賓板塊相激產生了造山運動所形成的，不只有豐富多變的懸山地形，本島的海岸線就有一千兩百公里，若加上外島就超過一千五百公里矣，免講嘛知影誠迷人，尤其是許萬八的攝影色彩飽滇，有的若油畫，有的像粉彩，艷麗之中摻著奔放的熱情，敢若共海岸幔一條浪漫的絲仔巾。
面對遮爾仔媠的景緻，咱來看康原是按怎發揮伊的臺語詩作：

人佮人的　交流
愛圓滿　人生的難關
攏會平安度過
關渡的人
看橋跤的水恬恬
流過　淡水河
―― 〈橋邊交流道〉

交流道大部分攏是圓的造形，會使用交流道就是車，車是人咧駛的，這首就因此聯結到人和人的互動交流，重要的是愛圓滿，像交流道圓的造形，圓滿才是渡過難關的關鍵。
仝款這種人際和諧的思想猶有：

人佮人做伙　愛和平
島上的　涼亭
清風　吹過來
―― 〈亭仔跤〉

寫和平島的涼亭，巧妙應用地名「和平」，點出人佮人的做伙若是會當和平鬥陣，人生才會坐踮涼亭內，閣再有清風吹過來。
因為是海岸，所以這本詩集內底寫著四个所在的燈塔，分別是鼻頭角、墾丁、高雄旗津、三貂嶺，佇這四首詩作內，除了旗津彼首，其他三首攏共燈塔比喻做「目睭」，「佇鼻頭／裝上目睭」〈鼻頭角燈塔〉，「守佇墾丁烏暗暝的／燈塔 是南臺灣海岸的／目睭　透出關懷世間的眼神」〈墾丁燈塔〉，「福爾摩沙上東爿　三貂嶺／燈塔對大海 談情說愛／海邊看守　臺灣的目睭」〈三貂嶺燈塔〉，目睭是予世界現形的鏡頭，是看著危險、交流表達感情上蓋直接快速的接收器。
這本詩集猶有予人驚喜的一輯《生態之歌》，記錄著各種鳥仔，嘛有花跳、砂馬仔（招潮蟹）等，展現出臺灣海岸活跳跳的生態現象。
康原和許萬八聯手，予咱掀開這本冊的時，影像配歌詩，烏白的文字配彩色的攝影，無聲的文字變有聲的海湧，風講古、雲穿衫、鳥仔唱歌。
我佇二○○九年和二○一九年兩度、各一年擔任彰化師範大學的駐校作家，期間閣逐年攏固定去為專業學程授課，會使講三不五時落咧走彰化，逐遍對七十四號快速道路進入彰化彰南路，中途我就想著，康原就是蹛佇倒爿的山坡頂啊，想到遮，伊的臺語唸謠自然就飛入我的車內，十外冬來，我竟然一直攏佮康原的唸謠相閃身。

佮唸謠相閃身 ／路寒袖（知名詩人作家）

康原蹛彰化，我徛踮臺中，兩个人會使講是隔壁親家，所以定定會佇一寡文化機關、學校舉辦的文學活動相拄，像文學營、文學獎評審佮頒獎典禮、開幕記者會、新冊發表會、演講等，抑是文友的聚會，差不多攏會鬥陣。
捌康原的朋友攏知影伊是臺語童謠、俗語的高手，不只對傳統的了解誠深入，幾十年來伊嘛創作出濟濟的歌謠作品，所以一粒頭殼若親像攜帶式的點唱機咧，伊會斟酌現場的氣氛佮狀況，唱一、兩塊逐家熟似閣生份（意思是聽起來誠親切，但是家己攏袂曉唱）的歌謠。一般來講，文學活動總是比較靜...

臺灣島。海岸詩／ 康原

佇十六世紀葡萄牙人咧行船，發見咱个臺灣島，開喙喝著「Formosa」，意思是講「美麗个島嶼」，這粒島嶼四邊攏是海，親像一隻海翁踮大海中浮浮沉沉咧泅水。臺灣算起來土地無真闊，大約三萬五千外平方公里，四邊的海岸有千外公里，有各種特殊地形的岩礁，形成濟濟奇形怪狀的海岸，千里的海岸有真濟變化，媠款的海邊仔，親像千面妖嬌的女郎，風情的媠予人讚嘆，值得逐家接近海邊來欣賞。
阮細漢的時陣，是咱的臺灣戒嚴時代，袂使予人接近海邊，漁民出海掠魚攏愛看證件，這馬已經解嚴，咱愛開始來了解海岸、親近大海，攝影家許萬八佮阮，透過鏡頭佮臺語詩，來紹介咱臺灣四邊海岸的景色，佮海邊地區逐家愛去觀光的所在，阮用影像佮詩歌𤆬逐家來臺灣行一輾，欣賞海邊的地質佮人文、歷史，佮攝影家愛去翕相的所在，共同來讚嘆臺灣真正是一个美麗的寶島。
臺灣島嶼是一个變化多端，而且有複雜的地形，懸山到平地佇坡度上，將近四千公尺的落差，東西沿岸到臺灣上懸的中央山脈，短短無到百公里的水平。海岸確實受著地理位置佮天氣的影響，攏有伊特色佮變化，嘛有伊迷人的地方風情。
東爿對三貂角的來來鼻，西到淡水河口附近的油車口，海岸線長大約一百四十四公里的北部海岸，抑就是一般人所講的北海岸。淡水河有關渡大橋，這座橋連結新北市八里區、五股區、佮淡水區、佮臺北市北投區關渡，橋邊的交流道佇日頭落山以後，交流道嘛有特殊的景色，阮安咧寫〈橋邊交流道〉：

人佮人的　交流
愛圓滿　人生的難關
攏會平安度過
關渡的人
看橋跤的水恬恬
流過　淡水河

臺灣北部海岸久年受著風浪的侵蝕，閣再加上早期沉降作用的影響，蝕痕地形足發達，親像野柳的蕈狀岩、燭臺石、金山的綠石槽、萬里的老鷹石、拳頭石、香菇石奇形怪狀。阮對〈萬里的石頭〉有按呢的詩情：

北海岸　有奇形怪胎的
老鷹石　長期佮海湧
相　拍
這塊　親像龜咧趖的
石頭　向海面游去
接受大湧的　挑戰

佇基隆港北爿，原來的名叫做社寮島的和平島，原來是一个小海島，這馬有和平橋佮陸地相連成做一个陸連島，和平島因為是北部沉降海岸的一部分，受著強烈的海蝕痕作用，所以蕈狀石、海蝕平臺、海蝕崖、豆腐岩，發育攏真發達。對和平島這个島嶼，阮是安呢寫著〈亭仔跤〉：

人佮人做伙　愛和平
島上的　涼亭
清風　吹過來
心涼脾土開
亭仔跤的　人
看海上的島　浮浮沉沉

東北角靠山偎海，有真濟奇岩怪石，嘛有幼綿綿閣柔軟的金色沙坪，佮真濟款的海洋生態，是一个上帝送咱的大自然教室，多功能觀光旅遊的海岸，佇東北角海岸線頂，水湳地區有一个陰陽海，海水色彩一半藍色、一半黃色，二爿分甲足清楚的。阮的詩〈陰陽海〉寫著：

陰陽　四象　八卦
天庭　地下　人間
陰陽　海邊仔
有彎彎的海岸
水湳洞漁港　搬一齣
咱佮惡有外長的　距離

偎著北部濱海公路行到南雅漁港了後，就會使看著誠濟經過海石風化的奇形怪石，親像是棋盤相當壯觀，大塊的大石岩表面，嘛有一粒一粒豬肝色捅出來的石瘤，造型真誠奇怪，規塊岩石是金黃色的，親像一塊超級大型的「起司麵包」，曷佇另外邊仔的岩石，綴著石頭必叉的縫，𠕆軟嘛無相仝，產生無仝的蝕痕，加上風化作用的影響，予原始的色彩有深淺無仝的改變，曷形成外形特別的岩石，所以有人共伊號做「霜淇淋岩」。這粒〈霜淇淋石〉予阮想著：

是啥人驚熱？
想欲食涼涼的冰
敢是　海邊的好兄弟
毋是啦　原來
是上帝雕刻的
藝術作品

佇東北角海岸公路頂，有一个出名的岬角風景，鼻頭角是東北角捅出來的一个岬角，以臺灣上北爿的富貴角，上東爿的三貂角合稱做北臺灣三角。鼻頭角佇島嶼的東北角海岸，阮的詩按咧寫〈鼻頭角〉：

你的鼻囥佇　島嶼的
東北角　是東西向　南北向
海岸線的　交纏點
恁的戀情是無單純的
三角戀　三貂角
富貴角　北臺灣三角

東北角海岸的岩石景觀，佇無仝的地點出現無仝的面腔，蘇花斷層海岸是對宜蘭的蘇澳延伸到花蓮溪口的崇德全長九十公里，崖懸平均佇三百到一千兩百公尺之間，規个蘇花海岸會使講是中央山脈的延長，大部分岩層是片麻岩佮大理石岩，石性相當𠕆，也因為按呢造就了險埈山勢，佮山壁景色足壯麗的，和平溪以南清水山東爿，就是出名的清水斷崖。
臺灣東部花東海岸線，北爿對花蓮溪口，南到臺東縣的小野柳，東爿倚太平洋西爿，靠海岸山脈海岸公路，長度一百七外公里，也因為人罕得到遮，閣無受工業的空污廢水的汙染，所以有臺灣上落尾一塊淨土的稱呼，是臺灣上媠的海岸線之一。
石梯坪是花東海岸精華地帶的第一站，因為岩盤捅出來深入海面，長長短短無一定親像岑仔仝款，所以才有石梯坪的稱呼，石梯坪海岸暗藏著豐富的珊瑚礁群佮熱帶魚群，海坪佮壺穴形成的潮池，有各種的海藻咧生長，魚、蝦、螺仔等等海洋生物，是石梯坪成做觀察海坪生態佮藏水、釣魚的好場所。
長虹橋橫迒佇秀姑巒溪兩岸，徛佇橋頂會使看清楚秀姑巒溪，佇大港口出海口有一座奚卜蘭島，秀姑漱玉就是佇秀姑巒溪出海口，白鑠鑠的石灰石，烏石鼻海岸，四界攏有大大小小的潮地理海蝕溝，是觀賞海坪海洋生物的上好的所在。石雨傘佇成功鎮北爿十公里的海岸，有海岸延伸到海中的海峽長大約一公里，屬於石灰石膨起來的海蝕地形，佇石雨傘遠看有一座海上孤島，彼就是東海上有名的景點三仙臺，三仙臺是一座離岸的珊珊瑚礁島，島上奇石分布，其中有三塊大的岩石傳說呂洞賓、李鐵拐、何仙姑，曾經來到這塊島，才有這个名。
這段傳說故事，用詩的形式寫著〈三仙臺〉：

為著　探訪海中仙人
呂洞賓　李鐵拐　何仙姑
搭這座有曲線媠款的　橋
借日頭神力來　發光
分辨世間的　善惡
探測　人心的變化

佇富岡漁港北爿的海域小野柳，是東部海岸上南爿的風景站，因為地形佮岩石佇種類上佮新北市的野柳外觀相仝，因為按呢才予人稱做小野柳。佇恆春半島上，猶有熱帶地區才會當看著的珊瑚礁海岸，久年海湧的沖拍之下，珊瑚礁看起來像百襇裙，海湧的花看起來像百襇裙滾邊的蕾絲花，按呢就形成浪漫的裙礁海岸。到了恆春這个地方，攏也想起陳達的歌聲佮宋澤萊的詩歌，所以阮著寫出〈歌聲〉：

若是到　屏東枋寮
著唱出陳達的歌
思相枝
若是到　恆春
著會想起　宋澤萊
罩霧的山崙　親像姑娘的溫存

臺灣本島的海坪來講，干焦恆春半島的珊瑚砂是真正的海底來的沙。若是想欲看珊瑚礁絢麗的面腔，著來一逝恆春半島，一定會予你充滿著讚嘆。佇海岸咱的看著真濟燈塔，守著港口佮海岸，看船佮人來來去去，親像墾丁的燈塔，阮想著〈海岸的眼神〉攏無𥍉的目睭，看顧的海岸的一切：

守佇墾丁烏暗暝的
燈塔　是南臺灣海岸的
目睭　透出關懷世間的眼神
日時　佇日頭跤陪著
一對一對　情人
翕相

臺南海岸介佇八掌溪佮二仁溪之間，相連長度達到三十公里的細長沙堤岸，離海岸線無到三公里，形成一个闊閣大的潟湖地帶，所以佇七股汕頂，會使看著真濟蚵棚，這是當地居民重要經濟來源。
佇臺南這个地區，咱袂凍無講著安平港，遮有一座有歷史的古城，有紅磚仔厝、古堡佮古街仔，嘛有媽祖的公園，林默娘的神像守著港口的平安，真濟人愛去安平，走揣古早時代的故事，唱安平追想曲，去想起彼个無情的行船人，阮嘛寫著〈安平追想曲〉：

佇安平古堡的
紅磚梯頂　想起
陳達儒的安平追想曲
彼个　無情的荷蘭船醫
留落來的紅毛女郎
佮老母仝款的　運命

嘉義海岸佮雲林海岸誠相仝，海岸線近年來一直退後，沿海沙汕嘛一直消失，外汕頂魚網有起碇沙坪，但是受著真濟因素的影響消退速度真快，布袋海岸南有翁島北有白水湖壽島形成天然的沙岸，保護蚵園袂予海湧沖走，咱對天頂看這个所在，闊茫茫的蚵園景致，成做海邊居民上好飼蚵仔的所在。
臺灣西南地區沿海海岸，會使講是海岸生態上蓋豐富，經濟價值上懸的海坪，除了北港溪以北是沙泥質的海坪以外，對大肚溪口以南到濁水溪以北的地區稱作鹿港海岸，大部分攏是沙泥質的海坪，是飼蚵仔佮蚶仔理想的所在。佇王功有真濟飼蚵的人，阮寫著〈蚵園〉：

潮水　來來去去
媽祖魚　游來游去
夢　做踮闊茫茫的大海
隨海湧漂浪　土地
竹箍　蚵穗　鹹水　海風
飼養　冷酸酸的海風
三代人　用汗水佮紅血
沃肥　飼大大細細的頭喙

佇王功北爿新寶的海邊，予大湧送來一隻鐵殼船，囥一段真久的時間，有真濟人走去看，攝影家留下伊的身影，這馬已經無去，但是阮有留下詩佮相片，阮的詩〈鐵殼船〉寫著：

十外年前漂來的鐵殼船
損斷著牛埔頭人的
珍珠蚵園
無人認領變作新地景
有人　入去食毒
這馬　消失去

漢寶是阮的故鄉，古早時代是靠討海佮種田來生活，慢慢行向農漁業觀光，庄內有人開休閒農場，用生態園區來教育保育的觀念，阮有寫過一首〈臺灣漢寶園〉的詩歌，描寫故鄉的生活情形：

漢寶園　真好耍
飼雞飼鴨來生蛋
漢寶園　好所在
報予　親晟朋友知
來海邊　聽風聲　看海鳥
踮大埕　拍干樂兼焢窯
入水窟　摸蛤仔兼洗褲
漢寶園　鹿港的隔壁庄
離王宮無遠　蚵煎佮魚湯
暗時食甲天光　實在真好耍

佇漢寶園有一个朋友佇沙坪開一間海中漁場，予人去摸蛤仔佮掠魚，體驗海中的生活，魚場內閣設有一間咖啡廳，生理本來真好，但這位頭家品行無好，尾仔生理失敗，違法犯罪掠去關，這馬只有留下過去的影像，阮著寫出〈夢中漁場〉：

迵過天眼　看著
過去的　海中漁場
無情的海湧
攑頭三尺有　神明
按怎來　按怎去
無常的　人生

漢寶佮福寶兩庄，攏有真濟野鳥，遮是野鳥的故鄉，阮寫過一本村史《野鳥佮花蛤的故鄉》這本冊中，講到真濟野鳥的故事，生態佮產業的衝突，嘛有講阮家族的生活歷史。這馬佇這本新冊內，特別有一輯「生態之歌」的詩來描寫，親像〈暗光鳥〉寫著：

暗時　發紅光的
目睭　溜溜瞅瞅
看魚仔　水中游
魚仔　跳入暗光鳥的
目睭
向鳥喙咧游

鹿港海岸邊的工業區內，有一間玻璃廟「護聖宮」拜媽祖婆，是一間文創廟，廟中有臺灣的生態鳥類、阮寫的臺灣的囡仔歌，刻佇壁頂；亦有玉山的圖像，有一張「臺灣豐韻圖」畫出臺灣的地理景色，地方小食佮民俗節慶，對臺灣頭到臺灣尾，真濟出名的古蹟佮名勝，都畫佇廟壁的圖頂，猶有真濟掛懸懸的鼓仔燈，這間廟是全球唯一的玻璃廟，阮的詩寫著〈心靈的故鄉〉：

鹿港　古睢伯用玻璃造
大廟　展現旅遊文化創意
囡仔歌　生態詩　宗教科儀
入來拜　有保庇
運用新的科技
予咱追求心靈的故鄉

臺灣北部地區桃園、新竹、苗栗，這三縣市海岸大部分攏是沙崙海岸，干焦有狹狹的海岸平原佮山地相隔，佇溪的出海口付近對北到南也有濕地，曷新豐濕地是北臺灣唯一有水筆仔海茄苳共生的區域，另外新竹市十七公里海岸線頂的香山濕地，是全國出名的生態教室，白扇仔種類超過四十種，數量閣達到四億隻以上。佇苗栗海岸中，佇苗栗縣通霄鎮的西北爿，過去人稱呼伊白沙屯，白沙屯也就是白沙堆積成山崙的意思。苗栗苑裡沙崙海岸苑裡漁港，對苑裡港漁的南爿到北爿，闊大約兩公里的沙崙海岸，逐擺若到東北季風吹來的時就形成特別的沙崙地景，有時若沙坪，成做臺灣重要海岸景觀之一。比如，佇新竹的香山阮寫：〈新竹的沙坪〉寫著：

毋免去非洲看
撒哈拉沙漠
新竹的芳山　嘛有
臺灣真正是　寶島
海岸　有真濟變化的
媠款景緻　沙紋

新竹的香山，猶閣有一座竪琴橋，真特別的造型，每个角度攏無相仝，是重要的旅遊景點，真濟人走去翕相，情人牽手去散步，有曲度的這座橋，做過日本NIKON年度月曆的封面，阮寫著〈天琴〉：

啥人　佇天頂
製造作一座　天琴
予風來彈奏
予雨來唱歌
唱出芳山
命運的交響曲

其實臺灣島嶼四邊的海岸，一千外公里，有真濟好寫的地方，所寫的詩接近一百首，嘛無法度加全部的景點寫了，希望逐家拍拚來關心咱的海岸，阮規本冊有分：四輯：第一輯「岸上人間」：這輯攏總三十二首詩，順著海岸邊一寡旅遊景點，也是古蹟、港口、燈塔，寫出海邊人的生活佮遊覽客的形影，第二輯「地質詩情」：攏總二十首詩，臺灣四周海岸線，有千變萬化的地質，產生各種奇形怪狀的雅石，變成攝影家佮旅遊客參訪的所在。第三輯「海上掠影」：攏總二十首詩，這攏是海中討海人的身影，有發展觀光打造咖啡廳、漁民掠魚苗栽的情形，嘛有衝湧活動選手佇海頂的英雄屈勢。第四輯「生態之歌」：攏總有二十一首詩，有海岸邊的各種野鳥、砂馬仔、花鮡等沙坪的生態。
佇戒嚴時代，作家苦苓寫過一本《只能帶你到海邊》的散文，主要咧講臺灣雖然是海洋國家，但是海防真嚴，袂當凊彩踏出海岸，干焦會使行到海邊看海，予臺灣人對海上的代誌真生疏，毋敢接近大海，對海岸的各種地質、生態、海邊生活攏無了解，這馬已間解嚴囉，咱愛去接近大海、親近海邊生活的鄉親，臺灣人真濟靠海維生的漁民，阮透過家己的母語來寫詩，透過影像的媠氣去傳播海岸的景緻，學語言的時陣，了解咱的土地佮人民，生活的情形，對了解產生愛，愛鄉土、愛國家、愛臺灣、愛規个世界。

臺灣島。海岸詩／ 康原

佇十六世紀葡萄牙人咧行船，發見咱个臺灣島，開喙喝著「Formosa」，意思是講「美麗个島嶼」，這粒島嶼四邊攏是海，親像一隻海翁踮大海中浮浮沉沉咧泅水。臺灣算起來土地無真闊，大約三萬五千外平方公里，四邊的海岸有千外公里，有各種特殊地形的岩礁，形成濟濟奇形怪狀的海岸，千里的海岸有真濟變化，媠款的海邊仔，親像千面妖嬌的女郎，風情的媠予人讚嘆，值得逐家接近海邊來欣賞。
阮細漢的時陣，是咱的臺灣戒嚴時代，袂使予人接近海邊，漁民出海掠魚攏愛看證件，這馬已經解嚴，咱愛開始來了解海岸、親近大海，攝...

【推薦序】佮唸謠相閃身／路寒袖 006
【自序】臺灣島。海岸詩／康原 010
【導讀】夢幻的色彩，真實的臺灣／曾金承 022

輯一、岸邊人間
01 變聲的獅／獅頭山（新北市金山區）048
02 橋邊交流道／關渡（新北市八里區）050
03 亭仔跤／和平島（基隆市中正區）052
04 漁港／正濱漁港（基隆市中正區）054
05 西海岸傳奇／漢寶（彰化縣芳苑鄉）056
06 牛埔頭的黃昏／新寶（彰化縣芳苑鄉）058
07 虹橋／彩虹橋（苗栗縣苑裡鄉）060
08 情人／漢寶海堤（彰化縣芳苑鄉）062
09 看海／漢寶觀海橋（彰化縣芳苑鄉）064
10 橋／漢寶（彰化縣芳苑鄉）066
11 心靈的故鄉／鹿港玻璃廟（彰化縣鹿港鎮）068
12 天琴／豎琴橋（新竹市香山區）070
13 散步／豎琴橋（新竹市香山區）072
14 夕陽／井仔腳（臺南市北門區）074
15 雲彩／崙尾福崙宮（彰化縣鹿港鎮）076
16 光佮影／王者之弓（彰化縣芳苑鄉）078
17 煙火／芳苑燈塔（彰化縣芳苑鄉）080
18 記持／深澳（新北市瑞芳區）082
19 燈塔／鼻頭角燈塔（新北市瑞芳區）084
20 陰陽海／陰陽海C型彎（新北市瑞芳區）086
21 歷史的窗／英國領事館（高雄市鼓山區）088
22 85大樓／85大樓 （高雄市苓雅區）090
23 海岸的眼神／墾丁鵝鑾鼻燈塔（屏東縣恆春鎮）092
24 安平追想曲／安平古堡（臺南市安平區）094
25 高雄燈塔／旗後燈塔（高雄市旗津區）096
26 日出／三仙臺（臺東縣成功鎮）098
27 三仙臺／三仙臺（臺東縣成功鎮）100
28 天河／三仙臺（臺東縣成功鎮）102
29 山里火車站／山里火車站（臺東縣卑南鄉）104
30 石頭厝／卯澳石頭厝（新北市貢寮區）106
31 燈塔／三貂嶺燈塔（新北市貢寮區）108
32 蘇澳漁港／蘇澳港（宜蘭縣蘇澳鎮）110

輯二、地質詩情
33 綠石槽海岸／老梅綠石槽（新北市石門區）114
34 胎紋／野柳（新北市萬里區）116
35 玫瑰花石／玫瑰岩（新北市萬里區）118
36 石紋／萬里石紋（新北市萬里區）120
37 萬里的石頭／野柳龜（新北市萬里區）122
38 月牙泉／外澳（宜蘭縣頭城鎮）124
39 和平島／和平島（基隆市中正區）126
40 新竹的沙坪／香山沙丘（新竹市香山區）128
41 對話／深澳岬角（新北市瑞芳區）130
42 霜淇淋石／南雅奇石（新北市瑞芳區）132
43 奇石／南雅奇石（新北市瑞芳區）134
44 拳頭石／萬里拳頭石（新北市萬里區）136
45 過客／南雅奇石（新北市瑞芳區）138
46 鼻頭角／鼻頭角（新北市瑞芳區）140
47 海豹／海豹岩（基隆市中正區）142
48 黃金水沖／金瓜石黃金瀑布（新北市瑞芳區）144
49 一點紅／深澳香菇石（新北市瑞芳區）146
50 海狗／南雅海狗岩（新北市瑞芳區）148
51 象鼻岩／象鼻岩（新北市瑞芳區）150
52 粉鳥林／東澳粉鳥林（宜蘭縣南澳鄉）152

輯三、海上掠影
53 鐵殼船／鐵殼船（彰化縣芳苑鄉）156
54 蚵園／新寶蚵園（彰化縣芳苑鄉）158
55 海寮／漢寶海巡署（彰化縣芳苑鄉）160
56 夢中漁場／漢寶海中漁場（彰化縣芳苑鄉）162
57 彩雲人生／漢寶濕地（彰化縣芳苑鄉）164
58 蛤女／漢寶蛤女（彰化縣芳苑鄉）166
59 揣夢／漢寶濕地（彰化縣芳苑鄉）168
60 光／蚵架與天光（彰化縣芳苑鄉）170
61 影／漢寶鰻苗夜（彰化縣芳苑鄉）172
62 走揣／尋找黃金蛤（彰化縣芳苑鄉）174
63 雲／濕地生態（彰化縣芳苑鄉）176
64 夢影／海牛文化（彰化縣芳苑鄉）178
65 掠鰻魚苗／漢寶鰻苗（彰化縣芳苑鄉）180
66 漁網／鰻苗漁網（彰化縣芳苑鄉）182
67 人生／漢寶濕地（彰化縣芳苑鄉）184
68 火光掠魚／磺火捕魚（新北市金山區）186
69 歌聲／枋寮（屏東縣枋寮鄉）188
70 雲彩／枋寮（屏東縣枋寮鄉）190
71 海湧／南灣衝浪（屏東縣恆春鎮）192
72 空／枋山（屏東縣枋山鄉）194
73 龜山島／龜山島（宜蘭縣頭城鎮）196
74 鏡／天空之鏡（臺東縣成功鎮）198
75 金樽漁港／金樽漁港（臺東縣東河鄉）200
76 宜蘭外澳／裙襬搖搖（宜蘭縣頭城鄉）202

輯四、生態的歌
77 赤翡翠／赤翡翠（過境鳥／野柳）206
78 日本歌鴝／日本歌鴝（冬候鳥／野柳）208
79 遠方人客／小環頸鴴（冬候鳥／漢寶）210
80 鷹斑鷸／鷹斑鷸（冬候鳥）212
81 黑翅鳶／黑翅鳶（臺灣留鳥）214
82 埃及聖鹮／埃及聖鹮（引進種）216
83 暗光鳥／夜鷺（臺灣留鳥）218
84 形影／彎嘴濱鷸（過境鳥）220
85 彩鷸／彩鷸（臺灣留鳥）222
86 雲雀鷸／雲雀鷸（過境鳥／臺南）224
87 高蹺鴴／高蹺鴴（冬候鳥／福寶）226
88 水雉／水雉（臺灣特有種／福寶）228
89 反嘴鴴／反嘴鴴（冬候鳥／布袋）230
90 大城的西港／紅領瓣足鷸（過境鳥／大城西港）232
91 蟻鴷／地啄木（冬候鳥／新竹南寮）234
92 花跳／彈塗魚（花跳）236
93 孤獨鷿鷈／小鷿鷈（臺灣留鳥）238
94 招潮蟹／招潮蟹（北門）240
95 黃昏的舞會／黑腹燕鷗（冬候鳥）242
96 橙頭地鶇／橙頭地鶇（過境鳥／高雄港）244
97 過境的綬帶／綬帶（過境鳥／野柳）246

【推薦序】佮唸謠相閃身／路寒袖 006
【自序】臺灣島。海岸詩／康原 010
【導讀】夢幻的色彩，真實的臺灣／曾金承 022

輯一、岸邊人間
01 變聲的獅／獅頭山（新北市金山區）048
02 橋邊交流道／關渡（新北市八里區）050
03 亭仔跤／和平島（基隆市中正區）052
04 漁港／正濱漁港（基隆市中正區）054
05 西海岸傳奇／漢寶（彰化縣芳苑鄉）056
06 牛埔頭的黃昏／新寶（彰化縣芳苑鄉）058
07 虹橋／彩虹橋（苗栗縣苑裡鄉）060
08 情人／漢寶海堤（彰化縣芳苑鄉）062
09 看海／漢寶觀海橋（彰化縣芳苑鄉）064
10 橋／漢寶（彰化...